Goo kpàdèuma rèè
kìtaabuà
Kìtaabuà doùn kùnàgòò jɔnaa
1
1 Ayìwà, nèe Yesù Kirisà rè goo kpàdèuma, Ŋaabla nìi wɔu à suun, è bà ni à kpàdè e re jòn nèè rà, nìi nà fa sani dɛyn. Tà doùn, Yesù sa yeè e re mɛ̀rɛ̀kɛɛ̀ ka e re jòn kpiri Yùxanà rè, à y'à goò rèè kpàdè tɔ̀ ra. 2 Yùxanà sa yeè bà shɛɛrɛ, à y'à kpàdè ci wo nìi sapɛ jau, à Ŋaablà re goomaa nì, è bà Yesù Kirisà rè shɛɛrɛbe. 3 Mòò riì nèe kɛɛra goòmà rèe rèè sɛbɛunmaà kàr'na, ko nìì reè yè e toro wɔɔ̀ à re y'à to e duùn, twɛy raa wùbeu. Twɛy raa wùbeu, kàtsu è fa watsi tsyɛnbeò.Yùxanà dzwɛ nìi jiu Azhi mar'la ɲɛynamoo kuru ɲɛ̀ɛ̀nuàn nà
4 Àwà, ɲɛynamoo kuru ɲɛ̀ɛ̀nun nìi ni Azhi mar'la doùn, nèe mun Yùxanà rè sɛbɛn, è ka twɛy rè. Ŋaablà riì ni, à na ni tsuù, è bà nàa, arì she, tɔ̀ yeè e ɲanwùɔ ko jaancin sìn e ra. À re dzi ɲɛɛ̀nun nìi to ni à re màsà gbaaniɛn jaaterema, 5 ko Yesù Kirisà, Shɛɛrɛ vusootia, fùn jɔna kpunaumaà, dzɔ̀nxɔɔ̀ tsɛ màsa reè raa Màsaa, twɛy sa yeè tɔ̀ fa e re.
Àwà, Ŋaablà Jaara Moo Yesù rìi mùn kɛ̀niɔ̀n, è bà mùn tsi bou e re gooɲaantsiɛ ɲàn e tsiɛn baraka rɔ̀n, 6 tà ko è mùn bà màsàbe doùn mòdzin ì ko saaka goojaabobaa ì e fa Ŋaablà re, nɔɔrɔɔ̀ ko dzitsifabee yè bà tɔ̀ raa watsi sen ɲɛn watsi tsɛ. Àmiinà ! 7 À siin nèe, à nàa mun'na ɲàn. Jaadzin sapɛ nà à jà, arì nìì reè y'à vɔ̀ tsɔu. Dzɔ̀nxɔɔ̀ tsɛ tsua sapɛ nà gɛɛy à kamà. Àmiinà !
8 Mùn Tsìfa Ŋaablà ci: «A y'a myɛ̀n Alifà ko Omegà, nìi dzuɔn Jɔ̀naà ko Lataan, tɔ mun nì. Nìi ni, à na ni tsuù, è bà nàa. Dzia sapɛ dzyeèma tsifaà.»
Nìi kpàdèu Yùxanà nà, è bà ni Patsimɔsì
9 Àyìwà mun Yùxanà, ye neema kpir'la, ko ye byɛnbefasià è ɲɛn Yesù rè goo rèè tsɛ, ye ko mun sa yeè bà soo à re màsàbee doùn, mìn bà e mɔɲɔɔ̀n à kamà, mun kun bèu Patsimɔsì kòòyua fi dzɔ̀nxɔ̀ gane sɔn ɲan, Ŋaablà re Goomaa ko Yesù rè shɛɛrɛbee yè bà saabu. 10 Àwà Tsìfaà rè jisee sii sèè, Ŋaablà re Dzia dɔ̀un mun ɲan, min vu blà sɔn myɛn n bonè, a ci vuru fyɛ vu. 11 À ci: «Wo nìi jàa, tɔ̀ sɛbɛn sɛbɛn doùn, a sìn be nèe wɔ̀ ɲɛ̀ɛ̀nun nèe ɲɛynamoo kur'lèè rà, nìi yɛ Efɛsì, ko Simirinì, ko Pɛrigamùn, ko Tsiyatsirì, ko Saridzì, ko Filadɛlifì, ko Lawodzisè.
12 Àwà, vu nìi goomaa mun ka, min jaa kere tɔ̀un, ci mun nà tɔ̀ siin. Min jaa kereu min niì, min fìtsìnà ge sɛnuma ɲɛɛ̀nun jà. 13 Twɛy fìtsìnà ge reè shiɲaanfi, min gèsɔn ja, tɔ boo mòdzin ne. À mɛ̀yɛ gbaan sɔn wɔɔ, è bà e ɲanshiɔ̀ e ɲiɛ̀ rà ko ɲànshìàge sɛnuma ka. 14 À kùngwɛ̀ɛn fyɛɔ tɛrɛ tɛrɛ tɛrɛ a ci kpaantsɔ ko sàà sùù fyɛ, à jaadzin neè yè bà ni a ci sàden. 15 À sàn nèè dendeèn a ci dànɲan niì jɛ̀rɛ̀n boo sa rɔ̀n, à noo yè bo, à vuà yè bà ni a ci yu blà tsuuru vu. 16 Swɛyn ɲɛ̀ɛ̀nun kuuna à sirama sia doùn, bàmunun dzii fii dzii swɛyswɛy yè bà bouna à dzu. À jaakɔrɔɔn dendeèn a ci bwèytaaruùn fàxe rɔ̀n bwèè.
17 Àwà m'a jàu min niì, min mɛɛy ji à sàn dzuun, min bà a ci fùn. Tɔ̀un è sirama sia tsùù mun tsɛ, è dzin ci: «Maà shi waa, mun nì Jɔ̀naà, min bà Lataan. 18 Mun jaama. Mun saun, ŋà mun yɛ jaama, watsi sen ɲɛn watsi tsɛ. Saàn ko fùn nèè tàà sa neèdzian ni mun suun. 19 Tà doùn, wo goo nìì reè jàu, è sɛbɛn. Nìi reè ni dòònun ko nìì reè nà nà twɛy bònè e sa sɛbɛn. 20 Wo swɛyn ɲɛ̀ɛ̀nun nìi jàu mun sirama sia doùn, ko fìtsìnà ge sɛnuma ɲɛɛ̀nuàn, tɔ̀ gòndoo dzuɔn nì siin: Swɛyn ɲɛ̀ɛ̀nuàn, tɔ ɲɛynmoo kuru ɲɛ̀ɛ̀nun nèè raa mɛ̀rɛ̀kɛ rèè, fìtsìnà ge ɲɛɛ̀nun nèè, twɛy yè bà ɲɛynmoo kuru ɲɛ̀ɛ̀nun nèè.»