Sutan'ne jii gbaa soo fa goo jɔ̀rɔ̀kɔɔ dzu
20
1 Àyìwà, tà shɔ̀ùn, min mɛ̀rɛ̀kɛ sɔn jaà bo nakɔɔn ja jìrànxɔ rɔ̀n, kɔ̀ɔ̀ tsun gloùntòò nèèdzian ni tɔ̀ suun, ko myɛ̀ɛ̀n jɔrɔkɔ bla. 2 È kparan ɲaan kun, tɔ̀ niì myɛn bɔrɔɔ, è bà kir'là Sànwɔbaà ko Sùtana. À y'à shì jɔ̀rɔ̀kɔɔ ka, è bà ni jii gbaa soo fa tɔ̀ dzu. 3 Tɔ̀un, à y'à maa dɔn bè kɔ̀ɔ̀ tsun gloùntòò doùn, è dziɛ̀ tsyee à mà, è tàànmàshɛɛn tsùù tɔ̀ tsɛ, à mà nà to kun neè mòdzian sàn fìrì dɛ, fɔ jii gbaa soo yeè bè tsyɛn. Tɔ̀ ye tsyɛn gbaa nìi bwèy, à nà foro bàji kɔn, è watsi dɛɛnin fa.4 Tà shɔ̀ùn, min màsà gbaaniìn ì jà. Nìì reè nàu e tsuù twɛy tsɛ, dzi yeè sìn è ra, yè kitsia kùnùn. Nìì reè kùngɔ kùnuun, Yesù re shɛɛrɛbee ko Ŋaablà re goomaa kamà, ko nìì reè na kpar'na blàbe, è na à ɲɛɛ̀n blàbe, à re tàànmàshɛɛn to na ji è teen ko è sià rà waa, min twɛy xɔn reè jà. È sèè bàu jaama ì yè e tsuù màsàbee rà ko Ŋaablà Jaara Moò ka, fɔ jii gbaa soo. 5 Mòdzìn dzyee saunma rèè na seè kpunan bo saàn ɲàn yè bà jaama waa, fɔ jii gbaa soo yè bè dò. Tɔ̀ rii bàu fùn nèè sèè kpunan jɔ̀naà. 6 Nìì reè dzii bàu ni fùn nèè sèè kpunan jɔ̀naà ɲàn, twɛy raa wùbeu, yè bà fɛnɛɔ̀. Saàn fiiraa fa dzi tara è tsɛ waa. È nà bà Ŋaablà ko e Jaara Modzìàn rè saaka goojaabobaa ì, yè e tsuù màsàbee tsɛ ko à ka, è bè tàrà fɔ jii gbaa soo.
7 Àwà, jii gbaa soo ye tsyɛn watsi riì bwèy, Sùtana nà foro bo jɔ̀rɔ̀kɔɔ rà, è bo e re kàsoò doùn. 8 À nà bo è kun neè mòdzian sàn fìrì dziɲan tsiɛ nɔ̀nkɔn nààleèn min niì sapɛ, twɛy nìì reè kiriɔ Gɔgì ko Magɔgì, è ladzyeè kaà kamà giri, a ci kòòyù dziɛ rà cɛncɛn dzian. 9 Yè nà yè bo dzɔ̀nxɔɔ̀ min niì sapɛ, yè Ŋaa re mòdzin neè rè bùɔ̀ ko wɔ̀ kɛ̀niumaà laminin. Sà sɔn yeè bo jìrànxɔ rɔ̀n tɔ̀un, tɔ̀ yeè è dzu bo mɔn. 10 Àwà, Sànwɔbaa nìi na è sànfìr'la, tɔ̀ yeè maa sà bla rɔn, gìrìbià sàà, kpar'na ko kɛɛra doodebaà sa ni min niì. È nà byɛn mɔn fen ko bwèy, watsi sen ɲɛn watsi tsɛ.
Kitsi lataan raa goò
11 Tà shɔ̀ùn, min màsà gbàànììn fyɛ bla sɔn ja, tà ko mòò riì tsùuŋnà à tsɛ. Dzɔ̀nxɔɔ̀ ko jìrànxɔɔ̀ sa yeè vwɛ̀ɛ̀y bo à jaaterema tɔ̀un, jaa na ɲɛn è mà dɛ. 12 Tà shɔ̀ùn kɔn, min mòdzin saunma rèè jà, modzin bla sen ɲɛn modzin kiɲaanin tsɛ, è tsìiŋnà màsà gbaaniɛn jaaterema. Sɛbɛn ì dzii yè san tɔ̀un. Sɛbɛn kpɛrɛ sa yeè san, nìi jaamabee sɛbɛɛn. Kitsia yè kùnùn mòdzin saunma rèè tsɛ è kòrò ko è faadziɛ ka, tɔ̀ niì sɛbɛɔ̀n sɛbɛn neè doùn. 13 Kòòyua yè e raa mòdzin saunma rèè bo, saàn ko fùn nèè tàà yè e raa rèè bo, kitsia yè kùnùn è sapɛ tsɛ è kòrò ko e faadziɛ ka. 14 Àwà, saàn ko fùn nèè tàà sa yeè maa sà blà rɔn tɔ̀un. Sà blàa, tɔ̀ rii saàn fiiraa. 15 Mòò o moò tsoo sɛbɛunma na ja jaamabee sɛbɛɛn doùn, twɛy sapɛ yeè maa sà blà rɔn.