Tsoo dzi ye ɲɛn Ŋaablà tsɛ !
19
1 Àyìwà, tà shɔ̀ùn, min gooma vu blà myɛn è bo jìrànxɔɔ̀ doùn a ci jàma blà maànkan, tɔ̀ dziàn fààn na ci: «Tsoo dzi yeè ɲɛn Ŋaa tsɛ ! Mìn tsi, ko nɔɔrɔɔ̀, ko dzibaabee, twɛy ɲe re Ŋaablà raa. 2 Twɛy y'à raa, kàtsu à re kitsia goo rèè sààben, yè bà tereòn, è ɲɛn à tsɛ, ɲànmɔ̀ɔ̀taan blà riì na dziɲaan sapɛ fyee jiɔ̀ e re ɲànmɔ̀ɔ̀bè goo reè ka, à kitsia kùnuun tɔ̀ tsɛ, è re jòn vuuma rèè tsìɛn tsìì sàrà à ɲan. 3 Yè dzin kɔn ci: «Tsoo dzi yeè ɲɛn Ŋaa tsɛ ! Babilɔnìn dzua sàtsur'la tèyn tsùuŋma yɛ watsi sen ɲɛn watsi tsɛ.» 4 Mòòbɔɔ mòo nààleèn, ko gè jaama naàleèn sa yeè e kunun gban ji dzɔn nɔ̀n tɔ̀un, yè e kuu Ŋaablà biìn y'à blàbe, tɔ̀ niì tsùuŋnà màsà gbaaniɛn tsɛ, yè dzin ci: «Àmiinà ! Tsoo dzi yeè ɲɛn Ŋaa tsɛ !»Sààtòmòìriɛ rè kɔɲɔngoo ɲwɛɛ̀n
5 Vu sɔn yeè bo màsà gbaaniɛn nà, tɔ̀ yeè dzin ci: «Ye tsoo dzi ɲɛn mùn ne Ŋaa tsɛ, à re jòn nèè sapɛ, ko nìì reè sapɛ shia à jɔɔn, mòdzin kiɲaanin sen ɲɛn mòdzin bla tsɛ. 6 Tà shɔ̀ùn min vu sɔn myɛn kɔn, tɔ boo jàma blà maànkan ne. A ni a ci yu blà tsuuru vu, è bà ni a ci ŋaa kpinin vu blà. À dziàn ci: «Tsoo dzi yeè ɲɛn Ŋaa tsɛ ! Tɔ̀ yeè fa, kàtsu mùn Tsìfa Ŋaablà, Dzitsi Ŋaablà ye e re màsàbee tsùuŋ. 7 Mìn taama dzibe ! Ɔ̀ɔn, min taamadzibe brìsi fa, m'a nɔɔrɔɔ̀ kpàdè. Mìn tɔ̀ fa, kàtsu sààtòmòìriɛ rè kɔnɲɔn goo wɔu, à re tààn to yè e lamɔ̀nɔɔ̀n. 8 Fuà jìsì vya wɔu à suun, nìi fyɛɔ tɛrɛ tɛrɛ fɔ è bè dendeèn, ci è tɔ̀ ji e ma. Àwà, tɔ̀ fuà jìsì vya ree, tɔ Ŋaa re mòdzìn neè rè goo tereunma rèè rìì.
9 Tà doùn, mɛ̀rɛ̀kɛɛ̀ yè dzin mun na ci: «À sɛbɛn ci: nìì reè kiriɔ sààtòmòìriɛ rè kɔnɲɔn goo ɲwɛɛ̀n nà, twɛy raa wùbeu !» È dzin mun na kɔn ci: «Twɛy gooma reè Ŋaablà re gooma taki taki reè rìì.» 10 Tɔ̀un, min kunun gban ji à sàn dzuun, ci mun nà n kuu à bììn, m'a blàbe. È dzin mun na ci: «M'a tɔ̀ fa waa ! Mun sa wo faagoofasià sɔn ni, tà ko wo neemasi reè kòòsi, twɛy nìì reè yè e shiɔ̀ Yesù rè shɛɛrɛbee rà. Ŋaablà rii blàbe. Àwà, kɛɛra goòmà rèè ni Yesù rè shɛɛrɛbee rìì tsɛ.»
Shù fyɛ̀tsia raa goò
11 Tà shɔ̀ùn, min jìrànxɔɔ̀ dzii saunma jà. Shù fyɛ sɔn yeè bo. Mòò riì tèreòn à tsɛ, tɔ̀ tsoò Vusootsi, ko Sààbèntsi. À kitsia kun'na terenbe tsɛ, è bà kaà faa ko terenbe ka. 12 À jaadzin neè dendeèn a ci saden, màsà bàànflàrii giri yè bà ni à kùùn. Tsoo sɔn sɛbɛɔ̀n à tsɛ, à soo boshɔ̀ùn, mòò pɛn na tɔ̀ tɔ̀ waa. 13 Mɛ̀yɛ bla sɔn na ni à mà, tɔ wɔɔ tsììn ɲan, à yɛ̀r'la tsoo yè bà ci, Ŋaablà re goomaa. 14 Jìrànxɔɔ̀ kaadzin kur'lèè na tèreòn shù fyɛ ì tsɛ, yè bà gbaɔn à kpɛyn. Fù jìsì vya ì ni è mà, twɛy fyɛɔ tɛrɛ tɛrɛ. 15 Bàmunun dzii swɛy swɛy dzii dziù sɔn bouna à dzu, è bà ni tɔ̀ ka banbwey fa kun neè mòdzian ɲàn. À nà è kplatsuù ko myɛ̀ɛ̀nbere ka, à yè è tsyɛɛnma Dzitsi Ŋaablà re vununta blàa ka, a ci ɛ̀rɛ̀nzhɛ̀ndzin tsyɛɛnmaa nìi tsuru gè doùn, à yuà yè bo. 16 Tsoo sɔn sɛbɛɔ̀n à re mɛ̀yɛɛ ko à gee tsɛ, nìi yɛ ci: «Màsa reè raa Màsaa, ko tsìfa rèè raa Tsìfaà.» 17 Àwà, tà shɔ̀ùn, min mɛ̀rɛ̀kɛ sɔn tsiiŋmà jà bwèè doùn, tɔ dziàn fààn na jìran nɔ̀n kɛ̀yn neè rà ci: «Ye nà e ladzyèè Ŋaablà re fɔ̀nɔ̀n blaa kamà ! 18 Ye nà, ye bà ni màsa reè shuà ɲɔn, ye kaadzin kuntsii reè shuà ɲɔn, ye fààntsi rèè shuà ɲɔn, ye shù rèè ko e tsɛ tèynbaa rèè shuà ɲɔn, ye mòdzian sapɛ shu ɲɔn, xɔrɔn sen ɲɛn jòn tsɛ, mòdzin kiɲaanin sen ɲɛn mòdzin bla tsɛ.» 19 Àwà, tà shɔ̀ùn, min kpar'na jà, à ko dzɔ̀nxɔɔ̀ tsɛ màsa reè, ko twɛy raa kaadzin neè, yè e ladzyèeŋnà, è nà kaà fa shùà tsɛ tèynbaà, ko e raa kaadzin neè ka. 20 Kpar'na yè kun tɔ̀un, à ko kɛɛra doodebaà, tɔ̀ niì na tàànmàshɛn kabagooma reè faa kpar'na jaaterema. Kpar'na rè tàànmàshɛɛn na jiɔ̀ nìì reè rà, yè bà à ɲɛɛ̀n blàbee, à na twɛy goo rèè ka twɛy mòdzin neè sàn fìriɔ̀. Tà doùn, kpar'na ko kɛɛra doodebaà fiɛ̀ sa jaama yeè maa sà blà rɔn tɔ̀un, sà nìi gìrìbià sàà. 21 Bàmunun nìi na boo shùà tsɛ tèynbaà dzu, dzyee rèè yè vu tɔ̀ ka. Kɛ̀yn neè sapɛ yeè è shuà ɲɔn yè cɛn.