Apocalypse 18

Babilɔnìn wɔ̀ɔ̀ tàr'la goo rèè

1 Àyìwà, twɛy goo rèè shɔ̀ùn, min mɛ̀rɛ̀kɛ kpɛrɛ jà kɔn, tɔ jàà bo naà jìrànxɔn rɔ̀n. Dzi brisi ni à rè, à nɔɔrɔɔ̀ vyeè yè bà dzɔ̀nxɔɔ̀ min niì sapɛ viɔ̀. 2 È vu bo fààn na ci: «Babilɔnìn blàa mɛrɔn, à mɛrɔn ! À bàu kwey rèè mɛnɛnmà, è bà Sùtana ɲan gè kaatsià sapɛ mɛnɛnmà. Kɛ̀yn niì reè ko shu nìì reè daɔn ci è nooŋnà, yè bà xɔ mòdzian mà, à bàu twɛy sa mɛnɛnmà. 3 Tɔ fau, kàtsu è re ɲànmɔ̀ɔ̀be ɲaɔ̀n mììngeè siun kun neè mòdzian sapɛ ra, y'à mìn. Dzɔ̀nxɔɔ̀ tsɛ màsa reè ɲànmɔ̀ɔ̀bee fau à ka, dzɔ̀nxɔɔ̀ tsɛ duru fa reè yè bà gètsi ì à re gè wùù reè giribee kamà.»

4 Àwà, min vu kpɛrɛ myɛ̀n è bo jìrànxɔ rɔ̀n kɔn, tɔ dziàn ci: «N ne mòdzin ì, ye bo Babilɔnìn, à re gooɲaan doùn à mà nà e ba e tɛy, à tàr'la gooɲaan neè yè e sa tarà waa. 5 Ye tɔ̀ fa, kàtsu à re gooɲaan neè giribeu è bè wɔ fɔ jìrànxɔ rɔ̀n, Ŋaablà taa to too à re teren bɛy goo reè rè. 6 Y'a sa kun a ci à dzyee rèè kuun nìi tsuru, y'a faadziɛ tsuru fii sàrà à ɲan. À mììnge ɲaùn nìi gbiimaun yukuɔn doùn ye kɔ̀, y'a raà sa gbiiman è bà ɲan tɔ̀ mà shìɲaan jaa fii. 7 È yɛr'la blàbeò è bè wɔ kàjaa riì mà, è bà à kpàdeò ci gè wùù wuu ì ni wò re, ye tɔ̀ raa byɛnbe ko vununkɔn ji à tsɛ. Ye tɔ̀ fa à ka, kàtsu à dziàn e duùn, ci wò màsàtàànma tsùuŋnà, wo na fùnshɔ̀ùntaan waa, ci shìgoo bèe bo min, è wò tàrà. 8 Tɔ̀ kamà, gooɲaan niì reè nà à tàrà, twɛy nà nà mɛɛy à tsɛ bwèy sɔn, nìi yɛ saàn, shìgoo, ko dzuà. Sàà nà à dzu. Tɔ nà fa, kàtsu Ŋaablà riì y'à kitsia, fàan ni tɔ̀ ɲan.»

9 Àwà, dzɔ̀nxɔɔ̀ tsɛ màsa niì reè ɲànmɔ̀ɔ̀bee fau à ka, yè bà à re gè wùù reè sa dzibe bou à ka, twɛy ye na à dzua sàtsur'la tèreunma jà watsi riì bwèy, è nà gɛɛy, yè e ɲiɛ̀ màbaàn taamaŋununbeè rè à kamà. 10 Byɛnbe niì ni à tsɛ, è shiumaà kamà tɔ̀ jɔɔn, è nà e tsiì jeenà, yè dziàn ci: «Nèe gooɲaan, nèe gooɲaan dɛ, Bablilɔnìn blàa, fàan ni wo rìi ɲàn, watsi soo basɔùn kòrou wo raa kitsia goo rèè rà kɛ̀ !»

11 Dzɔ̀nxɔɔ̀ tsɛ duru fa reè sa gɛɛ, è taama yè bà ŋunun à kamà, kàtsu mòò na è re gɔɔrage rèè fìa è suun dɛ. 12 Twɛy gɔɔrage rèè rìì siin: sɛn'na, ko warifyɛɛ, ko sɛnuma ge kpàxɔù rèè, ko fyɛɛdzinma ge rèè, ko fuà jìsì vyaa, ko vyafa xe kpaxɔɔ̀, ko vyafa kun kpɛrɛ ì, ko wushunaàn gɔɔ̀ kuan sapɛ, ko sɔ̀ɔ̀n ɲiàn ka gè o ge faɔ̀, ko gɔ̀ɔ wùù kpaxɔɔ̀ ka gè o ge faɔ̀, dànɲaan, ko myɛ̀ɛ̀n tsia, ko kpààmà ge kpàxɔù rìi kir'là maraburu, twɛy ka gè o ge faɔ̀, 13 ko nange rìi kir'là kanɛli, ko nange kpɛrɛkuru ì, ko ɲinin kinin dziù rèè, ko mà yɛɛ gè fama niì kir'là miiri, ko wushunaà, ko ɛ̀rɛnzhɛ̀ndzìn yua mììngeè, ko ɲin'na ko fa wùɔ, ko shìmàn kaatsi sɔn, ko dzwɛka kun bla reè, ko sàà rèè, ko shù rèè, ko kaa faa vwɛ̀ɛ̀yràge rèè, ko jòn nèè. Twɛy gè gɔɔra rèè sapɛ. 14 È duru fa reè yè dziàn ci: «Gè nìì reè sapɛ na ni wo xɔɔn tsɛ, twɛy sapɛ gereun, è dàn yè gbànbe wo ra. Nàfòrò gee, ko gè wùù wuɔ sapɛ fìrì bou wo mà. È pɛn fa sèè tàrà dɛ fyeu.» 15 Nìì reè twɛy gè rèè duru faa, yè bà baɔ̀ gètsi à kamà, twɛy sa shiumaà kamà à re byɛnbee jɔɔn, è nà e tsii jeenà, yè gɛɛ, è taama ŋununbeuma. 16 Yè bà dziàn ci: «Nèe gooɲaan, nèe gooɲaan dɛ ! Wɔ̀ blà riì mà na wɔɔ ko jìsì fuà vyaà, ko vya xe kpaxɔu wùùruɔ̀, ko vya kpàxɔù kun kpɛrɛ ì ka, à min niì sapɛ yeè bà sɛnu, ko sɛnuma ge kpàxɔù ì, ko fyɛɛdzinma ge kpàxɔù, 17 watsi soo doùn, tɔ̀ nàfòrò gee rìì sapɛ barauma yɛ kɛ !»

Tà doùn, konkoron vwɛɛy neè sapɛ, ko nìì reè sapɛ bèe gàne ko gàne kòòyua tsɛ, ko konkor'na doùn faagoo fa reè, ko kòòyua tsɛ faagoofabaà sapɛ, yè e tsiì jeenà. 18 À dzuà sàtsur'la jàkɔɔn è re, yè gɛɛ boò, yè dziàn ci: «Wɔ̀ kɛ̀n na nèe wɔ̀ blà ree boò ?» 19 Tɔ̀un, yè kpankpaàn fù jia e kuùn, yè e vu boò fààn na, yè gɛɛ, è taama ŋununbeuma yè dziàn ci: «Nèe gooɲaan ! Nèe gooɲaan dɛ ! Wɔ̀ blà riì rè nàforo baraka ɲan, yuà tsɛ konkorontsi rèè sapɛ bàu gètsi, tɔ̀ rii barauma yɛ watsi soo doùn nèe tsuru kɛ̀ ! 20 Jìrànxɔɔ̀, a taama dzibe ! Ŋaa rè mòdzin neè, ko kɛɛradzin neè, ko Ŋaa re kɛɛra reè, e sa yeè e taama dzibe ! Ye taama dzibe, kàtsu Ŋaabla kitsia kùnuun à tsɛ, è tɔ̀ ka ye tsìì sàrà à ɲan.

21 Àwà, mɛ̀rɛ̀kɛ barakama sɔn yeè zhikpaa tsuru kpàà brisi sɔn ɲansen tɔ̀un, à y'à maa kòòyu rɔn, è dzin ci: «Nèe fau'n kur'lee ra, Babilɔnìn wɔ̀ blàa sa nà maa dɔn bè tɔ̀ rii tsuru jaa soo, jaadzin fa ɲɛn à mà dɛ. 22 Babilɔnìn, mòò fa dààn bèn vu ì myɛ̀n wo re mɔn dɛ, mòò fa beyn fa vu ì myɛ̀n wo re mɔn dɛ, mòò fa gwɛ̀yn fyɛ̀ vu ì myɛ̀n dɛ, mòò to fa vuru fyɛ vu ì myɛ̀n dɛ. Sirafaagoofabaa fa ja wo re mɔn dɛ, mòò to fa gè zhi vu myɛ̀n wo re mɔn dɛ. 23 Fìtsìnà vyee deuma fa jà wo re mɔn dɛ, mòò to fa kɔnɲɔn kpiri ko e re kɔnɲɔn taan vu myɛ̀n wo re mɔn dɛ. È ɲɛn à tsɛ, wo re duru fa reè rìì na dzɔ̀nxɔɔ̀ sapɛ tsɛ mòdzin bla reè, wo to dzɔ̀nxɔɔ̀ tsɛ kuan sapɛ san fìriu ko a re tɔ̀ gòò goo reè ka.» 24 Kɛɛra reè, ko Ŋaablà re mòdzìn neè, ko nìì reè sapɛ vuu dzɔ̀nxɔɔ̀ tsɛ, twɛy sapɛ tsiɛn jàu à re mɔ̀n.