Ɲànmɔ̀ɔ̀taan blàa raa kitsia goo rèè
17
1 Àyìwà, yukuun ɲɛɛ̀nuàn na ni mɛ̀rɛ̀kɛ ɲɛ̀ɛ̀nun nìì reè suun, twɛy soo yeè nà, è nà gooma mun ka. À ci: «Nà, ɲànmɔ̀ɔ̀taan blà riì tsùuŋnà yu brìsi ì kùùn, tɔ̀ raa kitsia goo rèè nà kun nìi tsuru, mun nà tɔ̀ kpàdè wo ra. 2 Dzɔ̀nxɔɔ̀ tsɛ màsa reè ɲànmɔ̀ɔ̀bee fau à ka, dzɔ̀nxɔɔ̀ tsɛ mòdzian sa jaara yeè xè à ka ɲànmɔ̀ɔ̀bee rè, a ci mììnge mòò riì kuɔn.3 Àwà, mɛ̀rɛ̀kɛ rèe yè bè mun ka n akir'là ɲàn, jènjàà kor'nà gàne sɔn ɲan. Min tàan sɔn tsuuŋma jà mɔ̀n kparan sɔn tsɛ, tɔ ni xèù, kùngɔ ɲɛ̀ɛ̀nun, ko bin tsyeùn ni à re, Ŋaablà tsoo bara goòmà rèè yè bà sɛbɛɔ̀n à min niì sapɛ. 4 Vya xe kpaxɔu wuùruùn ni tààn rèe vu ra, à mà yè bà wɔɔ sɛn'na, ko sɛnuma ge kpàxɔù rèè, ko fyɛɛdzinma ge kpàxɔù rèè ka. Yukuun sɛnuma ni à suun, tɔ tsyɛɔ̀n Ŋaablà cɛn goo rèè, ko à yɛ̀r'la rè ɲànmɔ̀ɔ̀bee noo reè rà. 5 Tsoo sɔn na sɛbɛɔ̀n à ten na, nìi gòndo, è bà yɛ ci: «Babilɔnìn blàa, ɲànmɔ̀ɔ̀taan rèè, ko dzɔ̀nxɔɔ̀ tsɛ Ŋaablà cɛn goo rèè naà.» 6 Min tàan rèe jà, à Ŋaablà re mòdzìn neè, ko Yesù shɛɛrɛ rèè tsìɛn ka e cɛɔn, fɔ à jaara yeè bè xèe dɔ̀ɔ̀kùnkɔɔn tsuru. M'a jàu tà tsuru min niì, è ji mun dzii tsɛ fɔ è bè geren. 7 Mɛ̀rɛ̀kɛɛ̀ yè dzin mun na ci: «Feera è bà jiɔ wo dzii tsɛ ? Mun nà tàan rèe re gòndoo kpàdè wo ra, kpar'niì y'à seòn, è bà kùngɔ ɲɛ̀ɛ̀nun ko bin tsyeùn, min tɔ̀ re gòndoo kpàdè wo ra. 8 Wo kpar'niì jàu, à na ni, ŋà à na ni dɛ. À nà nà tèyn bo kɔ̀ɔ̀ tsun gbloùntòò doùn, è bè e barama nɔ̀n. Tɔ̀un, mòdzin niì reè ni dzɔ̀nxɔɔ̀ tsɛ, è tsoo na sɛbɛɔ̀n Ŋaablà re jaamabee sɛbɛɛn doùn waa, è sen fɔ dziɲaan jɔ̀n bwey, twɛy nà kpar'nee jà, è ji è dzii tsɛ. À nà ji è dzii tsɛ, kàtsu à na ni, ŋà à na ni dɛ, à to nà sèè jà kɔn yeu.
9 Àwà, fɔ akiri yè bà ni a re mìin, nìi goo ɲan gaa. Kùngɔ ɲɛ̀ɛ̀nuàn, tɔ jèn ɲɛ̀ɛ̀nun nì, taàn tsùuŋnà nìì reè tsɛ, è bà màsa ɲɛɛ̀nun sa. 10 Twɛy màsa ɲɛɛ̀nuàn ɲàn, nùàn mɛrɔn, soo ni, soo na na ŋe waa. Tɔ̀ ye na nà, à nà watsi dɛɛnin bàsɔùn nì fa. 11 Kpar'niì na ni, à to na ni dɛ, tɔ màsa reè ŋaalona, à sa yeè bà daɔn ɲɛ̀ɛ̀nun nèè ɲàn. Tɔ bèe e barama nɔ̀n nì.
12 Wo bin tsyeùn nìì reè jàu, tɔ màsa tsyeùn nì, nìì reè na màsàbee dzii kun ŋe waa. Ŋà, màsàbee dzi nà sìn è ra, yè watsi soo basɔùn fa màsàbee rà ko kpar'na ka. 13 È sapɛ kɛsɛmàà soo, nìi yɛ, yè e re dzibaabee ko e re fàan sìn kpar'na nà. 14 Twɛy ko sààtòmòìriɛ nà kaà fa, sààtòmòìriɛ to nà dzi è ra, kàtsu tɔ tsìfa rèè raa Tsìfaà, è bà màsa reè raa Màsaa. À re mòdzin kiriuma rèè, ko à jaara modzìn nèè, ko à ka vusootsi rèè rìì nà dzi è ra esire.
15 Tà shɔ̀ùn, mɛ̀rɛ̀kɛɛ̀ yè dzin mun na ci: «Wo yu nìì reè jàu, ɲànmɔ̀ɔ̀taàn yè bà tsùuŋnà è kùùn, tɔ jàmàan rèè mòdzin neè, ko jàmàkur'lèè, ko kun neè mòdzin neè, ko kungoòmà rèè rìì. 16 Wo bin tyeùn nìì reè jau, twɛy ko kpar'na nà ɲànmɔ̀ɔ̀taàn kɔn, y'à mà gee sapɛ bo à ra, y'à màxɔ̀ɔ̀ma to. È nà à shuà ɲɔn, y'à dzyee toumaà dzu kpaan sa rɔn. 17 Àwà, Ŋaablà yeè e saɔ faa ŋɛ̀nɛ̀ɲan jiu è ɲan, nìi yɛ yè dzyèè soo, yè e re màsàbee fàan sìn kpar'na nà, fɔ Ŋaablà re gooma reè yè bè bo e shi tsɛ. 18 Wo tàan nìi jàu, tɔ wɔ̀ blà ree rìì, nìi tsùuŋnà dzɔ̀nxɔɔ̀ tsɛ màsa reè sapɛ kuùn màsàbee rà.»