Ŋaablà re vununtaà yukuun ɲɛɛ̀nun nèè
16
1 Àyìwà, tà shɔ̀ùn, min gooma vu blà sɔn myɛn è bo Ŋaablà re gbà blàa doùn, è bà dziàn mɛ̀rɛ̀kɛ ɲɛ̀ɛ̀nuàn nà ci: «Ŋaablà re vununtaà ni yukuun ɲɛɛ̀nun nìi doùn, ye bè twɛy ɲankere dzɔ̀nxɔɔ̀ tsɛ !»2 Mɛ̀rɛ̀kɛɛ̀ jɔ̀naà yè bè tɔ̀un, è re yukuɔn ɲankere dzɔ̀nxɔɔ̀ tsɛ. Tɔ̀ faumaà, kpar'na tàànmàshɛn ni nìì reè rà, yè bà à ɲɛɛ̀n blàbee, ɲuun ɲan ɲaùn yè bo twɛy sapɛ ra.
3 Mɛ̀rɛ̀kɛɛ̀ fiiraa yè e raa yukuɔn ɲankere ji kòòyua tsɛ. Kòòyua sapɛ yeè bà tsììn, a ci mòdzin saunma raa. Kòòyu rɔn jaama gee sapɛ yeè san.
4 Mɛ̀rɛ̀kɛɛ̀ zhììgìraa yè bè e raa yukuɔn ɲankere ba rèè, ko donkungɔ reè tsɛ. Twɛy yè bà tsììn. 5 Tɔ̀un, min yu rèè kùùn mɛ̀rɛ̀kɛɛ̀ vu myɛ̀n, tɔ dziàn Ŋaablà ra ci: «Wo rìi ni, wo yè bà na ni, wo tereòn. Wo Ŋaablà fɛnɛ, kàtsu wo twɛy goo rèè kitsi kunuun e fau'n kur'la. 6 Mòdzian wo re mòdzìn neè ko kɛɛra reè tsìɛn kon jiu, wo sa to tsìɛn sìun è ra y'à mìn. Tɔ wù e ka !» 7 Tɔ̀un, min vu sɔn myɛn bo saakabomaà nà, tɔ dziàn ci: «Ɔ̀ɔn, Tsìfaà, Dzitsi Ŋaablà, wo re kitsia sapɛ sààben, yè bà tereòn.»
8 Tà shɔ̀ùn, mɛ̀rɛ̀kɛɛ̀ nààlènaa yè e raa yukuɔn ɲankere ji bwèè tsɛ. Fààn yeè sìn bwèè ra tɔ̀un, è mòdzian dzu ko e ŋɔɔ̀n ka a ci sà. 9 Tà doùn, bwèy ŋɔɔn yè mòdzian dzu cɛyn, è bè wɔ, yè Ŋaablà tsoo bar'la, dzi ni tɔ̀ niì rè twɛy gooɲaan neè tsɛ. È na e tsiì yè nimisa, yè làkere dɔn e re jaamabee doùn, y'à nɔɔrɔɔ̀ kpàdè waa.
10 Mɛ̀rɛ̀kɛɛ̀ nùnaa yè e raa yukuɔn ɲankere ji kpar'na rè màsà gbaaniɛn tsɛ. À re màsàbee gàneè sapɛ yeè bà tsitsiì brìsi, è bè wɔ fɔ mòdzian yè e ɲi'un taa ɲìnìnbee rè. 11 Yè jìrànxɔ rɔ̀n Ŋaablà tsoo bara e re ɲìnìnbe reè ko e re ɲuun neè kamà, ŋà tɔ̀ pɛn na à to yè nimisa, yè sèè bo e faadzii ɲaan neè kpɛyn waa.
12 Àwà, ba blà riì kir'là ci Efaratsì, mɛ̀rɛ̀kɛɛ̀ tsùnmɛ̀naà yè e raa yukuɔn ɲankere ji tɔ̀ tsɛ. Tɔ̀ yeè gɔ̀rɔ̀ bo mɔn, gè riì ni à to, kir'la kèrè màsa reè dɔ̀n shià yè lamɔnɔ̀n tsùù. 13 Tà shɔ̀ùn, min kwey zhiigi ja, twɛy boo dzwɛfaànma ì rè. Soo bou kparan ɲaan dzu, soo yè bo kpar'na soo dzu, soo yè bo kɛɛra doodebaà dzu. 14 Twɛy Sùtan'ne kwey ì, yè bà kabagoo goo reè faa. È bèe dzɔ̀nxɔɔ̀ tsɛ màsa reè sapɛ gane ɲan, yè bà ni è ladzyeè kaà kamà, tɔ̀ niì nà fa Dzitsi Ŋaablà re jisee blaa sii sèè. 15 Tsìfaà ci: «Mun nàkɔɔn siin nèe a ci shɔn ! Mòò riì nà to e jaa ra, è re vya rèè màrà, à mà nà to jìì e dzun xɔ ra, à seeymàà yè jà waa, tɔ̀ raa wùbeu.» 16 Àwà, twɛy kwey rèè yè màsa reè ladzyeè gàne sɔn ɲan, tɔ kir'là ci Arimagedɔn, Dzyèèsìbee mòdzin neè rè kun goòmàà ɲàn.
17 Tà shɔ̀ùn, mɛ̀rɛ̀kɛɛ̀ ɲɛ̀ɛ̀nùnaa yè e raa yukuɔn ɲankere ji fyɛɛn tsɛ. Tɔ̀un, gooma vu sɔn yeè bo fààn na màsà gbaaniɛn tɛyn, Ŋaablà re gbà blàa doùn, tɔ̀ yeè dzin ci: «À fa dou nì !» 18 Tà doùn, ŋaà yè myɛ̀ɛ̀n, gooma vu ì yè boò, ŋaà yè sɛ̀ɛ, dzɔ̀nxɔ̀ɔ̀mà kpinin bla yeè fù, fɔ mòdzin yeè bà ni dzɔ̀nxɔɔ̀ tsɛ, tɔ̀ dzɔ̀nxɔ̀ɔ̀mà kpin'na tsuru na fa ja ŋe fyeu. 19 Wɔ̀ blàa yè ci, è tara tarama zhììgi, kun dzyee reè rè wɔ̀ rèè sa yeè mɛɛy. Ŋaablà taa yeè to Babilɔnìn blàa rè tɔ̀un, à yè e re vununta brìsià yukuɔn mììngeè sìn à ra, à y'à mìn. 20 Kòòyua fi dzɔ̀nxɔ̀ gane reè sapɛ yeè fìrì bo mɔn, jaadzin na ɲɛn jèn nèè pɛn mà dɛ. 21 Sankaamadzin bla bla ì yè boò jìrànxɔ rɔ̀n, yè mɛɛ̀ mòdzian tsɛ, è na gè vùnbè san. È bè wɔ, mòdzian yè Ŋaablà tsoo bara goòmà rèè dèe sankaamadzian raa gooɲaan kamà, kàtsu tɔ̀ gooɲaan si tsiu.