Kpar'niì bou kòòyua ɲàn, tɔ̀ raa goò
13
1 Àyìwà tà shɔ̀ùn kɔn, min kparan sɔn bokɔɔn ja kòòyu rɔn. Kùngɔ ɲɛ̀ɛ̀nun ni à re, ko bin tsyeùn. Màsà bàànflarii tsyeùn ni bin nèè tsɛ, Ŋaablà tsoo bara goòmà ì yè bà sɛbɛɔ̀n kùngɔ rèè tsɛ. 2 Mun tɔ̀ kpar'niì jàu, tɔ̀ na boo sin ne. À sàn nèè ni kparan bla raa tsuru, à dziɛ̀ yè bà ni jɛ̀rɛ̀ dzii tsuru. Kparan ɲaan yè e re dziibaabee sìn à ra, è re màsà gbaaniɛn sìn à ra, ko fààn brisi. 3 Mun y'à kùngɔ rèè soo ja tɔ mɛɲɛunà, è bè wɔ a ci à ni san. Ŋà tɔ̀ mɛ̀ɲɛ̀n dziikɔɔ riì na gaa wɔ à san mà, tɔ̀ yeè cɛrɛmabe. Tɔ̀ goò yè ji dzɔ̀nxɔɔ̀ tsɛ mòdzian sapɛ dzii tsɛ, yè e gban kpar'na nà. 4 Tɔ̀un, yè kparan ɲaan blàbe, kàtsu à fààn siun tɔ̀ kpar'na nà. Yè kpar'nee sa blabe, yè dzin ci: «Tsì rii ni a ci kpar'nee tsuru, è bà dzia kaà fa à ka ?»5 Àwà dzii yè sìn kpar'nee ra, à y'à ka yɛ̀rɛ̀blàbè goòmà rèè, ko Ŋaablà tsoo bara goòmà rèè dèe. Dzi yeè sìn à ra, à nà dzi nìi ka goo ì fa kuu dzyèè ko dzin fii doùn. 6 È dzu san tɔ̀un, è Ŋaablà ɲanfyɛnbee, à y'à tsoo bar'la, à y'à tsùùmaà gàneè ɲɛ̀ɛn, ko nìì reè ni jìrànxɔɔ̀ doùn. 7 Dzi yeè sìn à ra, è bà ni kaa fa ko Ŋaablà re mòdzìn neè ka, è dzi è ra. Dzi yeè sìn à ra tsua sapɛ modzin ì tsɛ, jàmàan rèè sapɛ modzin ì, kungoòmà rèè sapɛ modzin ì, ko kuan sapɛ modzin ì. 8 Dzɔ̀nxɔɔ̀ tsɛ mòdzian sapɛ nà à blàbe. Sààtòmòìrii riì bàu saaka, nìì reè tsoo sɛbɛɔ̀n tɔ̀ re jaamabee sɛbɛɛn doùn fɔ dziɲaan jɔ̀n bwey, twɛy bàsɔùn nì fa à blàbe waa.
9 Toro ì ye ba ni mòò riì rè è bà è ka myɛ̀yn faa, è toro wɔ cɛyn, à y'à myɛ̀n ! 10 Nìi ye ba kun bèe bà jòn, tɔ nà kun bè bà jòn. Nìì to ye ba nà vu bàmunun ka, tɔ nà vu bàmunun ka. Tɔ nìi kpàdèe, tɔ̀ rii yɛ Ŋaa re mòdzìn neè yè e mɔnɲɔn, yè to ɲɛynaà tsɛ.
Kpar'niì bou dzɔ̀nxɔɔ̀ ɲàn, tɔ̀ raa goò
11 Àwà, tà shɔ̀ùn, min kparan kpɛrɛ bokɔɔn ja dzɔ̀nxɔɔ̀ ɲàn kɔn. Bin fii ni à re a ci sààtòmòìrii raa, è bà goomaa a ci kparan ɲaan. 12 Kparan jɔnaà jaa ra, à na tɔ̀ raa dzia ka goò sapɛ dzyeèma faa. Mɛ̀ɲɛ̀n dziikɔɔ riì na gaa tɔ̀ kparan jɔnaà vu, è bà cɛrɛmabeu, à y'à to dzɔ̀nxɔɔ̀ tsɛ mòdzian sapɛ yeè tɔ̀ blàbe. 13 À na tàànmàshɛn kabagooma bla bla reè faa, fɔ è bè wɔ è sàà jàà bo naà jiran nɔ̀n, è nà jia dzɔ̀nxɔɔ̀ tsɛ mòdzian jaa ra. 14 Dzi riì sìun à ra è bà tɔ̀ ka kabagoo goo reè faa kparan jɔnaà jaa ra, à tɔ̀ ka dzɔ̀nxɔɔ̀ tsɛ mòdzian sàn fìriu. È dzin è ra, ci kpar'niì mɛ̀ɲɛun bàmun'nà ka à to na san waa, ci yè tɔ̀ ɲɛyn lamɔnɔ̀n. 15 Dzi yeè sìn kparan fiiraa rà tɔ̀un, è tɔ̀ ka xɔn wɔ kparan jɔnaà ɲɛyn nèe ra, è bà gè jaama è gooma. Nìì reè sapɛ nà to à blàbe bɛy, è bà ni à to twɛy yè vu. 16 Kparan fiira ree y'à bà mòdzian sapɛ ma fààn, ci tàànmàshɛn yeè ji è sirama sia, tàmafa è teen rà. Mòdzin kiɲaanin sen ɲɛn mòdzin bla tsɛ, gètsi sen ɲɛn gbakɔɔn tsɛ, xɔrɔn sen ɲɛn jòn tsɛ. 17 E bà ni dzi fìì tàmafa gɔi fa, fɔ tɔ̀ tàànmàshɛɛn yè bà ni a ra, tɔ̀ niì y'à tsoò, tàmafa tsoo rèe dɛyn dziɛ. 18 Nèe ɲan, fɔ e bà akiribla. Mòò riì akiri dzi, tɔ dzia kpar'na rè dɛyn dzii ree jàtsìkun fa, kàtsu à dɛyn dzii ree kòroò mòò rìì tsoo ka, nìi yɛ càànmoò tsùmɛn ko mùey ko tsùmɛn.