Sààtòmòìriɛ ko e kpɛyn jàmaà raa goò
14
1 Àyìwà, mun siin fau kɔn, min sààtòmòìriɛ tsìiŋma jà Tsiɲɔn jèèn tsɛ. Mòkun gbaakoron càànmoò ko gbaa dzyèè ko gbaa nààlen ni ko à ka. À tsoò ko à Fàà tsoò yè bà sɛbɛɔ̀n twɛy ten na. 2 Tɔ̀un, min vu sɔn myɛn è bo jìrànxɔ rɔ̀n, tɔ ni a ci yu blà tsuuru vu, ko ŋaa sɛɛy vu blà. Vu rèe ni a ci dààn ben neè rè dààn ben vu. 3 Mòdzin nee reè na ni màsà gbaaniɛn, ko gè jaama naàlen nèè, ko bɔɔ rèè jaaterema, yè bà ye yeu cee. Mòò pɛn naà dzia ye ree mìnàn à y'à cèè, fɔ mòkun gbaakoron càànmoò, ko gbaa dzyèè, ko gbaa nààlen nèe rèè, twɛy nìì reè kùngɔ màbou kpàxɔu rà dzɔ̀nxɔɔ̀ tsɛ. 4 Àwà, twɛy mòdzin neè na e yɛrɛ noo taan ì ka waa, è tou tààn tɔ̀ bɛy. Sààtòmòìriɛ bèe min o min, è gbaɔn à kpɛyn. Ye rìì bàu kùngɔ màbouma jɔ̀na rèè mòdzian ɲàn, yè bà Ŋaablà ko Sààtòmòìriɛ raa. 5 Doò na bo jà è dzu, jààma to na ni è ra.Mɛ̀rɛ̀kɛ zhììgia raa kùnàgoo
6 Tà shɔ̀ùn, min mɛ̀rɛ̀kɛ kpɛrɛ jà kɔn, tɔ̀ yeè e tsyɛɔn jiràn nɔ̀n mɔn sèynfi, kùnàgoo dziù dò bɛy ni à suun, è bà tɔ̀ dè beè dzɔ̀nxɔɔ̀ tsɛ mòdzian nà. Kuan sapɛ modzin, tsua sapɛ modzin, kungoòmàà sapɛ modzin, ko jàmàan rèè sapɛ modzin. 7 À na e vu rɔ̀n seòn è dziàn fààn na ci: «Ye shi Ŋaablà jɔɔn, y'a nɔɔrɔɔ̀ kpàdè. À re kitsia watsi wɔu, y'a blàbe, wò rii ŋaablaxɔɔ̀ ɲɛun, è dzɔ̀nxɔɔ̀ ɲɛn, ko kòòyua, ko donkungɔ reè.»
8 Àwà, mɛ̀rɛ̀kɛɛ̀ fiira yeè e gban jɔ̀naà kpɛyn, è bà dziàn ci: «Babilɔnìn wɔ̀ blàa mɛrɔn, à mɛrɔn, wò riì yè e re kɛ̀kɛ̀ɛ̀ybe ɲaɔ̀n mììngeè sìun kun dzyee reè sapɛ ra, y'à mìn.»
9 Àwà, mɛ̀rɛ̀kɛ rèè zhììgìra kpɛrɛ yè e gban twɛy kpɛyn, è bà dziàn fààn na ci: «Mòò riì nà kpar'na ko e ɲɛɛ̀n blàbe, à y'à to tàànmàshɛn yeè ji à ten na, tàmafa à si ra, 10 tɔ̀ sa nà Ŋaablà re vununta ɲaɔ̀n mììngeè mìn, nìi tèrèke jiɔ̀ à re vununtaà yukuɔn doùn. À tsìfa nà byɛn sàà ko gìrìbià ɲàn Ŋaablà re mɛ̀rɛ̀kɛ reè ko Sààtòmòìriɛ jaa ra. 11 È byɛɛn sàà sàtsur'la nà tèyn tsùù watsi sen ɲɛn watsi tsɛ. Twɛy nìì reè kpar'na ko e ɲɛɛ̀n blàbeu, à tsoò tààmàshɛɛn yè bà jiu è ra, feèn ko bwèè sa, ɲànwɔ na ni è mà waa.» 12 Nèe nìi kpàdèe mìin, tɔ̀ rii yɛ Ŋaablà re mòdzin neè yè e mɔnɲɔn. Ɔ̀ɔn, twɛy nìì reè Ŋaablà dzugooma xɔu rèè shi jiɛ, yè bà ɲɛɔ̀n Yesù rà.
13 Tà shɔ̀ùn, min gooma vu sɔn myɛn è bo fɔ jìrànxɔɔ̀ doùn, tɔ dziàn ci: «À sɛbɛn ci: Nìì reè saàn yè bà ɲɛɔ̀n Tsìfaà rà, fɔ dòònun, twɛy raa wùbeu.» Ŋaablà re Dzia ci: «Ɔ̀ɔn, è nà e ɲanwɔ yè bo e re byɛnbee ɲàn, kàtsu è faadziɛ ni è kpɛyn.»
Kììnàtsia raa goò
14 Àwà, tà shɔ̀ùn, min ŋaamunun fyɛ sɔn ja. Tɔ̀ ŋaamun'na tsɛ, adamàdzin bosi mòdzin tsùuŋnà. Màsà baanfla sɛnuma ni à kùùn, kììna dzii dziù yè bà kuɔn à suun. 15 Mɛ̀rɛ̀kɛ soo kpɛrɛ yè bo Ŋaablà re gbà blàa doùn, tɔ dziàn fààn na mun'na tsɛ tsùùbaà rà ci: «Nà a re kììnaa ka, e nà shìmaan tsyɛ, kàtsu tɔ̀ watsi wɔu. Dzɔ̀nxɔɔ̀ shìmaan bɔɔ dziu, à wɔu tsyɛ.» 16 Tɔ̀un, mun'na tsɛ tsùùbaà yè e re kììnaa dɔ̀n bo dzɔ̀nxɔɔ̀ tsɛ, à y'à shìmaan gaa.
17 Àwà, mɛ̀rɛ̀kɛ yè bo Ŋaablà re gbà blàa doùn kɔn, kììna dzii dziù kuɔn tɔ̀ sa suun. 18 Kpɛrɛ sa yeè bo saakabomaà nà kɔn, dzi ni tɔ̀ re sàà tsɛ, è bà dziàn fààn na kììnà dzìì dzìùtsià rà ci: «Nà a re kììna dzii dziɔ̀ ka, e dzɔ̀nxɔɔ̀ ɛ̀rɛ̀nzhɛ̀ndzìn tan nèè tsyɛ, kàtsu è mɔ̀un.» 19 Mɛ̀rɛ̀kɛɛ̀ yè e re kììnaa dɔ̀n bo tɔ̀un dzɔ̀nxɔɔ̀ tsɛ, à y'à ɛ̀rɛ̀nzhɛ̀ndzìn tan nèè tsyɛ, à yè è ji ɛ̀rɛ̀zhɛ̀n yua vùr'la gè blàa doùn, nìi Ŋaablà re vunun taà. 20 Ɛ̀rɛ̀nzhɛ̀ndzian yè tsyɛɛnma tɔ̀un ɛ̀rɛ̀nzhɛ̀n yù vur'la gèè doùn wɔ̀ɔ̀ bònè. À yuà yè bo tsììn è bìì be fɔ cilo càànmoò zhììgi tsuru, è bà tèyn wɔɔ fɔ shù rèè kààfìrì shima nɔ̀n.