Taàn ko kparan ɲaan raa goò
12
1 Àyìwà, tà shɔ̀ùn, tàànmàshɛn bla yeè kpàdè jìrànxɔɔ̀ doùn. Tɔ̀ na tàan sɔn, bwèè y'à mà miniɔ̀n vya tsuru, kuɔ̀ ni à sàn dzuun, swɛyn teeŋ fii yè bà ni à kùùn, a ci màsà baanfla. 2 À na fwɛynma, à doòn yè bà na à kuɔn. Tɔ̀ ɲìnìnbee ko à byɛnbee na à gɛɛ.3 Tà shɔ̀ùn kɔn, tàànmàshɛn kpɛrɛ yè e kpadè jìrànxɔɔ̀ doùn. Tɔ̀ na gbìrì bosi kparan ɲan bla sɔn, è bà xeò a ci sà. Kùngɔ ɲɛ̀ɛ̀nun na ni à re, ko bin tsyeùn. Màsà baanflarii na ni kùngɔ ɲɛ̀ɛ̀nuàn soo soo sapɛ tsɛ. 4 À kplaa yè jiran nɔ̀n swɛyn nèè tara zhiigia tara soo fla bo mɔn, è maa dzɔ̀nxɔɔ̀ tsɛ. Tɔ̀un, kparan ɲaan yè bè e tsiì taàn donkunkɔɔn jaaterema, à y'à dziàn shù tsùù, à ye kere min niì, wò y'a ɲɔn bo mɔn. 5 Taàn yè kere dzin kpiri, dzin nìi nà kuan sapɛ modzin marà ko myɛ̀ɛ̀nbere ka. Dziɛ̀n kereu min niì, è sen fu dɔ̀n be Ŋaablà re, è bè tsùù à tɛyn e re màsà gbaaniɛn tsɛ. 6 Taàn yè vwɛ̀ɛ̀y dɔn bè jènjàà kor'nà doùn Ŋaablà na gàne sɔn lamɔ̀nɔunà à re mɔn, à nà bè to min niì, y'à dziira gaa è bè tàrà fɔ bwèy gbaa soo ko càànmoò fii, ko mùey.
7 Àwà, kaa yè fù jìrànxɔɔ̀ doùn tɔ̀un. Mɛ̀rɛ̀kɛ Mìnkayurù ko e kpɛyn mɛ̀rɛ̀kɛ rèè, twɛy na kparan ɲaan dzii kuɔn kaà rà, è bà tɔ̀ sa ko e kpɛyn mɛ̀rɛ̀kɛ rèè. 8 Ŋà, kparan ɲaan ko e kpɛyn mɛ̀rɛ̀kɛ rèè na dzi waa. È na dzi gàne tàrà, yè bà ni e tsuù jìrànxɔɔ̀ doùn dɛ. 9 Kparan ɲan blaa yè maa bo jìrànxɔɔ̀ doùn tɔ̀un, tɔ̀ niì myɛn bɔrɔɔ, è bà kir'là Sànwɔbaà ko Sùtana, nìi mòdzian sàn fìr'la dzɔ̀nxɔɔ̀ tsɛ. À ko e kpɛyn mɛ̀rɛ̀kɛ rèè sa yeè maa dzɔ̀nxɔɔ̀ tsɛ. 10 Tà shɔ̀ùn, min gooma vu brìsi sɔn myɛn è bo jìrànxɔɔ̀ doùn, tɔ dzian ci: «Dòònun ɲe re Ŋaablà yeè mùn tsi, tɔ̀ watsi wɔu. À re dzibaabee ko à re màsàbee, ko à Jaara Modzìàn rè fàan watsi yeè bà wɔu. Tɔ̀ watsi wɔu, kàtsu mùn neema reè jààkibaà kaa jàà bou jìrànxɔɔ̀ doùn. Wò rii na è jààkia feèn ko bwèè sa ɲe re Ŋaablà biìn. 11 Mùn neema reè dzi tarau à tsɛ, sààtòmòìriɛ tsìɛn baraka rɔ̀n, ko e re shɛɛrɛbee goomaa baraka rɔ̀n. È na e xɔɔn kɛ̀n yè shi saàn jɔɔn waa. 12 Tɔ̀ kamà, jìrànxɔɔ̀ ko e doùn tsùùbaa rèè, ye e taama dzibe. Ŋà dzɔ̀nxɔɔ̀ ko kòòyua, byɛnbe ye nìn, kàtsu, Sànwɔbaa jàà bèu ye re, à vunun tauma blàa. À y'à tɔ̀ watsi bɛrɛ na ni wò suun dɛ.»
13 Àwà, kparan ɲaan y'à jau wo maa jaaŋ dzɔ̀nxɔɔ̀ tsɛ min niì, tàan nìi dzin kpir'la kereu, è gban tɔ̀ kpɛyn à y'à kaà. 14 Tà doùn, bibi blaa tànman fiɛ̀ yè sìn taàn nà, è bà ni e tsɛn bè jènjàà kor'nà doùn e re gàne rɔ̀n, à dziira nà gaa min niì fɔ jii zhiigi ko tara, è bà mɛnɛɔn myɛɛn jɔɔn mɔn. 15 Myɛɛn yè yuà funtsi bo e dzu tɔ̀un taàn kpɛyn a ci bayu, tɔ̀ yeè bà ni à ɲɔn. 16 Tà doùn, dzɔ̀nxɔɔ̀ sa yeè wɔ taàn nà. Kparan ɲaan yu rìi sapɛ funtsi bou e dzu, è dzii san, è tɔ̀ sapɛ min. 17 Kparan ɲaan vunun yè ta taàn kpɛyn tɔ̀un fɔ è bè geren. È bè taàn tsua dzyee rèè kpɛyn, è kaa fa ko twɛy ka, twɛy nìì reè Ŋaablà dzugooma xɔù rèè shi jiɛ, yè bà ni Yesù rè shɛɛrɛbee tsɛ. 18 Tà shɔ̀ùn, è bè e tsiì kòòyù dziɛ rà cɛncɛɛn tsɛ.