Tàànmàshɛɛn tsunmɛɛn raa goo rèè
6
1 Ayìwà, tà shɔ̀ùn m'a jà, Sààtòmòìriɛ tàànmàshɛn ɲɛɛnun nèè jɔ̀naà warakaa. Tɔ fau min niì, min gè jaama naàlen nèè soo vu myɛ̀n, a ci ŋaa kpinin vu. À ci: «Nà !» 2 Mun siin fau tɔ̀un, min shù fyɛ sɔn ja. Mòò riì ni à tsɛ, shi ni tɔ̀ suun, màsà baanfla yeè sìn à ra. È bo dzibaa tɔ̀un, è bà ni be bà dzibaa.3 Sààtòmòìriɛ tàànmàshɛɛn fiiraa warakau watsi riì bwèy kɔn, min gè jaamaa fiiraa vu myɛ̀n ci: «Nà !» 4 Shù kpɛrɛ yè bo tɔ̀un, tɔ ni xèù. Mòò riì ni à tsɛ, dzi yeè sìn tɔ̀ ra, è bà ni jaanciàn dò bo dzɔ̀nxɔɔ̀ tsɛ, mòdzian yè e si vu tsyɛɛ. Bàmunun gbààn yeè wɔ à suun.
5 Sààtòmòìriɛ tàànmàshɛɛn zhììgìraa warakau min niì, min gè jaamaa zhììgìraa vu myɛ̀n ci: «Nà !» Mun siin fau tɔ̀un, min shù tsi sɔn ja. Mòò riì ni à tsɛ, gè gɔɔn cilo ni tɔ̀ suun. 6 Min vu sɔn myɛn gè jaama naàleèn fi a ci gooma vu, tɔ dziàn ci: «Mwɛyn cilo soo, faagoofadzin soo bwèy sɔn sàrà. Fweyn cilo zhììgi, tɔ̀ dzii soo. Ɲin'nà ko mììngeè, maà baragoò fa twɛy ɲàn waa.»
7 Àwà, sààtòmòìriɛ tàànmàshɛɛn nààlènaa warakau watsi riì bwèy, min gè jaama reè nààlènaa vu myɛ̀n ci: «Nà !» 8 Mun siin fau tɔ̀un, min shù vuntsirama sɔn ja. Mòò riì ni à tsɛ, tɔ̀ tsoo ci Saàn, fùn nèè tàà yè bà gbaɔn à kpɛyn. Dzi siɔ̀n è ra dzɔ̀nxɔɔ̀ tara naàleèn soo tsɛ, yè bàmun'nà ka vuɛ fa, ko dzuà, ko ɲìnìn ɲaùn nèè, ko kpar'neè.
9 Àwà, sààtòmòìriɛ tàànmàshɛɛn nùnaa warakau watsi riì bwèy, è nìì reè vuu Ŋaablà re goomaa ko è re shɛɛrɛbee kamà, min twɛy xɔn reè jà saakabomaà dzuun. 10 Twɛy na e vu rɔ̀n seòn, yè dziàn fààn na ci: «Mùn Tsìfa fɛnɛ, taki takià, wo nà kitsia kùnùn, w'e ɲe tsìɛn wɛyn bo fɔ watsi kɛn dzɔ̀nxɔɔ̀ mòdzian ɲàn ?» 11 Tɔ̀un, mɛ̀yɛ̀ blà fyɛ yeè sìn è soo sookɔɔn sapɛ ra, è dè è ra ci yè e mɔɲɔn dɛyn ŋe. Yè e mɔɲɔn dɛyn, fɔ è faagoofasi nìì reè ko è neemasi niì reè ni, twɛy yè bà nà vu è tsuru, yè è dzii tsyɛn, twɛy yè vu.
12 Àwà, m'a jàu sààtòmòìriɛ tàànmàshɛɛn tsùnmɛ̀naa warakau watsi riì bwèy, dzɔ̀nxɔ̀ɔ̀mà kpinin bla yeè fù, bwèè yè tsì tɔ̀un tsi tsi tsi a ci vya tsi, kuɔ̀ min niì sapɛ yeè xè gan gan gan a ci tsììn. 13 Tɔ̀un, jìrànxɔɔ̀ swɛyn nèè yè tɔrɔn dzɔ̀nxɔɔ̀ tsɛ, a ci fyɛn bla gɔ̀ɔ̀dzìn kuu yuuyuu jia dzɔn nɔ̀n nìi tsuru. 14 Ŋaablaxɔɔ̀ yè vùrù bo mɔn tɔ̀un, a ci mòo sɛbɛn min'na nìi tsuru. Jèn nèè, ko kòòyua dzɔ̀nxɔ̀ gane reè sapɛ yeè bo e shɔùn. 15 Tà doùn, dzɔ̀nxɔɔ̀ tsɛ màsa reè, ko mòdzin bla reè, ko kaa kuntsii reè, ko gètsi rèè, ko fààntsi rèè, ko mòdzian sapɛ, xɔrɔn sen ɲɛn jòn tsɛ, yè e mɛnɛn bèe kpankɔɔ reè rè, ko jènkpaa reè ɲàn. 16 Yè dziàn jèn nèè ko jènkpaa reè rà ci: «Ye mɛɛy mùn tsɛ, ye mùn mɛnɛn màsà gbaaniɛn tsɛ tssùùbaà jaakɔrɔɔ̀n ko sààtòmòìriɛ rè vununtaà jɔɔn. 17 Ɔ̀ɔn, è re vununtaà jisee blaa wɔu, tsì rii nà dzi e tsiì à y'à shù ?»