Nìì reè Ŋaablà re tàànmàshɛɛn fyɛ̀ɛ̀ tàrau
7
1 Àyìwà, tà shɔ̀ùn, min mɛ̀rɛ̀kɛ nààlen tsìiŋma jà dzɔ̀nxɔɔ̀ nɔ̀nkɔn nààleèn rà. Twɛy dziɲan nɔnkɔn nààleèn fyɛɛn sapɛ kun tsìiŋnà, fyɛn mà nà to bo dzɔ̀nxɔɔ̀ tsɛ, à mà bo kòòyua tsɛ, à to mà bo gɔ̀ɔ̀ku pɛn tsɛ. 2 Min mɛ̀rɛ̀kɛ kpɛrɛ jà kɔn, tɔ fuɔ̀ kir'la kèrè, Ŋaablà jaamaa rè tàànmàshɛn ni à suun. À shi wɔɔ mɛ̀rɛ̀kɛ nààlen nìì reè suun yè ɲaan fa dzɔ̀nxɔɔ̀ ko kòòyua sa ra, è vu rɔ̀n sen, è gooma twɛy ka fààn na. 3 À ci: «E maà ɲaan fa dzɔ̀nxɔɔ̀, ko kòòyua, ko gɔ̀ɔ̀ku rèè pɛn na, fɔ mìn na tàànmàshɛɛn fyɛ̀ɛ̀ ji do e re Ŋaablà re jòn nèè ten na watsi riì bwèy.» 4 Àwà, tàànmàshɛɛn fyɛ̀ɛ̀ jiɔ̀ nìì reè ten na, min twɛy xɛkɛ myɛ̀n. Mòkun gbaa càànmoò ko gbaa dzyèè ko gbaa nààlen. Isirayɛlidzin neè tsua sapɛ ni è ɲan. 5 Yudà raa tsua mòdzin neè, tàànmàshɛɛn fyɛ̀ɛ̀ jiu twɛy mòkun gbaa teeŋ fii ra, Ribɛ̀ɛ raa tsua, twɛy gbaa teeŋ fii, Gadzì raa tsua, gbaa teeŋ fii. 6 Asɛr'laa tsua, gbaa teeŋ fii, Nɛfital'laa tsua, gbaa teeŋ fii, Manasè raa tsua, gbaa teeŋ fii. 7 Shimɔ̀n naa tsua, gbaa teeŋ fii, Lɛvì raa tsua, gbaa teeŋ fii, Isakar'laa tsua, gbaa teeŋ fii. 8 Zabulɔnì naa tsua, gbaa teeŋ fii, Yusufù raa tsua, gbaa teeŋ fii, Bɛyamɛ̀n raa tsua, gbaa teeŋ fii. Tàànmàshɛɛn fyɛ̀ɛ̀ jiu twɛy rìì là.Nìì reè sapɛ na ni blàbee rà màsà gbaaniɛn jaaterema
9 Àwà, tà shɔ̀ùn kɔn, min jàma brìsi jà, mòò fa dzi nìì reè dan, è bà ni è dzii tsu tɔ. Kuan sapɛ modzin ì ni è ɲan, tsua sapɛ modzin ì ni, jàmàan rèè sapɛ modzin ì ni, kungoòmà rèè sapɛ modzin ì yè bà ni è ɲan. È na e tsiiŋnà màsà gbaaniɛn ko sààtòmòìriɛ jaaterema. È mɛ̀yɛ̀ blà fyɛ ì wɔɔ, shɔ fyaa ì yè bà kuɔn è suun. 10 È na sɛ̀ɛ fààn na ci: «Ɲe re Ŋaablà riì tsùuŋnà màsà gbaaniɛn tsɛ, e tsi, tɔ ni wò rii suun, ko sààtòmòìriɛ.» 11 Mɛ̀rɛ̀kɛ rèè sapɛ na e tsiiŋnà, yè màsà gbaaniɛn, ko mòòbɔɔ rèè, ko gè jaama naàleèn laguru. È yè e kunun gban ji tɔ̀un, yè e jaa rèè kuu màsà gbaaniɛn jaaterema, yè Ŋaablà blabe. 12 Yè dziàn ci: «Àmiinà ! Tsoo dzi yeè ɲɛn ɲe re Ŋaablà tsɛ, nɔɔrɔɔ̀ yè bà à raa, akiriblabeè yè bà à raa. Tswɛ̀y ye fa à re, blà yeè wɔ à ɲan. Dzibaabee yè bà à raa, fàan yè bà à raa. Tɔ̀ yeè fa watsi sen ɲɛn watsi tsɛ. Àmiinà !»
13 Àwà, bɔɔ rèè mòò sɔn yè mun tey tɔ̀un ci: «Mɛ̀yɛ̀ blà fyɛɛ yɛ nìì reè vu ra, twɛy tsi ì rìì ? È boò min ?» 14 Min dzin à ra ci: «Mun Tsìfaà, wo rìì y'à tɔ̀.» À ci mun na ci: «Nìì reè bo naɔ byɛnbe brisi rɔ̀n, yè bà e re mɛ̀yɛ bla reè fòoŋnà, y'à fyɛ Sààtòmòìriɛ tsììn nɔn, à ye rìì. 15 Tɔ̀ kamà yè bà e tsiiŋnà Ŋaablà re màsà gbaaniɛn jaaterema, ye faagoò faa à re feèn ko bwèè sa, à re gbà blàa doùn. Màsà gbaaniɛn tsɛ tsùùbaà nà e re bùù gba vyamaa kun è kùùn. 16 Dzu fa è kun dɛ, mìnoo fa è kun dɛ, bwèy ŋɔn fa è dzu dɛ, wɔ̀dzùùnta ɲaùn to fa è tàrà. 17 Tɔ nà fa, kàtsu Sààtòmòìrii riì ni màsà gbaaniɛn fi rɔn, tɔ nà bà è kplatsuubaa è kɔ̀ ɲwɛyn, è bè è ka jaamabee yuà donkungɔ ì rà. Ŋaablà to nà è jaayuà sapɛ tsɛ.»