Jacques 4

Kur'la goo ɲaan neè nàa nìi ka

1 Àwà kaa nìì reè, ko sɔ̀swɛy nìì reè ni ye ko e si fi, twɛy daàn min ? Kur'la goo ɲaan niì reè ni ye ɲan, yè bà ye sùùsuɔ̀, è na daàn mɔn nì ɔ̀ ?

2 Ye jaàn boò gè gir'le, ŋà ye na à tàr'la waa. Tɔ̀un mòdzìn vu, ko jaaɲininbe jàa ye duùn, ŋà ye gaa nìi rà, ye na dzia tɔ̀ tàrà waa. Kaà ko sɔ̀swɛɛ̀ dɔ̀ɔn ye fi, ŋà ye nìi gaa ye na à tàr'la waa, kàtsu, ye na à màfyɛ̀ɛn Ŋaablà re waa.

3 Ye kɛ̀nsɛɛn y'a màfyɛ̀n, ye na à tàr'la waa, kàtsu à màfyɛ̀ùn'n kur'la na wù waa. A màfyɛ̀n kuàn nì yɛ, ye y'à ka e dzibee goo reè jaa bo.

4 Mòdzin teren bɛy ì Ŋaablà ka, ye na à tɔ̀ ci e dziɲaan goo rèè kɛ̀n, tɔ̀ rii yɛ e Ŋaablà goo xɔbe a ma ɔ̀n ? Mòò riì sào ni wò yeè bà dziɲaan dzunwɛynsi, tɔ̀ yeè e yɛrɛ baà Ŋaablà ɲan nì.

5 À deò Ŋaablà re goomaa doùn ci: «Ŋaabla Dzi niì jiɔ̀ mùn ɲan, à gaa tɔ̀ ra nìi fa, à sào ni mùn yeè bà tɔ̀ soo pe raa.» Tɔ̀ gooma niì yɛ, y'a siɛ̀n ci à deò maana ni gbɛ ?

6 È ɲɛn tɔ̀ sapɛ tsɛ, à ɲanwùɔ mùn ka, tɔ blà fɔ è bè geren. Àwà à deò à re Goomaa doùn ci: «Nìì reè blà e yɛr'le, Ŋaabla kaa faa twɛy ka, è bà e ɲanwùɔ kpàdèe mòdzin majàaŋma rèè rà.»

7 Tɔ̀ kamà, ye koron Ŋaablà re. Nìi to Sùtana, ye e maban tɔ̀ re. Tɔ̀ ye fa, à nà vwɛ̀ɛ̀y è dan gbànbe ye ra.

8 Ye e kpɛrɛ Ŋaablà ra, à sa nà e kpɛrɛ ye ra. Ye gooɲaan fa reè, ye e si rèè fòò. Akirifiitsi rèè, ye e duùn fyɛ.

9 Y'a tɔ̀, ci ye byɛnkɔɔn ì, e taama yè ŋununbe, ye gɛyn. E re jirangoo yè e lakere ba gɛyn, e re taamadzibeè yè e lakere ba jaakɔrɔn kuun.

10 Ye e majàà Tsìfaà rè. Tɔ̀un, à nà ye ɲansen.

Moo mà kitsi kunùn e moòsi tsɛ waa

11 N neema ì, e maà e si mà ɲaan de waa. Mòò riì yè e neemasia màɲaan deè, tàmafa è kitsi kunùn à tsɛ, tɔ Ŋaablà re shi kpadèuma rèè rìì màɲaan deè, è bà kitsi kun'na è tsɛ. Wo to ye ba kitsi kun'na Ŋaablà re shi kpadèuma rèè tsɛ, tɔ̀ y'a kpàdèe, ci wo na è shi jiìbaa waa, ŋà wo yè è kitsibaa rìì.

12 Shi kpadèuma rèè tsùùbaà Ŋaablà soo pe rii, wò rii to kitsia kùn'na. Wò rii dzia mòò tsi, wò rii to dzia mòò bara. Wo do, wo tsì rii, w'e bà kitsi kun'na a moòsia tsɛ ?

Moo mà e yɛrɛ blabe waa

13 Àwà, dòònun ye toro wɔ, ye nìì reè dziàn ci: «She, tàmafa gbee, ɲe nà bè nèe wɔ̀ ree ɲan, ɲe yè bè jii soo fa mɔn, ɲe yè duru fa, ɲe yè ɲɛyn tarà.»

14 Àwà, goo rìi nà fa gbee ye tɔ̀ tɔ̀ ɔ̀ ? Ye re jaamabee ko bunun sa soo. À jàkɔɔn yɛ jaa ra, tà shɔ̀ùn, à na ni dɛ.

15 Awà sani ye tɔ̀ dè, ye dzin ci: «Mùn Tsìfaà ye e tsiì à ra, mùn jaama ye ba ni, mùn nà nèe tàmafa nèe fa.»

16 Ŋà dòònun ye e yɛrɛ deè, ye yè tɔ̀ ka e yɛrɛ blabe. Tɔ̀ yɛ̀rɛ̀blàbe nìi yɛ, tɔ̀ na wù waa.

17 Tà doùn, wo mòò riì wùɔ fa jaa tɔ̀, wo to na à faa waa, tɔ gooɲaantsii rii wo vu ra.