Hébreux 1

Sɛbɛn niì kau

Dzyèèsìbee mòdzin neè rè

Dzin kpir'liì boo Ŋaablà ɲan, tɔ blà mɛ̀rɛ̀kɛ rèè mà

1 Dan dan, Ŋaabla goomau ɲe fàbɔɔ rèè ka, è bo à re kɛɛra reè dzu. A tɔ̀ fau jaa giri, à y'à fa fau'n kuru gir'la.

2 Ŋà dòònun, nèe watsi latan nee doùn, à goomau mùn ka, è bo e Dzin Kpir'la ɲàn. Àwà, Ŋaabla gè sapɛ ɲɛun è bo wò rii ɲàn, à to gè sapɛ tsifàbe wɔɔ wò rii suun.

3 Ŋaablà blabee vyeè, tɔ wò rii, Ŋaablà to ni niu'n kur'liì rà taki, à sa ni tɔ̀ rii tsuru. À dzugooma barakamaa nì kamà, dziɲan doùn gè sapɛ ma kun tsùuŋnà. Wò rii mòdzian fɛnɛbeu gooɲaan tsiɛ yè bo è vu ra. Tɔ̀ faumaà nì shɔ̀ùn, à bèu e tsuù màsa blaa sirama si jaa rè jìrànxɔɔ̀ doùn, nìi Ŋaablà.

4 Tà tsuru, tɔ̀ Dzin Kpir'liì boo Ŋaablà ɲan, tɔ bàu ni dzii ra, è geren mɛ̀rɛ̀kɛ rèè tsɛ, kàtsu, Ŋaabla tsoo sìun à ra, nìi blà mɛ̀rɛ̀kɛ rèè raà mà peu.

5 Àwà, Ŋaabla dzin jàu mɛ̀rɛ̀kɛ rèè kɛ̀n ni nà nèe tsuru ci:

«Wo rìì mun Dzin Kpir'la,

Mun bàu wo fàà she.»

À to dzin jàu è kɛ̀n ne goo ɲan nèe tsuru kɔn ci:

«Mun nà bà à fà,

à yè bà mun dzin.»

6 Ŋà, Dzin Kpirliì boo Ŋaablà ɲan, è bà ni gè sapɛ jɔɔn, à ci e ye tɔ̀ ka na dziɲan doùn watsi riì bwèy, à dziun ci:

«Mɛ̀rɛ̀kɛ rèè sapɛ yeè e kuu à bììn, y'à blàbe.»

7 Nìi mɛ̀rɛ̀kɛ rèè, à ci twɛy raa goò ɲàn ci:

«Mɛ̀rɛ̀kɛ rèè, twɛy fyɛn tsuru kɛɛra ì mun ne, yè bà sàden tsuru faagoofadzin ì.»

8 Ŋà, à Dzin Kpir'la, à dziun tɔ̀ raa goò ɲàn ci:

«Dò na ni wo raa màsàbee mà waa Ŋaablà.

Wo màsàbee faa a re mòò rèè tsɛ ko sààben ka.

9 Goo nìi tereòn, tɔ̀ rii dzi wo ra, gooɲaan yè bà xɔ wo mà.

Tɔ̀ rii y'à to, Ŋaablà, wo re Ŋaabla wo bou e si,

wo yè bà blà a dzyeèsi rèè sapɛ ma,

tɔ̀ yeè bà taamadzibe brìsi wo re.»

10 Ŋaabla dziun kɔn ci:

«Goo rèè jɔ̀n bwey, Tsìfaà, wo rìì dzɔ̀nxɔɔ̀ ɲɛun,

ŋaablaxɔɔ̀, tɔ̀ wo sifyɛ̀.

11 Twɛy gè rèè sapɛ nà dò, ŋà wo, wo nà to tsùù a yɛrɛ tsuru kudɛyn.

È sapɛ nà bɔɔ, a ci vya bɔɔ̀ nìi tsuru.

12 Wo nà è minin, a ci moo mɛyɛ bla min'na nìi tsuru,

wo yè è ɲancinan, a ci moo vya wɔrama ɲancinaan nìi tsuru.

Ŋà nìi wo, wo nà to tsùù a yɛrɛ tsuru kudɛyn,

dò na ni wo sìà mà waa.»

13 Ŋaabla dzin jàu nòn mɛ̀rɛ̀kɛ rèè kɛ̀n na ci:

«Nà a tsuù n sirama si jaa rè,

fɔ min b'à ɲan rèè sapɛ wɔ a san dzuun.»

14 Mɛ̀rɛ̀kɛ rèè Ŋaablà re kɛɛra ì rìì, jaa na nìì reè jàa waa, yè bà ni Ŋaablà re faagoò rà. Nìì reè wù yè tsi gbee, Ŋaablà yeè è ka bèe, yè bè wɔ twɛy rà.