Pɔlì sɛbɛn niì kau
Filemɔ̀n rè
Sɛbɛɛn kaɔ nìì reè rè, ko dzwɛɛ̀
1
1 Mun Pɔlì, Yesù Kirisà rè kàsodzian ko Tsìmotè, mùn neema kpir'la, nèe ɲe re sɛbɛn, è sìn wo Filemɔ̀n nà, ɲe re kɛ̀niunmaà, ko ɲe faagoofasia. 2 È sìn mùn neema taan Afià rà, ko mùn neema kpiri Arikipè, mùn dzwɛ̀mabaà kaà doùn. È sìn ɲɛynamoo kur'là rà, nìi yè e ladzyèe wo re gbàà doùn. 3 Arì she, Ŋaablà ɲanwùɔ, ko jaanciàn, mùn Fà Ŋaablà ko mùn Tsìfa Yesù Kirisà yè twɛy sìn a ra!Pɔlì nìi dèu Filemɔ̀n rè kɛ̀nbààbee ko à re ɲɛynaà tsɛ
4 Kudɛyn mun baraka sìan n ne Ŋaablà ra, wo tsoò na fɔɔ̀n mun dzu n ne màfyɛyn nèè doùn waa. 5 È ɲɛn à tsɛ, wo re kɛ̀nbààbee ko wo re ɲɛynaà nìi boo Tsìfa Yesù ko Ŋaa re mòdzin neè kàjaa tsɛ, mun tɔ̀ myɛ̀ɛn. 6 Arì she, mùn dzyèeŋnà nìi mà, tɔ̀ niì yɛ ɲɛynaà wo ɲan, tɔ̀ yeè fààn tarà be jɔɔn, è bà saabu, wùù riì sapɛ ni mùn ɲan Kirisà kamà, tɔ̀ yeè tɔ̀ cɛyn. 7 Àwà Filemɔ̀n, wo ɲan kɛ̀nbààbee kamà, mun taama dzibeu cɛyn, min fààn tarà, è ɲɛn à tsɛ, wo baraka ɲan, n neema kpiri, Ŋaa re mòdzin neè vunun ciun.
Pɔlì nìi dèu Filemɔ̀n nà Onesimùn kàjaa tsɛ
8 Tɔ̀ kamà, min goo ji wo jɔɔn a ci à wù è fa nìi tsuru, Kirisa mun labaɔ̀ kàjaa sapɛ tsɛ tà doùn. 9 Ŋà nìi dzi mun na, tɔ̀ rii yɛ min wo màfyɛ̀n è ɲɛn kɛ̀nbààbee tsɛ. Mun Pɔlì, mun nìi mòòbɔɔ, min sèè min bà Yesù Kirisà rè kàsòdzin dòònun, 10 mun wo màfyɛ̀ɛn Onesimùn goojaa ra, tɔ̀ niì bàu mun dzin mìin kàsò gbaà doùn. 11 À kpɛ̀yn na wo màgoo wube dan waa, ŋà dòònun, à wo ko mun sa magoo wubee. 12 M'a sèè bàji beè wo re mɔn, wò riì ni a ci mun yɛ̀r'la sɔn. 13 À na dzi mun na m'a to n ka mìin kàsoò doùn, è faagoo rèè faa mun ne wo tsɔ̀saan ɲàn, mun ni tɔ̀ kàso nìi doùn, Kùnàgoo Dziɔ̀ yè bà saabu. 14 Ŋà à naà mun sàò min goo sɔn pɛn fa wo na dzyèeŋnà nìi ka waa. Tà tsuru wo nà wùù niì fa, tɔ mà bà goo karaba jiuma wo jɔɔn waa, ŋà è bà dzi wo ra.
15 Gè sɔ̀n ge à bou wo ra rii watsi dɛɛnin bàsɔùn doùn, wo yè bà ni à sèè tàrà kɔn kudɛyn. 16 Tɔ̀ na faa a ci à jòn dɛ waa, ŋà è bà vùn jòn mà, nìi neema kɛniunma. Mun y'à kɛ̀niɔ̀n cɛyn, wo raà si to wù è geren, è ɲɛn adamadzinbee ko ɲɛynamoobee tsɛ.
17 Tà doùn e ba mun jàa a dzyeèsi, à ladɔn a ci wo mun nì ladɔɔ̀n. 18 È ba goo teren bɛy faɔ̀ a ka, tàmafa a re tsìì yè bà ni à ra, tɔ̀ dan mun kùùn. 19 Àwà, mun Pɔlì yɛ̀r'la sià rìì y'à sɛbɛɛn, ci mun nà à sàrà wo re. Mun to na ni à re min dzin wo ra ci mun ne tsìi ni wo sa ra waa, nìi wo yɛ̀rɛ̀ kungɔɔ. 20 Ɔ̀ɔn, mun neema kpir'la, Kirisà kamà nèe goo rèè fa n ne, e n vunun cin Kirisà ɲàn.
Pɔl'lè goomaa lataan, ko tswɛ̀ɛ ko dzwɛɛ̀
21 È ɲɛn wo re vu kuan tsɛ, mun ɲɛɔ̀n à ra ci mun yɛ nìi sɛbɛn siàn wo ra, wo nà à shi jiì, fɔ è geren mun ne dèumaà tsɛ. 22 Àwà gbà sa lamɔ̀nɔ̀n tsùù n ne, kàtsu à ni mun duùn, ci ye re màfyɛyn nèè baraka rɔ̀n, mun nà bàji, min bè ye re. 23 Epafarasì wo tswàa, tɔ̀ riì sa ni kàsoò rà mun ka, Yesù Kirisà ɲàn. 24 Tà ko Marikì, Arisitariki, Demasì, ko Lukì, mun faagoofasi rèè. 25 Arì she, mùn Tsìfa Yesù Kirisà ɲanwùɔ yè bà ni e tsɛ !