Pɔlì ci Tsitè yè làtsii rìi sìn ɲɛynamoo rèè rà jìì saan kàjaa tsɛ
3
1 È taa to, ci yè e majàà kùntsii rèè ko fàan mòdzin neè rè. Yè è vu kun, yè bà ni tsuù goowùɔ sapɛ faa ɲan tsuù ɲàn. 2 È mà mòò pɛn tsoo bara, yè kaà jɔɔn bo, yè bà mòdzin vununmadzi ì, kudɛyn è vunun mà yè bà ciɔn mòdzian sapɛ ka.3 È ɲɛn à tsɛ, dan ɲe sa na mòdzin akiri bɛy ì, mòdzin mabaunma ì, mòdzin firiuma ì. Ɲe na kur'la goo ɲaan ko dzibee goo kaatsià sapɛ re jòn. Ɲe na ni jaamabee rà ɲanbee ɲàn, ɲe jaàn yè bà na boò gèè sapɛ re. Ɲe kinin naà ni mòò rà dɛ, ɲe goo yè bà na xɔ e si mà. 4 Ŋà watsi riì bwèy, mùn Tsibaa Ŋaablà re wùɔ ko à re kɛ̀nbààbee yè e kpadèu adamadzin nèè kàjaa tsɛ, 5 à mùn tsiu. Àwà à na mùn tsi, mùn yɛ̀r'la rè faadzii wuu fauma kamà terenbe doùn dɛ, ŋà à yɛ̀r'la rè màtsur'la rìì kamà, à mùn tsiu. Tɔ fau è ɲɛn mùn fooŋmaà tsɛ, mìn kere yeu, tà ko Ŋaablà re Dzi Fɛnɛɛ mùn laker'liì fau, mìn bà yeu. 6 Mùn Tsibaa Yesù Kirisà baraka rɔ̀n, à tɔ̀ Dzia jàaŋ mùn tsɛ giri. 7 Tɔ fau, gè riì ni à to, à kpàdèumaà ci mùn tereòn à ɲanwùɔ baraka rɔ̀n, mìn bà shɛnsenbaa ì, jaamabe dziù dòbɛɛ shɛɛ̀n, mùn si xɔ tɔ̀ niì tsɛ.
8 Nèe gooma, mòo dzia ɲɛn nìi rà, mun to y'à gaa wo y'à dè, wo y'à tsi à tsɛ. Tà tsuru, nìì reè sapɛ ɲɛɔ̀n Ŋaabla ra, yè bà ni e maxɔbe, yè bè jɔɔn goowuu faa rà. Nìi wù, nàfa yè bà ni à ɲan adamadzin nèè rè, tɔ tɔ̀ rii. 9 Ŋà nìi sɔ̀swɛy gɔ̀r'leè, ko buruju gbaan goòmà rèè, ko kaa goòmà rèè, ko sàrìyaa tsɛ raa dziira sɔswɛɛ, twɛy jɔɔn bo. È ɲɛn à tsɛ, kùn na ni à ra, nafà to na ni à ɲan. 10 Mòò riì mòdzian fi vyɛɛ̀, a y'a sarà à ra jaa soo, jaa fii, à jɛ̀ngɛ̀ to. 11 À tɔ̀ ci tɔ̀ mòdzìn kaatsià shia bàjiu, à ni gooɲaan nà, è bà kitsi mɛrɔɔn e yɛrɛ tsɛ.
Pɔl'lè goomaa lataan ko dzwɛɛ̀
12 Min na Aritemasì tàmafa Tsishikì ka b'à re watsi riì bwèy, a tabe na n ne Nikopolisì wɔ̀ rɔ̀n. È ɲɛn à tsɛ, m'a gaa min mùnkɛɛ̀ watsia fa mɔn. 13 Àwà sàrìyaa tɔ̀baa Zenasì ko Apolɔsì rè jìɛ̀ doùn, a taa to è re cɛyn, gèsɔn pɛn mà nà è fɔn waa. 14 Mùn ne ɲɛynamoo rèè sa wù yè dɛ̀ɛ̀y goowuu faa rà, è sa yeè bà ni dzi e tsiì swey màgòò wùbè ge ì ka taama. Tà tsuru, è mà bà mòdzin ì, nàfa na ni nìì reè ɲàn waa. 15 Nìì reè ni mun ka mìin, è sapɛ wo tswàa. Nìì reè mùn dzunwɛynsi ɲɛynaà doùn, tswɛ̀y sin è ra. Arì she, Ŋaablà ɲanwùɔ yè bà ni e sapɛ tsɛ !