Pɔlì sɛbɛn fiira riì kau
Tsìmotè rè
Sɛbɛɛn kaɔ mòò riì rè ko dzwɛɛ̀
1
1 Mun Pɔlì, Yesù Kirisà rè kɛɛradzian Ŋaablà saɔ baraka rɔ̀n, è kòrò jaamabee làyir'là ka, tɔ̀ niì ni Yesù Kirisà ɲàn, 2 nèe mun ne sɛbɛn, m'a sìn wo Tsìmotè rà, mun dzin kpiri kɛniunmaà. Arì she, Ŋaablà ɲanwùɔ, ko màtsur'la, ko jaanciàn, Fà Ŋaablà, ko mùn Tsìfa Yesù Kirisà yè twɛy sìn a ra !Pɔlì baraka rìi sìun Ŋaablà ra, ko à Tsìmotè latsiu nìi ka è fààn wɔ à ɲan
3 Mun baraka sìan Ŋaablà ra, mun faagoò faa tɔ̀ niì rè ko duunfyɛ ka, a ci mun fàbɔɔ rèè y'à fau nìi tsuru. Fen ko bwèy sa, mun taa ni tsuù wo mà kudɛyn n ne màfyɛyn nèè doùn. 4 Mun taa naumaà wo jaayuà mà, wo sèè jà kuru mun kuàn fɔ è bè geren, mun taama yè bà ni dzibe cɛyn. 5 Ɲɛyna fyɛuma nìi ni wo ɲan, mun taa ni tɔ̀ re. Tɔ̀ niì bàu ni wo nabɔɔ Loyisì ko wo na Enisi jɔ̀na ɲan, mun ɲɛunà à ra ci tɔ̀ soo ni wo sa ɲan.
6 È ɲɛn tɔ̀ tsɛ, mun wo taa toò ci wo Ŋaablà ɲanwùɔ kɔ̀ìge rìi tàrau, mun si rèè tsùuŋmaà doun wo tsɛ, tɔ̀ sàà dzu den kpɛrɛ. 7 È ɲɛn à tsɛ Ŋaabla Dzi riì siɔ̀n ɲe ra, à na shiɲaanbeè Dzi waa, ŋà à dzibaabee Dzi rii, kɛ̀nbààbee Dzi, ko yɛ̀rɛ̀kuan Dzi.
8 Tà doùn, maà seey e mùn Tsìfaà shɛɛrɛbe fa waa. A to mà seey mun ka, ci mun ni kàsoò rà à kamà waa. Kùnàgoo Dziɔ̀ byɛnbee rìì fa mun ka, è kòrò Ŋaablà re dzibaabee ka. 9 À mùn tsiu, è mùn kiri bà e ra ì. Tɔ̀ na fa mùn faadzii reè baraka ɲan waa, fɔ à yɛ̀r'la rè goo sɔ̀n byɛ̀unmaà ko à ɲanwùɔ baraka ɲan. À tɔ̀ fau mùn ne, Yesù Kirisà ɲàn, sani dziɲaan yè ɲɛn. 10 Tɔ ɲanwùù reè kpàdèu dòònun, mùn Tsibaa Yesù Kirisà rè e yɛrɛ kpadèumaà doùn. Wò rii saàn fààn barau, è vyeevyeè bo jaamabee ko gè bara bɛɛ tsɛ, Kùnàgoo Dziɔ̀ baraka rɔ̀n. 11 Tɔ̀ Kùnàgoo Dziɔ̀ rìì kamà, Ŋaabla mun bàu waajibifabaa ko kɛɛradzin, ko kàrànfa. 12 Twɛy goo rèè rìì kamà min bà byɛɛn. Ŋà tɔ̀ seey na ni mun na waa, è ɲɛn à tsɛ, m'a tɔ̀, mun ɲɛɔ̀n nìi rà. Mun si to xɔ à tsɛ, ci à nìi kɛ̀ɛ̀yfaɔ̀ mun mà, à dzi ni à ra è tɔ̀ màrà fɔ è bè suu jisee lataan dzu.
13 A gooma taki nìì reè myɛ̀un mun dzu, twɛy to a taa ra jaa kpadee raa, ɲɛynaà ko kɛ̀nbààbee baraka ɲan, twɛy nìì reè ni Yesu Kirisà ɲàn. 14 Gè wùù riì kɛ̀ɛ̀yfaunà a ma, tɔ̀ màrà Ŋaablà re Dzi Fɛnɛɛ baraka rɔ̀n, tɔ̀ niì ni mùn ɲan.
Pɔlì dzwɛ nìi jiu Onisifɔr'là
15 W'a tɔ̀ ci Azhi mar'la mòdzian sapɛ yeè e nɔun mun ne, Figelɔsì ko Ɛrɛmozhɛnɛ̀ sa. 16 Arì she, Tsìfaà yè màtsuru Onisifɔr'lè tsun'nà nà. È ɲɛn à tsɛ, à mun màxɔ̀n giri fau, à na seey ci mun ni jɔ̀rɔ̀kɔɔ dzu waa. 17 À yɛ̀rɛ̀to wɔumaà Ɔ̀rɔmùn, à mun gaaŋ nì gaaŋ'n kur'la sapɛ, è mun jà. 18 Arì she, mùn Tsìfa Yesù y'à to, Tsìfa Ŋaablà yeè màtsuru à ra, tsìɛ̀ sii sèè. À goowùù riì sapɛ fau Efɛsì wɔ̀ rɔ̀n, wo tɔ̀ tɔ̀ è geren mòdzian sapɛ tsɛ.