Pɔlì sɛbɛn jɔna niì kau
Tsìmotè rè
Sɛbɛɛn kaɔ mòò riì rè, ko dzwɛɛ̀
1
1 Mun Pɔlì, Yesù Kirisà rè kɛɛradzian è kòrò mùn Tsibaa Ŋaablà devua ka, ko Yesù Kirisà, mùn si xɔ tɔ̀ niì tsɛ, 2 nèe mun ne sɛbɛn, è sìn wo Tsìmotè rà, mun dzin taki takià, ɲɛynaà baraka rɔ̀n. Arì she, Ŋaablà ɲanwùɔ, ko màtsur'la, ko jaanciàn, Fà Ŋaablà, ko mùn Tsìfa Yesù Kirisà yè twɛy sìn a ra !Lasɔnmin goòmà ì è ɲɛn kàran kuntan neè tsɛ
3 Àwà to Efɛsì wɔ̀ rɔ̀n, a ci mun wo màxɔ̀un nìi tsuru mun bèkɔɔn nà Maseduwanin mar'lɔn. Tà tsuru nìì reè ni mɔn yè bà kàràn kpɛrɛkuru ì sìan mòdzian nà, e dzin twɛy rà ci y'à dzii bà. 4 Ci è mà e shi sina cee goòmà ì ko buruju gbaan goòmà ì nà, twɛ̀y nìì rèe nàa sɔ̀swɛy giri ka sani yè Ŋaablà raa goò kuun' n kuru wuu kpadè mòò rà, tɔ̀ niì gbaɔn ɲɛynaà tsɛ. 5 Tɔ̀ goo dèumaà kùàn na pɛn waa, à kɛ̀nbààbee rìì, kɛ̀nbààbe riì ni duun fyɛ tsɛ, ko kɛ̀sɛmà wùù, ko ɲɛyna fyɛuma. 6 Swey tɔ̀ shia bàjiu, yè e yɛrɛ firi bè gooma dɔn tsɔ̀ bɛy reè ka. 7 È sào ni yè bà sàriya kaamoo ì, tɔ̀ to y'à tàrà è nìi dèe yè e tsi à tsɛ, è na tɔ̀ fàànmuan.
Sàrìyaa tsùù kuàn
8 Sàriyaa kpɛ̀yn, à goo rèè ye ba faa e fau'n kur'la, m'à tɔ̀ ci à wù. 9 Mìn nèe fàànmun: sàriyaa na tsùuŋnà mòdzin tereonmaà kamà waa fɔ teren bɛy reè, ko mòdzin mabaunma rèè, ko nìì reè na shia Ŋaablà jɔɔn waa, ko gooɲaan fa reè, ko nìì reè màgoo na ni Ŋaablà ɲan waa, ko Ŋaabla tɔ bɛy reè, ko nìì reè yè e fa vua, nìì reè yè na vua, ko mòdzìn vu reè. 10 È bà tsùuŋnà kɛ̀kɛ̀ɛ̀y gòò fa reè kamà, ko kpiri ko kpiri gaa reè, ko jòn gɔɔ reè, ko doo de reè, ko nìì reè yè e kɛɛ doò tsɛ, ko goo o goo rìì dzun wɔɔ kàràn takia rà. 11 Tɔ byɛɔ̀n dzwɛɛ̀ tsìfa Ŋaablà re Kùnàgoo Dziɔ̀ nɔɔrɔmaa mà, tɔ̀ niì kɛ̀ɛ̀yfau mun mà.
Pɔlì baraka sìan Ŋaablà ra, è ɲɛn à ɲanwùɔ tsɛ
12 Mun baraka sìan mùn Tsìfa Yesù Kirisà rà, tɔ̀ niì fààn wɔu mun ɲan. Mun baraka sìan à ra, è ɲɛn à tsɛ à ɲɛun mun na, è mun tsùù e re faagoò tsɛ, 13 mun nìi na Tsìfaà tsoobarabaa dan, ɲɛyna moo rèè byɛnbaa ko mòdzin ɲimantaan. Ŋà Ŋaabla màtsuruu mun na, kàtsu mun na tɔ̀ niì faa, mun na à faa tɔ̀bɛ̀ybeè ko ɲɛynabɛybeè doùn. 14 Mùn Tsìfaà ɲanwùɔ blàbeu mun kàjaa tsɛ fɔ è bè geren, è ɲɛn ɲɛynaà ko kɛ̀nbààbee tsɛ, tɔ̀ niì ni Yesù Kirisà ɲàn. 15 Nèe gooma, mòo dzia ɲɛn nìi rà, è tsiì à sapɛ ra. Tɔ̀ rii yɛ, ci Yesù Kirisà nàu dziɲantsiɛ doùn, è nà gooɲaan fa reè tsi, min bà è sapɛ jɔna. 16 Ŋà Ŋaabla màtsuruu mun na, gè riì ni à to mun nìi gooɲaanfabaa jɔ̀naà, Yesù Kirisà yè bà ni e re mɔ̀ɲɔn brisià kpàdè mun kàjaa tsɛ, tɔ̀ yeè dzi ba jaa kpadeira dzyee rèè rè, nìì reè sapɛ nà ɲɛn à ra, yè bà ni jaamabe dziù dòbɛɛ tàrà. 17 Màsa riì ni tsuù kudɛyn, à na saàn, à na jaà, Ŋaablà soo pee, arì she, blàbee ko nɔɔrɔɔ̀, tɔ̀ yeè ɲɛn à tsɛ, watsi sen ɲɛn watsi tsɛ ! Àmiinà !
Pɔlì ci Tsìmotè yè kaa wùɔ fa, è bà ni ɲɛynaà màrà
18 Mun dzin Tsìmotè, mun nèe goo rèe kɛ̀ɛ̀yfaa wo mà, è kòrò kɛɛrabe goòmà dè dɔ̀unma rèè ka wo tsɛ, wo yè bà ni kaa wùɔ fa, twɛy baraka ɲan. 19 Tɔ̀ fa, e ɲɛynaà màrà ko kɛ̀sɛmà wùù ka. Swey tɔ̀ akir'là maaŋ, è bà baragoò è mà ɲɛynaà kàjaa tsɛ. 20 Àwà Imenè ko Alɛkisandziri sa twɛy mòdzin neè sɔn ni, mun to yè è wɔu Sùtana suun, yè bà ni à kàràn ci ye na kakan Ŋaablà tsoo bara dɛ.