Pɔlì nìi dèu Ŋaabla mafyɛɛ̀n tsɛ
2
1 Àwà, mun mòdzian màxɔ̀ɔn nìi jɔ̀na na, tɔ̀ rii yɛ, yè Ŋaablà mafyɛn fyɛ̀ùn'n kur'la sapɛ: màfyɛ̀ynà goo kaatsià sapɛ, ko tswɛ̀y fàrà goo ì, mòdzian sapɛ re. 2 Ye Ŋaablà mafyɛ̀n màsa reè ko fàànma reè sapɛ re, gè riì ni à to mìn jaamabee fa jaancin ko akiri tsuu doùn, Ŋaablà jɔɔn shiɲaanbe ko blàbe tsɛ. 3 Nìi wù, è bà dzi mùn Tsibaa Ŋaablà ra, tɔ tɔ̀ rii, 4 tɔ̀ niì sào ni mòdzian sapɛ yeè tsi, yè dzi sààbeen tɔ̀. 5 È ɲɛn à tsɛ, Ŋaablà soo pe rii ni, ko sòrònfabaa soo à ko adamàdzin mòdzin neè fi, nìi Yesù Kirisà, adamàdzin mòdzin. 6 Tɔ̀ yeè e yɛrɛ siun mòdzian sapɛ kungɔ̀ màbò sara. Tɔ bàu shɛɛrɛɛbe, nìi fau e watsi ɲan. 7 Tɔ̀ rii kamà, Ŋaabla mun bàu waajibifabaa ko kɛɛradzin. È mun bà kun kpɛrɛ mòdzin neè kàrànfa, min ɲɛynaà ko sààbeen kàràn è ra. Mun sààbeen rìì dèe, mun na doò dèe waa.Kpir'leè ko tààn rèè faa raà ɲɛynamoo kur'là ɲàn
8 È ɲɛn tɔ̀ tsɛ, m'a gaa kpir'leè yè Ŋaablà mafyɛ̀n min niì sapɛ, è si rèè fɛnɛuma ɲan ye bà seunà, vununta ko sɔ̀swɛy mà bà ni waa. 9 Tɔ̀ soo tsuru, nìi tàan rèè, twɛy sa yeè vya jaawuen wɔ, cèu ni nìi ɲàn, è sùtal'là vya. È raa màwɔɔ mà bà kùngɔ̀ myɛ̀unma kpàxɔ ì, ko sɛnu ì, ko fyɛɛndzin ì, tamafà vyama ge kpàxɔ ì waa. 10 Ŋà è raa màwɔɔ ye byɛ̀n faadzii wuu ì rìì mà, a ci tàan nìì reè ci ye shia Ŋaablà jɔɔn, twɛy raa faadziɛ ni nìi tsuru.
11 Taàn yè e mɛ̀nshɛn è kàr'nà lamyɛn, è bà e majàaŋnà peu. 12 Taàn yè bà ni kpir'la kàràn è kùntsììbe fa à tsɛ, mun na n tsii tɔ̀ ra waa. È mɛshɛ̀n nì. 13 È ɲɛn à tsɛ Adamà nì jɔ̀na ɲɛun, tà shɔ̀ùn Awà yè kòmàna ɲɛn. 14 Adamà nì sàn to na firì dɛ, ŋà taàn nì san firiu, è Ŋaablà dzugoomaa cɛ'un ban. 15 Tà ko e sa ra à re ker'là baraka ɲan, à nà tsi. Ŋà fɔ à shìuma yè to ɲɛynaà nà, kɛ̀nbààbee, ko fɛnɛbee, è bà e majàaŋnà.