Pɔlì sɛbɛn fiira riì kau
Tesalonikika reè rè
Sɛbɛɛn kaɔ nìì reè rè ko dzwɛɛ̀
1
1 Nèe mun Pɔlì, ko Silivɛ̀n, ko Tsìmotè rè sɛbɛn, è ka ye Tesalonikì wɔ̀ɔ̀ ɲɛynamoo kur'là rè, ye nìì reè ni mùn Fà Ŋaablà ɲan, ye yè bà ni Tsìfa Yesù Kirisà ɲàn. 2 Arì she, Ŋaablà ɲanwùɔ ko jaanciàn, mùn Fà Ŋaablà ko Tsìfa Yesù Kirisà yè twɛy sìn e ra!Tesalonikika reè rè ɲɛynaà shɛɛrɛbee ko Kirisà nà sii sèè kitsia
3 Neema reè, kudɛyn, ɲe wù ɲe yè baraka sìn Ŋaablà ra ye kamà. Tɔ̀ ni e shi tsɛ, è ɲɛn à tsɛ ye re ɲɛynaà fàan blàbe beè màan ji o ji seron, kɛ̀nbààbe riì to ni ye ɲan, tɔ̀ sa buu bèe ye ko e si fi. 4 Tà tsuru, ye baɔ̀ ɲe yɛ̀rɛ̀blàbè kun Ŋaablà re ɲɛynamoo kur'lèè fi. È ɲɛn à tsɛ, ye ɲanshiɔ̀, ye yè bà ni ɲɛynaà tsɛ. Dzuunbweè ko byɛnbee ni ye tsɛ, ŋà ye tɔ̀ sapɛ kuɔ e ɲan.
5 Tɔ̀ y'a kpàdèe ci Ŋaablà re kitsia tereòn. È bà ni kpadè sa, ci ye wù Ŋaablà re màsàbee ka, ye byɛɛn tɔ̀ niì kamà. 6 À kpɛ̀ynto yè to ci Ŋaablà tereòn, nìì reè ye byɛɛn, à sa nà twɛy byɛn. 7 Ye nìì reè to byɛɛn, à nà ɲànwɔ sin ye ko ɲe sa ra, watsi riì bwèy Tsìfa Yesù ye na e yɛrɛ kpadè bo jirànxɔ rɔ̀n, ko e re mɛ̀rɛ̀kɛ dzitsi rèè ka. 8 À nà nà sàden brìsi fi. Nìì reè na Ŋaablà tɔ waa ko nìì reè na mùn Tsìfa Yesù rè Kùnàgoo Dziɔ̀ goomaa shi jiɛ waa, è byɛnbe ji twɛy tsɛ. 9 Byɛnbe riì yè è nìn, tɔ̀ rii yɛ è raa yè bara tsuù kudɛyn, è dàn yè bà gbàn Tsìfaà ko e re dzibaabee nɔɔrɔɔ̀ rà. 10 Tɔ nà fa, jisee riì è na nà, blà ye bà ni wɔ à ɲan e re mòò rèè fi, tà ko nìì reè ɲɛun à ra, è bà kabagoo twɛy sapɛ re. Ye sa to ɲɛun ɲe re shɛɛrɛbee rà do.
11 Tɔ̀ kamà, ɲe Ŋaablà mafyɛ̀ɛn ye re kudɛyn, gè riì ni à to, è jà ci ɲe re Ŋaabla ye kiriɔ kùn nìi rà, ye wù tɔ̀ ka, tà ko à re dzibaabee baraka rɔ̀n, ye re goowùɔ ŋɛ̀nɛ̀ɲan wuɔ sapɛ, ko ɲɛynaà faagoò dzii yè tsyɛn. 12 Tà tsuru, mùn Tsìfa Yesù Kirisà tsoò yè bà ni blabe ye ɲan, ye sa yeè blàbe à ɲan, è kòrò mùn ne Ŋaablà ko mùn Tsìfa Yesù Kirisà ɲanwùɔ ka.