Pɔlì nìi dèu Tsìfaà nàà raa goo rèè tsɛ
5
1 Àwà neema ì, Tsìfa Yesù yè sèè na, nìi twɛy goo rèè fa watsia ko è fa bwey, à na wɔɔ̀ ɲe yè sɛbɛn ka ye re tɔ̀ ra dɛ waa. 2 È ɲɛn à tsɛ ye yɛ̀r'leè y'à tɔ̀ taki, ci shɔn bàràma naà nìi tsuru fen nɔ̀n, Tsìfaà nà jisee sa nà bà tà tsuru. 3 Mòdzian nà bà dziàn watsi rìi bwèy ci: «Jaancin ni ! Làànfyɛ ni !», tɔ̀ rii bwèy, baragoò nà e gbla è tsɛ, a ci ɲìnìnbe jia tàan don kunkɔɔn tsɛ nìi tsuru. È fa e tsi waa. 4 Ŋà nìi ye neema reè, ye na ni tsitsiɛ̀ ɲàn, tɔ̀ jisee yè bà ni baràma ye ɲan, a ci shɔn bàràmaa mòò ɲàn nìi tsuru waa. 5 È ɲɛn à tsɛ ye sapɛ vyevyeè dzin ì, bwèè dzin ì. Mùn na feèn raa waa, mùn to na tsitsiɛ̀ raa waa. 6 Tà doùn, mùn mà cìi a ci dzyee rèè waa, ŋà mìn to e jaa ra, mùn akiri yè bà ni e yɛr'le. 7 Àwà nìì reè ciɛ̀ twɛy ciɛ̀ fen nɔ̀n nì, nìì reè to mìɛn faa è kun, twɛy sa tɔ̀ faa fen nɔ̀n nì. 8 Ŋà mùn nìì reè bwèè raa, mùn akiri yè bà ni e yɛr'le. Mìn ɲɛynaà ko kɛ̀nbààbee myɛ̀ɛ̀n jɔ̀ɔ̀nshuraa ji e ma. Mùn si to xɔ e tsi rìi tsɛ, tɔ̀ yeè bà mùn ne myɛ̀ɛ̀n baanfla. 9 È ɲɛn à tsɛ, Ŋaablà na mùn bo à re vununta yè bà ni wɔ mùn tsɛ waa, ŋà à mùn bou ni, mìn bà ni tsi mùn Tsìfa Yesù Kirisà baraka rɔ̀n, 10 tɔ̀ niì saun mùn kamà, gè riì ni à to, mùn bàu jaama o, mùn to saɔn rìì ò, mìn bà ni jaamabee ra ko a ka, esire. 11 Tɔ̀ kamà, ye e si màxɔ̀n, ye fààn wɔ̀ e si ɲan, a ci y'a faa nìi tsuru nòn.Pɔlì nìi gaa Tesalonikika reè rè ko dzwɛɛ̀
12 Àwa neema ì, nìì reè byɛɛn faagoò rà ye fi, yè bà ni ye kùùn Tsìfaà ɲàn, yè bà ye latsia, ɲe y'à gaa ye re, ye è blàbe. 13 È re faagoò kamà, ye blà wɔ è ɲan cɛyn, ye è kɛ̀n. Y'a to jaancin yè bà ni e ko e si fi.
14 Neema reè, mìn maxɔ̀ɔn nìi rà, tɔ̀ rii yɛ, nìì reè pìrìpàrà modzìn, ye e latsi. Nìì reè vyɛ̀rɔɔ̀n, ye è kùùn xɔbe. Ye fààn bɛy reè dzun kun, ye e mɔɲɔn mòdzian sapɛ tɛyn. 15 Ye e yɛrɛ kaàwɔ. Mòò pɛn mà gooɲaan ka gooɲaan tsiì sàrà. Ŋà ye e gban wùɔ rìì kpɛyn, ye tɔ̀ faa kudɛyn e ko e si fi, ko mòdzìn dzyee reè sapɛ. 16 Watsi sapɛ, ye e taama dzibe ! 17 Kudɛyn ye Ŋaablà mafyɛ̀ɛn ! 18 Goo sapɛ doùn, ye baraka sìn Ŋaablà ra, kàtsu tɔ̀ rii y'à sàɔ ye kàjaa tsɛ, Yesù Kirisà ɲàn.
19 E maà Ŋaablà re Dzia sà dzi waa. 20 E maà kɛɛrabe goòmà rèè ɲanfyanbe waa. 21 Ŋà, y'a sapɛ rii ɲansiin cɛyn, nìi wù, ye tɔ̀ kun gban gban. 22 Ye e kaàwɔ gooɲaan kaatsià sapɛ ra.
23 Arì she, jaanciàn tsìfa Ŋaablà yeè e ko e kur'la fɛnɛbe. À yè e akir'là, ko e xɔɔn, ko e gɔɔ̀n sapɛ ladzyèèmaa màrà, jààma mà jà è ra, mùn Tsìfa Yesù Kirisà nà sii sèè waa. 24 Ye kiribaà vusootsi, wò rii nà tɔ̀ sa bo e shi tsɛ.
25 Neema ì, ye Ŋaablà mafyɛ̀n ɲe sa re.
26 Ye neema reè sapɛ tswa kɛ̀nbààbè tswɛy ka.
27 M'a gaa e re gaaŋ'n kur'la sapɛ Tsìfaà kamà, ci nèe sɛbɛn nee, y'a to è kàràn neema reè sapɛ re.
28 Arì she, mùn Tsìfa Yesù Kirisà ɲanwùɔ yè bà ni e tsɛ !