Jaamabee fau'n kur'liì dzi Ŋaablà ra
4
1 Tà doùn neema ì, ye wù ye yè jìì nìi tsuru ye yè dzibe Ŋaablà ra, ɲe tɔ̀ kàraun ye ra. À kpɛ̀yn sààben, ye y'à faa tɔ̀ tsuru. Ŋà arì she, Tsìfa Yesù ɲàn, ɲe y'à gaa ye re, ɲe yè ye màxɔ̀n ci ye yè sɔn ba à tɛ̀y. 2 Àwà ɲe ye latsiu goo nìì reè ka Tsìfa Yesù baraka rɔ̀n, ye twɛy tɔ̀. 3 Nìi Ŋaablà sao, tɔ̀ rii yɛ, ye yè bà fɛnɛɔ̀, ye yè e yɛrɛ taàn kɛ̀kɛ̀ɛ̀ybeè mà. 4 Ye soo sookɔɔn sapɛ yeè dzi e gɔɔ̀n rà fɛnɛbee ko blàbe doùn. 5 E maà à to gɔɔ̀n kur'la goo ɲaan yè dzi e dzuun, a ci kun niì reè na Ŋaablà tɔ waa, twɛy ni nìi tsuru. 6 Mòo mà dɔ̀n mòò gàsin ɲan, mòò to mà mɛɛy mòò tsɛ tɔ̀ goò doùn. È ɲɛn à tsɛ, Tsìfaà nà tɔ̀ sapɛ tsiì sàrà, a ci ɲe y'à dè fyɛu ye ra nìi tsuru nòn. 7 Àwà Ŋaablà na mùn kiri ci mìn re jaamabee fa noo ɲàn waa, ŋà, ci mùn y'a fa fɛnɛbee doùn. 8 Tà doùn, mòò riì nèe làtsii rèe rèè maa, à na adamadzin mòdzin maaŋnà dɛ, ŋà à Ŋaablà rii maaŋma, tɔ̀ niì yè e re Dzi Fɛnɛɛ sìan ye ra.9 Àwà nìi neemasia kɛ̀nbààbee, à na wɔɔ̀ mòò yè sɛbɛn ka ye re tɔ̀ ra dɛ, kàtsu ye yè e si kɛ̀n, ye yɛ̀r'lee tɔ̀ kàraun Ŋaabla re. 10 À sààben, Maseduwanin mar'la min niì sapɛ, ye tɔ̀ shi jiɛ neema reè sapɛ kajaa tsɛ. Ŋà arì she neema ì, ɲe ye màxɔ̀ɔn, ye sɔn ba à tɛ̀y. 11 Ye nìi gaa, tɔ̀ rii yɛ, ye e re jaamabee fa jaancin doùn, ye e yɛr'le goo rèè jaa bo, ye faagoò fa e yɛr'la si rèè ka, a ci mùn y'a shi kpadèu e ra nìi tsuru. 12 Ye tɔ̀ fa gè riì ni à to e jiì saàn yè blà wɔ e ɲan dà dzin neè jaa ra, e magoo to mà tsìì mòò pɛn na waa.
Nìi ni fùn nèè sèè kpunaàn tsɛ
13 Àyìwà neema ì, nìì reè saɔ nòn, mùn sàò na ni ye yè to sɔn tɔ bɛy twɛy raa goò kàjaa tsɛ waa. Tɔ mà nà bà ye taamaŋununbe goo a ci sixɔbema na ni nìì reè rè waa. 14 Àwà mìn ba ɲɛun à ra ci Yesù saun è sèè kpunan, tɔ̀ soo tsuru, nìì reè saun yè bà ni Yesù ɲan, Ŋaablà sa nà twɛy sèè fu Yesù baraka ɲan, yè bà ni ko à ka.
15 È ɲɛn Tsìfaà rè gooma sɔn tsɛ, ɲe nìi dèe ye ra tɔ̀ rii yɛ ci Tsìfaà nà sii sèè, nìì reè saɔn nòn, ɲe jaama ree fa dɔ̀n twɛy jɔɔn waa. 16 Ɲe fa dɔ̀n twɛy jɔɔn waa, kàtsu Tsìfaà rè shia sìunmaà, mɛ̀rɛ̀kɛ rèè kùntsii blàa sɛ̀ɛ̀y vuà yè bo, Ŋaablà yeè vur'la fyɛ, à nà jàà bo na jìrànxɔ rɔ̀n. Tɔ̀un, nìì reè saun yè bà ni Kirisà ɲàn, twɛy jɔ̀na nà sèè kpunan. 17 Tà shɔ̀un, ɲe nìì reè jaama touna, ɲe ko è sa nà dzyèè sen fu bè mun'na tsɛ esire, mìn Tsìfaà kùùntsi jìrànxɔɔ̀ doùn. Tà tsuru, mùn ko Tsìfaà nà bà ni esire kudɛyn. 18 Àwà ye twɛy gooma reè ka e si màxɔ̀ɔn.