Tsìmotè kaumaà Tesalonikika reè rè
3
1 Àyìwà, ɲe nàu gba màshuɛ̀ rà nìi fa, tɔ̀ kamà ɲe y'à jà ci à wù ɲe yè to e soone Atɛnìn wɔ̀ rɔ̀n. 2 Ɲe yè e neema kpiri Tsìmotè ka ye re, Ŋaablà faagoofasià Kirisà rè Kùnàgoo Dziɔ̀ dèè doùn, è bà ni fààn wɔ ye ɲan, è ye màxɔ̀n e re ɲɛynaà doùn. 3 È tɔ̀ fa, gè riì ni à to byɛnbe riì yɛ ye tsɛ, tɔ mà nà ye sɔn akiri bara waa. È ɲɛn à tsɛ, ye yɛ̀r'leè y'à tɔ̀, ci tɔ̀ rii nà mùn tàrà. 4 È ɲe to ye re mɔn, ɲe na à dè tsùɔ ye ra ci byɛnbee nà mùn tàrà. Tɔ̀ rii to fau, ye y'à tɔ̀. 5 Tɔ̀ rii kamà, mun sa mɔɲɔn gbauma Tsìmotè kau ye re, è bà ni be ye re ɲɛynaà kùnàgoo tɔ. È ɲɛn à tsɛ, mun na vyɛ̀rɔɔ̀ dzuunboifabaà ma na bà ye dzuun boo, è ɲe re faagoò bà maana waa.Pɔlì nìi myɛ̀un Tesalonikika reè kàjaa tsɛ, tɔ̀ y'a taama dzibeu
6 Ŋà Tsìmotè daun ye re mɔn, è nà kùnàgoo dziù dè ɲe ra ye re ɲɛynaà ko ye re kɛ̀nbààbee tsɛ. À ci ye taa ni ɲe mà cɛyn. Ci à kuru ni ye ra ye yè ɲe sèè jà, a ci à kuru ni ɲe sa ra nìi tsuru, ɲe yè ye sèè jà. 7 È ɲɛn tɔ̀ tsɛ neema ì, è ɲe to e re xɔbee ko e re byɛnbee sapɛ ɲan, ye re ɲɛynaà kamà, ye ɲe màxɔun. 8 Àwà dòònuùn kpɛ̀yn, ɲe jaamabee kaa kuun kɔn kpɛrɛ kàtsu ye san gbaɔn Tsìfaà ɲàn. 9 Ye yɛ ɲe taama dzibeò nìi tsuru Ŋaablà jaa dzuun, ɲe na à tɔ̀ ɲe nà tswɛ̀ì riì sìn Ŋaablà ra ye kamà waa. 10 Fen sen ɲɛn bwèy tsɛ, ɲe ni Ŋaablà mafyɛ̀ɛ̀n nà kudɛyn, è bà ni à to ɲe yè ye sèè jà. Tà tsuru, nìi ye fɔɔn ɲɛynaà doùn, ɲe yè tɔ̀ dzii tsyɛn.
11 Arì she mùn Fà Ŋaablà yɛr'la ko mùn Tsìfa Yesù yè mùn ne shia foro fɔ ye re mɔn ! 12 Arì she Tsìfaà yè sɔn ba e ɲan kɛ̀nbààbee tɛ̀y è blàbe cɛyn e ko e si fi, tà ko mòdzian sapɛ ka, a ci ɲe sa ye kɛ̀niɔ̀n nìi tsuru ! 13 Arì she Ŋaa yè fààn wɔ e dusùkun neè ɲàn, jààma mà jà e ra fɛnɛbee kàjaa tsɛ mùn Fà Ŋaablà jaa dzuun, mùn Tsìfa Yesù nà sii sèè e re mòò rèè sapɛ ka waa. Àmiinà !