Pɔlì sɛbɛn niì kau
Kolosika reè rè
Sɛbɛɛn kaɔ nìì reè rè ko tswɛ̀ɛ
1
1 Mun Pɔlì, Yesù Kirisà rè kɛɛradzian Ŋaablà saɔ baraka rɔ̀n, ko neema kpir i Tsìmotè, 2 nèe ɲe re sɛbɛn, è ka Ŋaablà re mòò rèè rè Kolosì wɔ̀ rɔ̀n, neema niì reè ɲɛɔ̀n Kirisà rà. Arì she, mùn Fà Ŋaablà ɲanwùɔ, ko jaanciàn, twɛy yè sìn e ra !Pɔlì baraka rìi sìun Ŋaablà ra, è ɲɛn Kùnàgoo Dziɔ̀ tsɛ
3 Ɲe re màfyɛyn nèè doùn ye re, kudɛyn ɲe baraka sìan Ŋaablà ra, mùn Tsìfa Yesù Kirisà Fàà. 4 È ɲɛn à tsɛ, ye ɲan ɲɛynaà nìi boò Yesù Kirisà rà, ko ye Ŋaablà re mòò rèè sapɛ kɛniɔ̀n kɛ̀nìùn'n kur'liì rà, ɲe torò jiu tɔ̀ ɲan. 5 Ye si xɔ nìi tsɛ, tɔ̀ yeè bà màrà tsùuŋnà ye re jìrànxɔɔ̀ doùn, tɔ̀ rii y'à saabu. Ye si to xɔ tɔ̀ nìi tsɛ, ye tɔ̀ gooma myɛn dɔ̀un bɔrɔɔ sààbeen goomaa nì baraka ɲan, nìi Kùnàgoo Dziɔ̀. 6 Tɔ̀ Kùnàgoo Dziɔ̀ dziu ye sa tsɛ a ci à dziu dziɲan min niì sapɛ nìi tsuru è bà dzin bèe jɔɔn. À tɔ̀ soo sa faa ye fi, fɔ jisee riì ye Ŋaablà ɲanwùɔ gooma myɛun, y'a tɔ̀ sààben na. 7 Epafarasì, ɲe faagoofasi kɛ̀niunmaà tɔ̀ rii tɔ̀ kàr'nà sìun ye ra. À Kirisà rè faagoofadzin vusootsi, è bà faagoò faa ye re. 8 Ŋaablà re Dzia kɛ̀nbààbe riì ka faagoò faa ye ɲan, à tɔ̀ jaa dèu ɲe ra.
9 È ɲɛn tɔ̀ tsɛ, fɔ jisee riì ɲe twɛy kùnàgoo reè myɛ̀un, kudɛyn ɲe ni Ŋaabla mafyɛɛ̀n nà ye re. Ɲe y'à gaa Ŋaablà re, è ye ɲantsyɛn e saɔ twɛ̀ɛ rà, è kòrò à re Dzia rè akiriblabeè sapɛ, ko à re akiridzibeè sapɛ ka. 10 Tà tsuru, e jiì saàn yè bà ni byɛn Tsìfaà sàɔ mà, e goo yè dzibe à ra kàjaa sapɛ tsɛ. E faadzii wuɔ yè dzin ì wɔ, ye bɔɔ bè jɔɔn Ŋaablà tɔɔ̀ ɲàn. 11 È fààn wɔ ye ɲan kàjaa sapɛ tsɛ e re dzibaabee nɔɔrɔmaa baraka rɔ̀n, ye sàn yè bà ni gban, ye mɔɲɔunma yè to dzuunboi rèè doùn. Taamadzibe ka, 12 ye baraka sin Fà Ŋaablà ra, tɔ̀ niì y'à tou, ye dzi e nin jà à re mòò rèè shɛɛ̀n ɲàn, vyevyee rɔ̀n. 13 À mùn tsi bou tsitsiɛ̀ fàan suun, è bè mùn ka e Dzin Kpiri kɛniunmaà rè màsàbee gàne rɔ̀n, 14 Dzin Kpir'liì baraka ɲan, à mùn kùngɔ màbou, è mùn ne gooɲaantsiɛ mɛɛy bo mùn vu ra.
Pɔlì nìi dèu Kirisà ko e re faagoò tsɛ
15 Ŋaablà riì na jaà waa, à tɔ̀ ɲɛɛ̀n nì, è bà gè ɲɛunma rèè sapɛ kungɔ̀ jɔnaaa. 16 È ɲɛn à tsɛ, gè sapɛ ɲɛun wò rii baraka ɲan. Jìrànxɔ̀ dòùn gee sapɛ, ko dzɔ̀nxɔ̀ tsɛ̀ gee sapɛ. Gè nìì reè jàa, ko nìì reè na jaà waa. Màsàbe reè, ko tsìfàbe reè. Kùntsììbe reè, ko fààntsìbe reè. Gè sapɛ ɲɛun wò rii baraka ɲan, à sapɛ to ɲɛun wò rii laa. 17 À ni gè sapɛ jɔɔn, gè sapɛ to ni tsuù wò rii baraka ɲan. 18 Wò rii gɔɔ̀n kungɔɔ̀, nìi ɲɛynamoo kur'là. Wò rii dzunjɔɔn, è bà fùn nèè kùngɔ̀ jɔna kpunaunmaà, gè riì ni à to è bà ni gè sapɛ jɔɔn. 19 È ɲɛn à tsɛ à dzibeu Ŋaablà ra, wò re Ŋaablabee dzii tsyɛunmaà sapɛ yeè e tsuùma bo à ɲan. 20 À baraka ɲan, è gè sapɛ ko e fia lamɔnɔn. È jaancin dɔ̀n e ko gè sapɛ fi jìrànxɔɔ̀ doùn, ko dzɔ̀nxɔɔ̀ tsɛ, à tsìɛn kounmaà baraka ɲan, gbaàn gɔɔ̀ rà.
21 Àwà dan, è kòrò ye kɛ̀sɛmàà ko ye faadzii ɲaan neè ka, ye na tɔnɔn ì Ŋaablà kajaa tsɛ, ye yè bà na à ɲan ì. 22 Ŋà dòònun, è ɲɛn à Dzin kpir'la saàn tsɛ gɔɔ̀n ɲàn, à ye ko e fia lamɔnɔun, ye yè bà ni kpadè à jaa dzuun mòdzin ì, nìì reè fɛnɛɔ̀, fyɛ̀ na ni è ra waa, jààma to na ni è ra waa. 23 Ŋà, fɔ ye sàn gbaunma yè to ɲɛynaà tsɛ, goo sɔn pɛn mà dzi ye bo e shɔùn waa. Ye si to xɔ nìi tsɛ Kùnàgoo Dziɔ̀ doùn, e maà e bon wɔ tɔ̀ ra waa, e tɔ̀ Kùnàgoo Dziu rìi goomaa myɛ̀un, è bà dèu gè ɲɛunmaà sapɛ ra dziɲantsiɛ min niì sapɛ. Mun Pɔlì, min bà bàu à faagoofabaa.
Pɔl'lè faagoò byɛnbee
24 Àwà, dòònun, min taama dzibee n ne byɛnbe reè doùn, ye kamà. Nìi to Kirisà fɔɔn e re byɛnbe reè doùn, mun tɔ̀ dzii tsyɛɛn n gɔɔ̀n ɲàn. Mun tɔ̀ faa à gɔɔ̀n kamà, tɔ̀ niì ɲɛynamoo kur'là. 25 Mun bàu tɔ̀ ɲɛynamoo kur'là rìì lè faagoofabaa, è kòrò Ŋaablà faagoo rìi kɛ̀ɛ̀yfaɔ̀ mun mà ye kamà, nìi yɛ min Ŋaablà re goomaa dè, m'a dzii tsyɛn. 26 Tɔ gòndo, nìi na mɛnɛn tsùuŋnà fɔ watsi gbaan watsia sapɛ modzian mà, è bà kpàdèu dòònun Ŋaablà re mòò rèè rà. 27 Ŋaablà sao ni twɛy y'à tɔ̀, tɔ̀ gòndoo nɔɔrɔɔ̀ nàfor'la nìi boò kun kpɛrɛ mòdzin neè fi, nìi yɛ Kirisà yè bà ni ye ɲan, tɔ goo nìi ye si xɔbee ci ye nà nɔɔrɔ nàkɔɔn tàrà. 28 Ɲe Kirisà rìi gooma deè, ɲe yè mòdzian sapɛ lasɔ̀nmin, ɲe yè è kàràn akiriblabeè sapɛ ka, à wò rii. Ɲe tɔ̀ faa gè riì ni à to, ɲe yè mòdzian sapɛ dzii tsyɛunma kpàdè Kirisà ɲàn. 29 Tɔ̀ rii kamà, min bà n yɛrɛ siàn faagoò byɛnbee rà, min sikuan fa è kòrò à re faagoo ka mun ɲan, tɔ̀ niì faa dzibaabe ka.