Pɔl'lè làtsii rèè
4
1 Tà doùn, mun neema reè, mun ye nìì reè kɛ̀niɔ̀n, ye kuru yè bà ni mun na fɔ è bè geren, ye ye bà mun ne taamadzibeè ko mun ne dzi tar'la màsà baanflaa, e san gbaunma yè to Tsìfaà ɲàn, n ne kɛ̀niunma rèè. 2 M'a gaa neema taan Evɔdzì rè, m'a gaa neema taan Sɛntishì rè, ci yè e maxɔbe, yè byɛ̀n soo ma Tsìfaà ɲàn. 3 Wo rìi sa to mun faagoofasi taki takìà, m'a gaa a re, e wɔ è ra. È wɔu mun na Kùnàgoo Dziɔ̀ faagoò doùn, è ɲɛn Klemà tsɛ ko mun faagoofasi dzyee reè sapɛ. È sapɛ tsoo rèè sɛbɛɔ̀n jamabee sɛbɛɛn doùn.4 Ye e taama dzibe Tsìfaà ɲàn watsi sapɛ ! Min sèè à tsɛ kɔn, ye e taama dzibe ! 5 Y'a to mòdzian sapɛ y'a tɔ̀, ci e vununmadzi. Tsìfaà tsyɛn. 6 E maà vyɛ̀ɛ̀y goo sɔn pɛn na waa. Ŋà goò sapɛ doùn, e magoo ni nìi rà, y'a gaa Ŋaablà re ko mafyɛyn ka, ye baraka sìn à ra. 7 Tà tsuru, Ŋaablà re jaancin nìi gereon kɛ̀sɛmàà sapɛ tsɛ, tɔ nà ye dusukun neè ko ye kɛ̀sɛmà rèè màrà Yesù Kirisà ɲàn. 8 Dòònun n neema ì, goo o goo sààbèn goo, goo o goo wù blàbe ka, goo o goo tereòn, goo o goo fyɛɔ, goo o goo dzi, goo o goo de dzi, goo o goo wù, tsoo dzi to dzia ɲɛn goo o goo tsɛ, ye bà e kɛsɛɛ̀ twɛy rìì là. 9 Ye nìi kàraun mun ne, ye nìi tàrau mun ne, ye nìi myɛ̀un mun ne, ye to nìi jàu mun ne, ye tɔ̀ shi jiì. Tɔ̀ tsuru, jaanciàn sìnbaa Ŋaabla nà bà ni ye ka.
Pɔlì tswɛ̀y riì sìun Filipuka reè rà è ɲɛn è re blàbee tsɛ
10 Mun taama dzibeu Tsìfaà ɲàn fɔ è bè geren, è jà dòònun, ye yè e taa tou mun ne kɔn yeu. Ye taa na ni à mà, ŋà ye naà à fa jaa wùù rii tàraɔ̀ waa. 11 À na ni a ci mun tɔ̀ dèe ci gè rìì màgoo ni mun na dɛ. À na tà tsuru waa, è ɲɛn à tsɛ, mun dɛ̀rɛɔ̀ nìi rà, tɔ̀ rii yɛ, min ba ni ni'un o ni'un, tɔ mun boò. 12 Gbaa ko tàr'là sa doùn, mun ne jaamabee ni e nima nɔ̀n. À bàu goo o goo, à to bàu min o min, mun dɛ̀rɛɔ̀ cɛɛ̀ rà, min bà dɛ̀rɛɔ̀ dzuà rà. Mun dɛ̀rɛɔ̀ tàr'là rà, min bà dɛ̀rɛɔ̀ gbaa rà. 13 Mun dzia goò sapɛ fa Kirisà baraka ɲan, tɔ̀ niì fààn siàn mun na. 14 Ŋà tà ko e sa ra, ye yè e nin sen niì fau mun ne byɛnbee ɲàn, ye wùù fau tɔ̀ ka.
15 Àwà ye Filipuka reè, ye sa y'a tɔ̀, ci mun ne Kùnàgoo Dziɔ̀ faagoò dziikun bwèy rɔ̀n, mun boumaà Maseduwanin mar'la ɲàn, ye boshɔ̀ùn, ɲɛynamoo kuru pɛn kpɛrɛ na ja yè bà ni wɔ mun na, yè e nin sen tɔ̀ faagoò ɲàn, ko y'à tɔ̀nɔ̀n tàrà waa. 16 È ɲɛn à tsɛ, è mun to Tesalonikì nòn, ye wɔu mun na n magòò ge reè ka, nìi na jaa soo jaa fii waa. 17 À na ni a ci mun blàbè ge ì rìì gaa dɛ. Mun nìi gaa, tɔ̀ rii yɛ, sɔn ye bà ye re wùɔ tɔ̀n'nà tɛ̀y, è giribe. 18 Mun gèè sapɛ tarau, fɔ mun jaa yè cɛn à ra. Ye gè o ge sìun Epaforodzitsì rà ci è nà sìn mun na, mun y'à sapɛ tarau. Mun jaa cɛu. À bàu a ci wushuna kinin dziù, è bà a ci saaka, Ŋaablà yeè e tsiiŋ nìi rà, è dzibe à ra. 19 Mun ne Ŋaablà nà ye màgòò gee sapɛ sin ye ra, è kòrò à re gètsìfàbe nɔɔrɔmaa ka, Yesù Kirisà ɲàn. 20 Arì she nɔɔrɔ yè ɲɛn Ŋaablà tsɛ, mùn Fàà, watsi sen ɲɛn watsi tsɛ ! Àmiinà !
Tswɛ̀ɛ ko dzwɛɛ̀