Terenbe dziitsyɛunmaà Ŋaablà jaa dzuun
3
1 Neema reè, dòònun, ye e taama dzibe Tsìfaà ɲàn. Mun goo nìì reè sɛbɛun min dè ye ra, à na mun byɛɛn kàjaa pɛn tsɛ, min sèè twɛy tsɛ ye re waa. Tɔ ye sàn gbaàn nì. 2 Ye e yɛrɛ kaàwɔ vì rèè rà, faagoofabaa ɲaan neè, shɛunma maana reè. 3 A y'a myɛ̀n shɛunma taki reè, tɔ ɲe rìì. Ɲe nìì reè Ŋaablà blabee à re Dzia baraka rɔ̀n, ɲe yè e yɛrɛ blabe Yesù Kirisà ɲàn, ɲe si to na ɲɛɔ̀n e yɛr'leè tsɛ waa. 4 Tɔ̀ to y'a tàrà, mun sa na dzia n si ɲɛn n yɛrɛ tsɛ. Sɔn ye b'a jàa ci wo dzia e si ɲɛn e yɛrɛ tsɛ, mun naà gereon tɔ̀ raà tsɛ. 5 È ɲɛn à tsɛ, mun kereomaà bwèy ŋaalòn, mun shɛun. Mun Isirayɛlidzin ni, Bɛnyamɛ̀n raa tsua mòdzian sɔn, Dzyèèsìbee mòdzin kàjaa sapɛ tsɛ. Sàrìyaa kàjaa tsɛ, faridziɲɛɛ̀n sɔn. 6 Ŋaabla goo fàan kàjaa tsɛ, mun na ɲɛynamoo kur'là byɛnbaà sɔn, jààma to naà ni mun na sàrìyaa terenbee kàjaa tsɛ waa. 7 Ŋà mun na twɛy goo nìì reè sapɛ jaà tàrà shi n ne, Kirisà kamà, mun tɔ̀ sapɛ jau mɛɛy. 8 Mun yɛ̀rɛ̀ to yè bà gè sapɛ jaà mɛɛy nèe nàfa blà ree kamà, tɔ̀ niì Yesù Kirisà tɔ̀umaà, mun Tsìfaà. Kirisà kamà, min magoo bou à sapɛ ɲan, m'a sapɛ ja ɲɔ̀ùn, min bà ni Kirisà tàrà. 9 Tà ko, min jà à ɲàn. Tɔ̀ na mun yɛ̀r'la raa terenbee baraka ɲan waa, tɔ̀ niì boo sàrìyaa ɲàn, ŋà, Kirisà rà ɲɛynaà terenbee baraka ɲan, tɔ̀ niì boo Ŋaablà ɲan, è bà gbaɔn ɲɛynaà tsɛ. 10 Tà tsuru mìn bà ni à tɔ̀, dzibaabe riì to y'à kpunan bou saàn ɲàn, mun yè tɔ̀ sa tɔ. Mun yè dzyèè à ka e re byɛnbee doùn, mun sa to yè san, a ci à saun nìi tsuru. 11 Tà tsuru à bàu dzii o dzii, mun sa yeè bà ni dzi kpunan bo fùn nèè fi. 12 À na ni a ci mun y'à sapɛ tàrau nòn tàmàfa ci mun dzii tsyɛun nòn dɛ, ŋà mun vwɛ̀ɛ̀ rìì à kpɛyn, min bà ni à kaa kun. È ɲɛn à tsɛ, Yesù Kirisà mun sa kuun. 13 Neema reè, mun na à jàtsi kuàn ci m'a kaa kuɔn dɛ, ŋà mun taa ni goo soo rii mà, nìi yɛ min n taamyɛn dɔ̀n boumaà rè n bonè, nìi ni mun jɔɔn, min n ɲimàxɔbe tɔ̀ kpɛyn. 14 Mun vwɛ̀ɛ fɔ è bè wɔ e da'ùn, gè riì ni à to, Ŋaablà re kir'là Yesù Kirisà ɲàn jìrànxɔɔ̀ doùn, min tɔ̀ tɔ̀n'nà tàrà.15 Tà doùn, mùn nìì reè sapɛ baɔ̀ ɲɛynamoo mɔ̀unma ì, tɔ̀ kɛ̀sɛ̀mà soo yè bà ni mùn sa ɲan. Kɛ̀sɛ̀mà kpɛrɛ to ye ba ni e re, nìi ni tɔ̀ tsɛ, Ŋaablà nà tɔ̀ kpàdè ye ra. 16 Ŋà à bàu dzii o dzii, mùn wɔɔ wɔmà nìi ɲàn, mìn jìɛ̀ fa esire kàjaa soo tsɛ.
Pɔlì ci mìn bà wò shɔ̀ùnminanbaa ì
17 Neema reè, ye bà mun shɔ̀ùnminabaa ì. Ye jìì san wùù riì jàu ɲe ɲan, nìì reè ni tɔ̀ fyɛ̀'ùn, ye siin fa twɛy rà. 18 Àwà, mun y'à dè jaa giri fau ye ra nòn, mun gɛɛykɔɔn to nà sèè à tsɛ kɔn, ci mòò gir'le jaamabee fau' n kuru y'a kpàdeò ci è baɔ̀ Kirisà gbaàn gɔɔ̀ ɲan. 19 È lataan rìì yɛ, yè bara. È doòn rìì yè è re ŋaablà, goo rìi yè è seè goo, yè e yɛrɛ blabee tɔ̀ rii ka, è to na e kɛsɛɛ̀ gèsɔn pɛn na dzɔ̀nxɔɔ̀ tsɛ raa goo rèè tɛ̀y waa. 20 Nìi ɲe, ɲe raa fàtsiɛ ni jìrànxɔɔ̀ doùn nì, ɲe to Tsibaa Tsìfa Yesù Kirisà màshua è bo mɔn nì. 21 À nà ɲe gɔn fààn bɛɛ lakere ba e yɛr'la gɔn nɔɔrɔmaa tsuru, è kòrò à re dzibaabee fàan ka, tɔ̀ riì ni à ɲan, è bà dzia gè sapɛ koron e re.