Jaamabee fau'n kur'la è kòrò Kirisà raà ka
2
1 Àwà mòò màxɔn ye ba ni Kirisà ɲàn, fààn ye bà tàr'la kɛ̀nbààbee ɲàn, dzyèèsìbe yeè bà ni Ŋaablà re Dzia ɲàn, vununmadzibe ko màtsuru yeè bà ni, 2 tà doùn, ye n ne taamadzibee dzii tsyɛn, nìi yɛ ye byɛ̀n soo ma, kɛ̀nbààbe soo ye bà ni e ɲan, akiri soo ko duungoo soo. 3 E maà goo sɔn pɛn fa tsyɛ̀nɛ̀nbe tàmafa yɛ̀rɛ̀blàbe maana maànà ka waa. Ŋà ye e majàà rii, y'a jà ci dzyee rèè blà ye mà. 4 E pɛn mà siin fa e yɛr'la bàsɔùn naà goo rèè rà waa, ŋà ye siin fa dzyee rèè sa raà rà. 5 Kɛ̀sɛmà nìi na ni Yesù Kirisà ɲàn, y'a to tɔ̀ yeè bà ni e sa ɲan. 6 Tɔ̀ niì na Ŋaablà yɛr'la, à na à siin ci wò ko Ŋaablà sa soo, è bà ni e shi to tɔ̀ ra waa. 7 Ŋà è bou tɔ̀ ɲan peu, è ba jòn. È ba mòdzin neè bosi, y'à jà mòdzin maana. 8 È yɛrɛ majàaŋ, è to Ŋaablà dzugoomaa tsɛ fɔ saàn dzu, gbaàn gɔɔ̀ saàn yɛ̀r'la. 9 Tɔ̀ kamà Ŋaablà sa y'a ɲansen, à y'à tsùù tsùùma blà ɲan. È tsoo sìn à ra, nìi ni tsoò sapɛ kuùn. 10 Tɔ fau, gè riì ni à to, kun'nà sapɛ yeè gban Yesù tsoo ra jìrànxɔɔ̀ doùn, dzɔ̀nxɔɔ̀ tsɛ, ko dzɔ̀nxɔɔ̀ dzuun. 11 Nɛɛ̀n sapɛ to y'à dè, ci Yesù Kirisà rìì Tsìfaà, è nɔɔrɔ ɲɛn Fà Ŋaablà tsɛ.Pɔlì ci ɲɛynamoo rèè yè denden vyevyee tsuru dziɲaan doùn
12 Tɔ̀ tsuru, mun ne kɛ̀niunma rèè, è mun to ye fi, ye bàu gooma myɛnbaa ì kudɛyn. Arì she mun nibɛybeè ko e sa, ye bè jɔɔn, ye bà gooma myɛnbaa ì. Shiɲaanbe ko màsɔɔn doùn, ye e tsià faagoò fa. 13 È ɲɛn à tsɛ, goò faa ŋɛ̀nɛ̀ɲaan wuɔ, tà ko è fa, Ŋaablà rii tɔ̀ jia ye ɲan è kòrò à sàɔ ka.
14 Ye goò sapɛ fa, ŋùnùnŋùnùn vu ko sɔ̀swɛy mà jà à pɛn ɲan waa. 15 Tà tsuru ye bà ni ba mòdzin ì, jààma na ni nìì reè rà waa, yè bà fyɛɔ. Ye bà Ŋaablà dzin ì, fyɛ̀ na ni nìì reè rà waa, nèe watsi ree mòdzin neè fi, twɛy nìì reè na tereòn waa, yè bà baraɔ̀. Ye denden è fi vyevyee tsuru, dziɲaan doùn. 16 Tɔ̀un, è jaamabee goomaa to ye suun, tɔ nà bà mun yɛ̀rɛ̀blàbe kun Kirisà rè jisee sii sèè, è kpàdè ci mun na vwɛɛ̀y maana, mun na byɛnbee fa maana waa.
17 Ŋà, arì mun kɛ̀sɛɛn ye ba nà kon a ci mììngè saaka rìì è ɲɛn ye re ɲɛynaà saakaà ko a faagoò tsɛ, mun taama dzi, mun taama to yè bà dzi ye sapɛ ka. 18 Tɔ̀ soo tsuru, e sa yeè e taama dzibe, ye e taama dzibe mun sa ka.
Tsìmotè ko Epaforodzitsì rè faagoò
19 À ni mun duùn ci Tsìfa Yesù ɲàn, sani dɛyn mun na Tsìmotè ka ye re. Tà tsuru mun nà ye kùnàgoo myɛn, tɔ yeè mun màxɔ̀n. 20 È ɲɛn à tsɛ, Tsimotè boshɔ̀ùn, mòò pɛn kpɛrɛ na ni nìi ko mun kɛ̀sɛmàà sa soo ye raa goò tsɛ, è bà à vyɛ̀ɛ goo taki waa. 21 È sapɛ yeè e yɛr'la raa nàfaà rìì gaa, pɛn na Yesù Kirisà raà gaa waa. 22 Y'a tɔ̀, Tsìmotè yè e re sɔ̀bɛ̀nbee kpàdèu nìi tsuru, nìi yɛ è yɛrɛ siun Kùnàgoo Dziɔ̀ faagoo rà mun ka a ci dzin ko fà. 23 Tà doùn, min na jaa fyɛu tɔ n ne goo rèè rà min niì, à ni mun duùn min wò rii ka ye re suu. 24 Mun yɛ̀rɛ̀ ɲɛɔ̀n à ra Tsìfaà ɲàn, ci sani dɛyn, mun yɛ̀r'la sa nà bè mɔn.
25 Ŋà m'a jaɔ̀ ci, nìi Epaforodzitsì, mun neemaa, mun faagoofasià ko mun dzwɛ̀mabaà kaà doùn, à wù min tɔ̀ sèè bàji be ye re, ye tɔ̀ niì kau mun màgòò ge reè ka, è nà wɔ mun na. 26 À kuru na ni à ra kɔsɔbɛ, è ye sapɛ ja, tà ko à akiri gbiimaɔ̀n ci ye wò re gɔuntaà myɛ̀un. 27 À saaben ni, à ɲìniun a ci à ni san, ŋà Ŋaablà màtsuruu à ra, à to na matsuru à bàsɔùn nà waa, à màtsuruu mun sa ra, gè rii ni à to, sɔn mà nà bà mun ne taamaŋununbeè tɛ̀y waa. 28 Tɔ̀ kamà, mun kɔɔtɔuma y'à kaà ye re, ye yè bà ni à jà kɔn yeu, ye yè e taama dzibe, sɔn yeè bo mun sa raa taamaŋununbeè rà. 29 Tà doùn y'a kùùntsiu'n kuru wube Tsìfaà ɲàn ko taamadzibeè sapɛ ka. Ye blà wɔ tɔ̀ tsuru mòdzìn nèè ɲàn. 30 È ɲɛn à tsɛ, Kirisà rè faagoò rìì kamà, à na gaa san. È xɔɔn sìun, gè riì ni à to ye fa ni dzi nìi fa mun ne waa, è tɔ̀ fa ye tsɔ̀saan ɲàn.