Pɔlì sɛbɛn niì kau
Filipuka reè rè
Pɔlì sɛbɛɛn kaɔ nìì reè rè ko dzwɛɛ̀
1
1 Mun Pɔlì ko Tsìmotè, Yesù Kirisà rè faagoofadzin neè, nèe ɲe re sɛbɛn, è ka Ŋaablà re mòò rèè rè, nìì reè ni Yesù Kirisà ɲàn Fìlipù wɔ̀ rɔ̀n, è ka ɲɛynamoo kur'là kààwɔbaa rèè ko à goojaa bo reè rè. 2 Arì she, Ŋaablà ɲanwùɔ ko jaanciàn, mùn Fà Ŋaablà ko Tsìfa Yesù Kirisà yè twɛy sìn e ra.Pɔlì kɛ̀sɛmàà ko à re màfyɛɛ̀n Filipù ɲɛynamoo rèè kajaa tsɛ
3 Mun taa ye na ye mà watsi o watsi, mun baraka sìan n ne Ŋaablà ra. 4 Mun ne màfyɛyn nèè sapɛ doùn, kudɛyn mun màfyɛɛ̀n faa ye sapɛ re, min bà à faa ko taamadzibe ka. 5 È ɲɛn à tsɛ, ye yè e nin wɔu Kùnàgòò Dzìù dee faagoò ɲàn mun ka, fɔ à jisee jɔnaa, è bè suu dòònun dzu. 6 Mun ɲɛɔ̀n goo soo ra, nìi yɛ, ci mòò riì tɔ̀ faagoo wùɔ dzii kuun ye ɲan, tɔ nà à fa è b'a vyɛ̀ e da'ùn, fɔ è bè suu Yesù Kirisà raa jisee dzu. 7 Min bà n kɛsɛɛ̀ tɔ̀ tsuru ye sapɛ ra, tɔ tereòn, è ɲɛn à tsɛ, ye goojaa ni mun duùn. È mun to jɔ̀rɔ̀kɔ reè dzu, min bà Kùnàgoo Dziɔ̀ sààbeen dèe m'a sàn gban, ye sapɛ nin ni tà doùn Ŋaablà ɲanwùɔ ɲàn, mun ka. 8 Ŋaablà yɛr'la mun shɛɛrɛ, ci ye sapɛ goojaa ni mun duùn fɔ è bè geren, è ɲɛn Yesù Kirisà ɲàn kɛ̀nbààbe brisià tsɛ.
9 Mun Ŋaablà mafyɛ̀ɛn nìi ra, tɔ̀ rii yɛ ci sɔn yeè bà beè ye re kɛ̀nbààbee tɛ̀y kudɛyn, twɛ̀ɛ ko akiritsifabee sapɛ ni nìi ɲàn, 10 ye bà ni à tɔ̀ nìi wù. Tà tsuru Kirisà raa jisee sii sèè, ye bà ni ba fyɛuna, jààma mà bà ni e ra waa. 11 E ɲantsyɛunmaà terenbee dziàn nà è bo Yesù Kirisà rè, tɔ̀ yeè blàbe ko tsoo dzi ɲɛn Ŋaablà tsɛ.
Pɔlì ci nìi wò tàrau, tɔ Kùnàgoo Dziɔ̀ bèu jɔɔn
12 Neema ì, mun sào ni ye yè nìi tɔ̀, tɔ̀ rii yɛ ci goo nìì reè mun tàrau, tɔ bàu saabu rìì, Kùnàgoo Dziɔ̀ yè bè jɔɔn. 13 Jàmààntsì gbaà doun dzin neè sapɛ, ko dzyee re sapɛ y'a tɔ̀, ci e nèe jɔ̀rɔ̀kɔ ree reè jà mun na, à Kirisà rìì kamà. 14 Mun ne jɔ̀rɔ̀kɔ reè bàu saabu neema reè giri si yè xɔbe Tsìfaà tsɛ, sɔn ye bà è re kùùnxɔ̀beè tɛ̀y yè dzi Ŋaablà re goomaa dè, arì è na shiɔ̀ tsu waa.
15 À kpɛ̀yn sààben, swey Kirisà gooma deè è ɲɛn jaaɲininbe ko kaa tsɛ, ŋà swey sa y'à dèe ko ŋɛ̀nɛ̀ɲan wuu ka. 16 Twɛy y'à dèe kɛ̀nbààbe ka, kàtsu y'à tɔ̀ ci mun tsùuŋnà Kùnàgoo Dziɔ̀ sààbeen dèè rìì kamà. 17 Ŋà dzyee nìì reè Kirisà gooma deè è ɲɛn tsyɛ̀ɛ̀nɛ̀nbe tsɛ, twɛy na à dèe ŋɛ̀nɛ̀ɲan wuu ka waa, è ɲɛn à tsɛ, y'à kɛ̀sɛɛ̀ ci à fakɔɔn tɔ̀ tsuru ye nà sɔn ba mun ne byɛnbee tɛ̀y è mun to n ne jɔ̀rɔ̀kɔ reè dzu.
18 À dèu ŋɛ̀nɛ̀ɲàn ɲaan ka ò, à to dèu sààben ka ò, tɔ̀ kùn na ni waa ! À dààn rìì Kirisà goomaa yè bà dèe. Tɔ mun taama dzibee, mun to nà n taama dzibe arì she. 19 È ɲɛn à tsɛ, mun y'à tɔ̀ ci tɔ̀ goò lataan nà bà mun tsià saabu è ɲɛn ye re màfyɛyn nèè tsɛ, ko Yesù Kirisà rè Dzia rè dzwɛ̀maa baraka rɔ̀n. 20 È kòrò mun kɔɔtɔuma nìi màshua, mun si yè bà xɔ à tsɛ, mun fa seey goo sɔn pɛn na waa. Ŋà mun akiri tsùuŋnà, ci dòònun ko watsi sapɛ, Kirisà blàbee nà kpàdè mun gɔn nɔ̀n, è mun to jaama tàmafa min bà saɔn. 21 È ɲɛn à tsɛ, mun ne, jaamabee fakɔɔn Kirisà rìì, saàn, tɔ̀ yeè bà tàrà. 22 Ŋà è mun to jaamabee rà, min ba dzia faagoo fa kɔn nàfa ni nìi ɲàn, mun na à tɔ̀ mun nà nìi sen waa. 23 Mun akir'là mun sɔ̀ɔn à goo fiɛ̀ tsɛ. Min bè, min bà ni Kirisà ka tɔ̀ kuru ni mun na, tɔ̀ yeè bà fyan kosɛbɛ. 24 Ŋà ye kamà, min to jaamabee rà, nàfa ni tɔ̀ ɲan kɔn fɔ è bè geren. 25 Mun to y'à tɔ̀, min bà ɲɛɔ̀n à ra, ci mun nà to, min bà ni ye sapɛ ka gè riì ni à to ye yè dzi be jɔɔn, ye taama yè bà dzi ɲɛynaà doùn. 26 Tɔ̀ tsuru, mun kpɛyn sèèŋmaà ye re kɔn yeu, tɔ̀ nà bà saabu mun kamà, sɔn yeè bà ye re yɛ̀rɛ̀blabee tɛ̀y Yesù Kirisà ɲàn.
Pɔlì ci mùn sàn gbaunma yè bà ni ɲɛynaà sikuan doùn
27 Ŋà ye e re jaamabee fa rii, a ci Kirisà rè Kùnàgoo Dziɔ̀ ci è fa nìi tsuru. Tà tsuru, mun bèu ye siin ò, mun to na be ò, mun y'à myɛ̀n ci ye san gbaɔn akiri soo ka, ye yè bà ni ɲɛynaà Kùnàgoo Dziɔ̀ sikuan nà esire. 28 E maà à to e ɲan rèè yè e baàbaa kàjaa pɛn tsɛ ye shi waa. Tɔ nà à kpàdè è ra, ci è ni e bar'la gè doùn, ye yè bà ni e tsià gè doùn, tɔ̀ niì boo Ŋaablà re. 29 È ɲɛn à tsɛ, Ŋaablà yeè e ɲanwùɔ kpàdèu ye ra rii, ye yè bà ni ɲɛn Kirisà rà, tà ko ye yè byɛn à kamà sa. 30 Ye mun jàu tɔ̀ sikun niì rà m'a faa, ye toro yè bà à myɛ̀ɛn arì she ci mun ni à ra, ye sa ni tɔ̀ soo rìì là.