Dziin nèè ko ker'làgè rèè fia
6
1 Dziin nèè, ye e ker'là gè rèè dzugoomaa blàbe Tsìfaà ɲàn, kàtsu tɔ̀ goo, nìi tereòn. 2 È ɲɛn à tsɛ «A faà ko a naà blàbe», tɔ̀ rii Ŋaablà dzugooma xɔù jɔ̀naà, làyiri sen ɲɛɔ̀n nìi tsɛ, 3 nìi yɛ «E bà ni xɛɛrɛ ko sì gbààn tarà dzɔ̀nxɔɔ̀ tsɛ.4 Ye fà rèè sa, e tsu mà e dzin nèè vunun ta waa, ŋà ye è ladɔn nì, ye è koron è kòrò Tsìfaà rè làtsìì goòmà rèè ka.
Jòn nèè ko e kuntsii rèè fia
5 Jòn nèè, e kuntsii nìì reè ni dzɔ̀nxɔɔ̀ tsɛ, ye è dzugoomaa blàbe. Ye tɔ̀ fa shiɲaanbe ko màsɔɔn ko duun fyɛ ka, a ci y'a faa Kirisà rìì lè. 6 À mà bà è jaa ra goo bàsɔùn, a ci y'a faa ye yè dzibe mòdzin ì nà waa. Y'a fa rii, ci ye Kirisà rè jon ì, è bà Ŋaablà saɔ fakɔɔn ko e duɔ̀n sapɛ ka. 7 Ye faagoò fa è re duun fyɛ ka, a ci y'a faa Tsìfaà rìì lè, ye na à faa mòdzin ì nè waa. 8 Ye bà à tɔ̀ ci mòdzian soo soo sapɛ, xɔrɔn sen jòn tsɛ, a wùù riì fau, a naà tɔ̀ sàr'là rìì tàrà Tsìfaà rè.
9 Ye kùntsii rèè sa, e sa yeè tɔ̀ soo fa è re, nìi yɛ, e maà ɲanbe è mà waa, ye bà à tɔ̀ ci Tsìfa soo rìì ni ye sa re, nìi ni jìrànxɔɔ̀ doùn, à na mòò boò mòò ɲàn waa.
Ɲɛynamoò rè kaa faa gè rèè
10 Dòònun, ye fààn wɔ e yɛrɛ ɲan Tsìfaà ɲàn dzibaabee fàan ka. 11 Ye Ŋaablà re kaa faa gè rèè sapɛ ji e ma, gè riì ni à to e san gbaunma yè dzi to Sànwɔbaà rè nanbara goo reè sapɛ jɔɔn. 12 È ɲɛn à tsɛ, ɲe na ni kaà rà ko adamadzin mòdzin ì ka waa, ŋà ɲe ko nìì reè ni à ra, tɔ kùntsii rèè rìì, ko fààntsi rèè, ko dziɲaan tsitsiɛ̀ kùntsii rèè, ko gooɲaan kwey nìì reè ni jìrànxɔ rɔ̀n. 13 Tɔ̀ kamà, ye Ŋaablà re kaa faa gè rèè sapɛ sen, e san gbaunma yè bà ni to jisee ɲaan sii sèè. Goò sapɛ fa douma shɔ̀ùn, ye bà ni tsuù e san tsɛ.
14 Tà doùn ye san gban ! Sààbeen yè bà e dzun na ɲànshìàge, terenbee yè bà e vu ra myɛ̀ɛ̀n mɛyɛ. 15 Jaanciàn Kùnàgoo Dziɔ̀ dèè ɲantsuɔ̀, tɔ̀ yeè bà e san nà seereyn. 16 Ɲɛynaà myɛ̀ɛ̀n jɔ̀ɔ̀n shua gèè, kudɛyn tɔ̀ yeè bà ni e suun. Tɔ rii nà à to ye yè dzi ɲaàn rè shidzin sama reè sapɛ sa dzi. 17 Mùn tsià myɛ̀ɛ̀n baanflaa yè bà ni e kuùn, Ŋaablà re Dzia bàmunun gbàan yè bà ni e suun, tɔ̀ niì Ŋaablà re goomaa.
18 Ye Ŋaablà mafyɛ̀ɛn kudɛyn à re Dzia baraka rɔ̀n, màfyɛ̀yn kaatsià sapɛ ka. E taa yeè bà ni tɔ̀ mà kudɛyn, e ɲan yè bà shiɔ̀ à ra fau'n kur'la sapɛ. Ye màfyɛɛ̀n faa Ŋaablà re mòò rèè sapɛ re. 19 Ye Ŋaablà mafyɛ̀n mun sa re gè riì ni à to, mun ye n dzu san ci mun nà gooma, min dzi Kùnàgoo Dziɔ̀ gòndoo dè fyɛ ko akiri tsuu ka. 20 Mun ni tɔ̀ Kùnagoo Dziɔ̀ rìì lè ni ɲan, jɔ̀rɔ̀rɔ̀kɔɔ yè bà wɔɔ mun na, min bà ni à gooma de akiritsuu ka, a ci mun wù m'a dè nìi tsuru.
Pɔl'lè gooma lataan
21 Àwà, ye yè bà ni à tɔ̀ goo nìì reè ni mun ne, ko mun nìi faa, mùn neema kpiri kɛniunma Tsishikì, Tsìfaà rè faagoofabaa vusootsià, tɔ nà bè ye toro kɔ̀ tɔ̀ sapɛ ra. 22 Mun y'à kaà ye re è ɲɛn tɔ̀ rii tsɛ. È ɲe kùnàgoo de ye ra, è ye màxɔ̀n.