Pɔlì sɛbɛn niì kau
Galatsika reè rè
Pɔlì sɛbɛɛn siɔ̀n nìì reè rà ko tswɛ̀ɛ
1
1 Àwà mun Pɔlì, mun bàu kɛɛradzin. À na adamadzin mòdzin ì nè kɛɛradzinbe waa, à to na boo adamadzin mòdzin ɲan waa, fɔ Yesù Kirisà ko Fà Ŋaablà, tɔ̀ niì y'à kpunan bou fùn nèè fi. 2 Nèe sɛbɛn, mun ko n neema niì reè sapɛ ni mun ka, ɲe nìi kaà Galatsi mar'la ɲɛynamoo kur'lèè rè. 3 Arì she, Ŋaablà ɲanwùɔ ko jaancin yè bà ni e tsɛ è bo mùn Fà Ŋaablà re, ko Tsìfa Yesù Kirisà, 4 tɔ̀ niì yè e yɛrɛ siun mùn ne gooɲaantsiɛ kamà, gè riì ni à to mùn yeè tsi bo nèe dziɲan ree gooɲaan suun, è kòrò mùn Fà Ŋaablà saɔ ka. 5 Nɔɔrɔ yè ɲɛn à tsɛ watsi sen ɲɛn watsi ! Àmiinà !Pɔlì nìi dèu Galatsika reè rà, è ɲɛn Kùnàgoo Dziɔ̀ ko à re shɛɛrɛbee tsɛ
6 À jiu mun dzii tsɛ, m'a jà ci mòò riì ye kiriu Kirisà ɲanwùɔ baraka rɔ̀n, ye tabe seè bou tɔ̀ kpɛyn, ye yè e gban kùnàgoo dziù kpɛrɛ kpɛyn. 7 À na ni a ci kùnàgoo dziù kpɛrɛ ni dɛ, ŋà mòdzin ì nì ni ye ɲan, nìi reè ye akir'la gbiimaan, yè bà ni à re, yè Kirisà rè Kùnàgoo Dziɔ̀ kùnàgblen. 8 Ŋà arì nìi ɲe, tàmafa jìrànxɔɔ̀ doùn mɛ̀rɛ̀kɛɛ̀ sɔn ye na kùnàgoo dziu kpɛrɛ dè ye ra, nìi ko ɲe re jɔ̀na dèumaà na soo, tɔ̀ tsìfa yè danga ! 9 Àwà a ci ɲe y'a dèu nìi tsuru nòn, n naà sèè à tsɛ kɔn dòònun m'a dè, ci mòò ye kùnàgoo dziu kpɛrɛ dè ye ra nìi ko ye re jɔ̀na tàraumaà nà soo fyeu, tɔ̀ tsìfa yè danga !
10 Àwà dòònun m'a gaa min byɛ̀n mòdzian nì mà ràa, tàà min byɛ̀n Ŋaablà rii ma ? Mun y'à gaa min dzibe mòdzian nì nà ɔ̀ ? Min ba na à gaa min dzibe mòdzian nì nà, mun fa bà Kirisà rè faagoofadzin waa. 11 Neema reè, mun nà nìi dè ye ra, ye bà ni à tɔ̀, tɔ̀ rii yɛ ci mun Kùnàgoo Dziu rìi dèu ye ra, à na adamadzin mòdzin naa waa. 12 È ɲɛn à tsɛ, mun na à tàrà adamadzin mòdzin ne waa, mòò to na à kàràn mun na waa. À kpàdèu mun na, è bo Yesù Kirisà rìì ɲàn. 13 Mun na nìi faa dan Dzyèèsìbee mòdzin neè rè dzinɛ shià doùn, ye tɔ̀ gooma myɛun. Y'a tɔ̀ ci mun na fuɔ̀ Ŋaablà re ɲɛynamoo kur'là kpɛyn min byɛnbe ɲɛn à tsɛ cɛyn, min bà na à gaa m'a bara. 14 Mun na bèe jɔɔn Dzyèèsìbee mòdzin neè rè dzinɛ shià jìɛ̀ doùn, min bà ni n jaasi kur'là mòò giri jɔɔn ɲe kuan ɲàn. Wɔ̀dzùùnta na ni mun ɲan fɔ à si yè bè tsi mun fà rèè rè goo bɔrɔɔ shi rèè jìɛ̀ doùn.
15 Ŋà fɔ mun ni n naà duùn, Ŋaabla mun bo jiu n si, è mun kiri e ɲanwùɔ baraka rɔ̀n. 16 À dzibeu à ra è Dzin Kpir'la kpàdè mun ɲan, min bà ni à gooma de kun kpɛrɛ mòdzin neè rà. Tɔ fau min niì, mun na adamadzin mòdzin ne làtsii gaa waa. 17 Nìì reè to bà dɔ̀un mun jɔɔn kɛɛradzin, mun na be twɛy tsu re Yerusalɛmùn waa. Mun bèu Aràbù jamaan nɔn nì suu, min kòmànà n kpɛyn sèè Dàmasì wɔ̀ rɔ̀n. 18 Jii zhiigi tɔ̀ rii shɔ̀ùn, min kòmànà bè Yerusalɛmùn, min bè bo Piyɛr'lè, min bwèy teeŋ nun fa ko à ka. 19 Ŋà mun na kɛɛradzin kpɛrɛ jà mɔn Tsìfaà tsyeyn kpiri Yàkùbà tɛ̀y waa. 20 Ŋaabla mun shɛɛrɛ, ci mun yɛ nìi sɛbɛn siàn ye ra, à na doo goòmà waa.
21 Tà shɔ̀ùn min kòmànà bè Siiri ko Silisi mar'leè ɲàn. 22 Àwà tɔ̀ sapɛ ɲan, ɲɛynamoo kuru nìì reè na ni Yude mar'lɔn Kirisà ɲàn, twɛy naà mun jaɔ̀ ŋe yè mun tɔ̀ waa. 23 È na nìi bàsɔùn myɛ̀ɛn, tɔ̀ rii yɛ ci: «Mòò riì na byɛnbe ɲɛɛn ɲe tsɛ jɔ̀na, tɔ̀ rii yè e lakereò dòònun è ɲɛynaà Kùnagoo Dziɔ̀ dèe, à na baragoò faa tɔ̀ riì ɲàn dan.» 24 È to na nɔɔrɔ ɲɛɛn Ŋaablà tsɛ, è ɲɛn mun goò tsɛ.