Pɔlì ko kɛɛradzin dzyee reè byɛ̀un nìi mà Yerusalɛmùn
2
1 Àyìwà jii teeŋ naalen tà shɔ̀ùn, mun yè tèyn dɔn be Yerusalɛmun kɔn, mun ko Barinabasì. Ɲe bèkɔɔn, min bè Tsitè sa ka n suun. 2 Mun bèu mɔn è ɲɛn goo kpàdèuma nì tsɛ. Mun to Kùnàgoo Dziù rìi dèe kun kpɛrɛ mòdzin neè rà, min tɔ̀ jaa dè jɔ̀ɔ̀ndzin neè ra e dan na, gè riì ni à to, mun vwɛ̀ɛ̀y riì fau ko mun ni vwɛ̀ɛ̀y riì rà, tɔ mà nà bà goo maana waa. 3 Ŋà arì Tsitè, tɔ̀ niì na ni mun ka è bà Gɛ̀rɛ̀ki, mòò na tɔ̀ karaba è bà ni e shɛn waa, 4 fɔ neema doodebaa nìì reè na ɲe kuru waa, yè bà na dɔɔ̀n ɲe sàn dzuun. Ɲe xɔrɔnbe rìi tàràu è bo Yesù Kirisà rè, twɛy na tɔ̀ sɛ̀r'na yè bà ni à kùnà ban, yè ɲe bà jon ì. 5 Ɲe kpɛ̀yn na e majàà twɛy mòdzin neè rè ɲe yè e tsiì è dèvuà rà waa, arì watsi kiɲaanin bàsɔùn doùn, gè riì ni à to Kunàgoo Dziɔ̀ sààbeen yè to ye re.6 Àwà, nìi jɔɔndzin neè kàjaa tsɛ, (è na mòdzin bla ì ò, è to naà mòdzin bla ì ò, à sa soo mun ne. È ɲɛn à tsɛ a ni niu'n kuru o niu'n kuru, Ŋaablà na tɔ̀ siɛ̀n waa). Twɛy kpɛ̀yn, è na goo kpɛ̀rɛ̀ bà mun mà fààn, è bà mun ne fakɔɔn tɛ̀y waa. 7 È yɛ̀rɛ̀ to y'à jàu nì, ci kun kpɛrɛ mòdzin neè raa Kùnàgòò Dzìù dee kɛ̀ɛ̀yfaɔ̀ mun mà, à ci Dzyèèsìbee mòdzin neè raà sa kɛ̀ɛ̀yfaɔ̀ Piyɛrì mà nìi tsuru. 8 È ɲɛn à tsɛ, nìi faagoo fau Piyɛri ɲàn è bà Dzyèèsìbee mòdzin neè raa kɛɛradzin, tɔ̀ soo rii faagoò fau mun sa ɲan, min bà kun kpɛrɛ mòdzin neè raa kɛɛradzin. 9 Àwà Yakubà, ko Piyɛrì, ko Yùxanà, twɛy nìì reè jàtsi kuɔn ɲɛynamoo kur'là tsindzin neè, twɛy Ŋaablà ɲanwùɔ tɔ̀u mun kàjaa tsɛ. Tà doùn, yè si wɔ mun ko Barinabasì suun dzyèèsìbe tààmàshɛn, ɲe yè bà ni faagoò fa kun kpɛrɛ mòdzin neè fi, ye y'à fa Dzyèèsìbee mòdzin neè fi. 10 È nìi bàsɔùn gaaŋ ɲe re, tɔ̀ rii yɛ ci ɲe yè e taa to gbakɔɔn reè rè. Mun sa to yè n ɲanshìu tɔ̀ faa rà.
Pɔlì Piyɛr'lè fìr'là dèu à ra min niì
11 Ŋà, Piyɛrì nàu watsi riì bwèy Antsiyɔshì, mun yè n dzun wɔu à ra, m'a dè fyɛ à jaa ra, ci à fìriɔ̀. 12 È ɲɛn à tsɛ, sani mòdzin ì yè bo Yàkubà kpà yè nà, Piyɛrì na ɲwɛɛ̀n ɲɔɔ̀n ko kun kpɛrɛ mòdzin neè ka. Ŋà, fɔ twɛy dziu nà nòn, è mabo è ra ɲaun, è to e dan na, kàtsu à na shiɔ̀ Dzyèèsìbee mòdzin neè jɔɔn, twɛy nìì reè ni shimaangoo tsɛ. 13 È bà saabu è Dzyèèsìbee mòdzìn dzyee reè sa ba e tɛy tɔ̀ duungoofiibee doùn, fɔ Barinabasì yɛ̀r'la sa y'a to y'à dɔ̀n tɔ̀ duungoofiibeè ɲàn. 14 Àwà, m'a jàu watsi riì bwèy, ci è na jiɛ è kòrò Kùnagoo Dziɔ̀ sààbeen shia ka dɛ, min dzin Piyɛr'là è sapɛ jaa ra ci: «Wo rìi Dzyèèsìbee mòdzin, wo ye ba a raa jaamabee faa kun kpɛrɛ mòdzin neè raa fau'n kur'la rà, wo na à faa a ci Dzyèèsìbee mòdzin waa, wo dzia kun kpɛrɛ mòdzin neè karaba dzùrù, ci yè e re jaamabee fa a ci Dzyèèsìbee mòdzin ì ?»
15 Ɲe Dzyèèsìbee mòdzin kereuma ì nì. Ɲe na kun kpɛrɛ mòdzin ì, nìì reè ni gooɲaan gè doùn waa. 16 Àwà, à na dzia kpàdè ci mòdzin tereòn è ɲɛn Sàrìyaa raa goo farama rèè tsɛ waa, fɔ e ɲɛn Yesù Kirisà bàsɔùn nì nà. Tà doùn, ɲe sa ɲɛun Yesù Kirisà rà gè riì ni à to è kpàdè ci ɲe tereòn ɲɛynaà baraka rɔ̀n Kirisà rà, ŋà à na Sàrìyaa raa goo rèè waa. È ɲɛn à tsɛ, è ba Sàrìyaa raa goo rèè rìì, mòò pɛn fa kpàdè ci à tereòn waa. 17 Ŋà terenbee gaakɔɔn Kirisà ɲàn, tɔ̀ y'a to è jà ci ɲe yɛ̀r'leè sa gooɲaantsiitsi ì, tɔ̀ y'a kpàdèe ci Kirisà faagoo faa gooɲaan rè ò ? Ayi dɛrɛ ! 18 Tà doùn, mun nìi barau, min ba sèe min tɔ̀ lamɔnɔ̀n kɔn, tɔ̀ y'a kpàdèe ci mun yɛ̀r'la yè n yɛrɛ baà sàrìyàbarabaa. 19 Àwà Sàrìyaa rìì saabu ɲan mun saun Sàrìyaa kàjaa tsɛ, min bà ni jaamabee fa Ŋaablà re. Mun gbaun Kirisà ka gɔɔ̀ rà. 20 Mun kpɛ̀yn ni jaamabee rà, ŋà à na mun ne jaamabe fakɔɔn dɛ waa, Kirisà rìì ni jaamabee rà mun ɲan. È ɲɛn à tsɛ, mun ni jaamabe riì rà gɔɔ̀n kàjaa tsɛ dòònun, mun tɔ̀ faa ɲɛynaà nì baraka ɲan Ŋaablà Dzin Kpir'la ɲàn, tɔ̀ niì mun kɛ̀niun, è yɛrɛ sin mun kamà. 21 Mun na Ŋaablà ɲanwùɔ bàa goo maana waa. È ɲɛn à tsɛ, terenbee ye ba tàr'la Sàrìyaa rìì baraka ɲan, tà doùn Kirisà saun maana.