Pɔlì ci terenbee tàr'la ɲɛynaà nì ɲàn, à na Sàrìyaa waa
3
1 Galatsika reè, ye akiri bɛy taki ! Tsì rii ye jɔɔn gaaŋnà ? Yesù Kirisà yè gban gɔɔ̀ rà, tɔ̀ na kpadè fyɛ ye ra ɔ ? 2 Mun sào ni min nèe goo soo ree jaa tɔ̀ ye re: ye Ŋaablà re Dzia tàrau Sàrìyaa goo rèè shi jiɛ rìì baraka ɲan raà, tàà y'a tàrau ɲɛynaà goomaa lamyɛɛ̀n nì saabu ɲan ? 3 Fee ye baɔ̀ akiri bɛy nèe tsuru ? Y'a dzii kun Ŋaablà re Dzia baraka ɲan ɔn, dòònun y'a latan gɔɔ̀n baraka ɲan ɔn ?. 4 Ye tɔ̀maà nìi sapɛ bou, tɔ̀ ni ba goo maana ɔ ? À yɛ̀rɛ̀ to ye ba na goo maana kɛ ! 5 Àwà, nìi yè e re Dzia sìun ye ra, è bà kabagoo goo reè faa ye fi, tɔ faa Sàrìyaa goo rèè shi jiɛ rìì baraka ɲan raà, tàà à faa ɲɛynaà goomaa lamyɛɛ̀n nì saabu ɲan ?6 Tà tsuru, à deò ci Ibraximà ɲɛn niì fau Ŋaablà ra, tɔ daun à re terenbe. 7 Tà doùn y'a fàànmun, ci nìì reè sapɛ ɲɛynaà faɔ̀, twɛy rìì Ibraximà dzin ì. 8 Àwà Ŋaablà re Goomaa na à kpàdè tsùuŋnà, ci ɲɛynaà baraka ɲan, Ŋaablà nà kun kpɛrɛ mòdzin neè bà mòdzin tereonma ì. Tà doùn, à nèe Kùnagoo Dziù rèe dè tsùuŋ Ibraximà nà ci: «Wo rìì ɲàn, kun neè sapɛ nà dzwɛ tàrà.» 9 È ɲɛn tɔ̀ tsɛ, nìì reè sapɛ ɲɛynaà faɔ̀, dzwɛ kuɔn twɛy sapɛ ma a ci Ibraxima, tɔ̀ niì sa bàu ɲɛynamoo. 10 Àwà, nìì reè sapɛ ci ye Sàrìyaa goo rèè rìì shi jiɛ, danga ni twɛy sapɛ tsɛ. È ɲɛn à tsɛ, à sɛbɛɔ̀n Ŋaablà re Goomaa doùn ci: «Wo mòò o moò na Sàrìyaa goo rèè sapɛ shi jiɛ kudɛyn, wo y'à dzii tsyɛn, danga wo nìn. 11 À fyɛɔ ci mòò pɛn na dzia kpàdè ci à tereòn Ŋaablà jaa dzuun, Sàrìyaa baraka ɲan waa. È ɲɛn à tsɛ, à sɛbɛɔ̀n Ŋaablà re Goomaa doùn ci: «Ɲɛynaà nì baraka ɲan, mòdzin tereonmaà nà jaamabee fa.» 12 Sàrìyaa raa goò na ni ɲɛynaà suun waa, ŋà nìi deò à kàjaa tsɛ, tɔ̀ rii yɛ ci «mòò riì nà à goo rèè bo e shi tsɛ, tɔ nà jaamabee fa è baraka ɲan.»
13 Kirisà ɲe kùngɔ màbou Sàrìyaa dangaa suun, à yɛ̀r'la yè bà danga ɲe kamà, kàtsu à sɛbɛɔ̀n ci: «Mòò o moò nà gban gɔɔ̀ rà, tɔ̀ yeè danga.» 14 Tɔ fau, gè riì ni à to, Ibraxima rè dzwɛɛ̀ yè wɔ kun kpɛrɛ mòdzin neè tsɛ è bo Yesù Kirisà ɲàn. Tɔ̀ tsuru, Ŋaablà yeè e re Dzi riì làyiri seun, mìn dzi tɔ̀ tàrà ɲɛynaà baraka rɔ̀n.
Pɔlì nìi dèu Sàrìyaa ko làyir'là tsɛ
15 Àwà n neema ì, mun nà gooma, è kòrò adamadzin mòdzin naa goo fau'n kur'la ka. Nìi mòdzin ne shɛn sen sɛbɛ̀n fauma, è ba faɔ̀ e shi tsɛ taki, mòò pɛn na dzia à mɛɛy, mòò pɛn to na dzia gè bà à tɛ̀y. 16 È ɲɛn tɔ̀ tsɛ, Ŋaablà ci e ye làyir'lèè sen, à yè è seun Ibraximà ko e tsua dziàn rìì lè. À na de ci «à tsua dzin nèè» a ci è gir'lì dɛ, ŋà ci «à tsua dziàn», tɔ̀ niì mòò sɔn, nìi Kirisà. 17 Àwà, mun n'a re min nìi dè, tɔ̀ rii siin: Ŋaabla shɛn sen sɛbɛ̀n fa tsuuŋ bɔrɔɔ, nìi fau e shi tsɛ. Sàrìyaa nàumaà jii caanmoò nààlen ko mòòtsyeùn tɔ̀ shɔ̀ùn, tɔ̀ fa dzi à mɛɛy waa. Tà boshɔ̀ùn, tɔ nà làyir'là bà goo maana. 18 Shɛɛ̀n ye ba na tàr'la Sàrìyaa rìì baraka ɲan, làyir'là dzii naà ni dɛ. Tɔ̀ to y'à tàrà làyir'lì baraka ɲan, Ŋaablà yeè e ɲanwùɔ kpàdèu Ibraximà nà.
Sàriyaa nà kuàn
19 Tà doùn, Sàrìyaa kùàn kɛ̀n ? À nàu nì è ɲɛn làyir'là tsɛ, è Ŋaablà cɛn bar'la goo rèè kpàdè è bè suu fɔ Ibraxima tsua dziàn nàà dzu, làyir'là seun tɔ̀ niì rè. Mɛ̀rɛ̀kɛ rèè rìì y'à gooma deu y'à wɔ mòò sɔn suun, tɔ̀ niì sòrònfabaa. 20 Àwà yè dzin sòrònfabaa, à na baà mòò sɔ̀n goo waa. Ŋà Ŋaablà, à tɔ̀ soo ko e soo rii.
21 Sàrìyaa yè e dzun wɔɔ Ŋaablà re làyir'lèè rà tɔ̀un gbɛ ? Ayi dɛrɛ ! Àwà sàrìya ye ba na sìun nìi dzia bà jaamabee fa saabu, tà doùn, terenbe na dzia tàrà n dzi, è bo Sàrìyaa ɲàn. 22 Ŋà nìi sɛbɛɔ̀n Ŋaablà re Goomaa doùn, tɔ̀ rii yɛ ci mòdzian sapɛ bàu gooɲaan kàsòdzin, gè riì ni à to ɲɛynaà baraka rɔ̀n Yesù Kirisà ɲàn, làyir'lìi seòn, tɔ̀ yeè bo e shi tsɛ ɲɛynamoo rèè rè. 23 Sani ɲɛynaà yè nà, mùn na màrà tsùuŋnà kàsòdzin Sàrìyaa dzuun è ka ɲɛynaà màshu, tɔ̀ niì na nà nà kpàdè. 24 Tà tsuru, Sàrìyaa bàu mùn kààwɔbaa sani Kirisà yè nà, gè riì ni à to ɲɛynaà baraka rɔ̀n, è kpàdè ci mùn tereòn Ŋaablà jaa dzuun. 25 Àwà fɔ̀ ɲɛynaà dziu nà nòn, mùn na ni tɔ̀ kààwɔbaà suun dɛ.
26 È ɲɛn à tsɛ, ye sapɛ bàu Ŋaablà dzin ì ɲɛynaà baraka rɔ̀n, Yesù Kirisà ɲàn. 27 Ɔ̀ɔn, ye nìì reè sapɛ jaara fòoŋ Ŋaablà re shia goo rèè rà Kirisà ɲàn, ye Kirisà jiu e ma a ci mɛ̀yɛ. 28 Tà doùn, Dzyèèsìbee mòdzin na ni dɛ, kun kpɛrɛ mòdzin to na ni dɛ. Jòn na ni dɛ, xɔrɔn to na ni dɛ. Kpiri na ni dɛ, tàan to na ni dɛ. È ɲɛn à tsɛ Yesù Kirisà ɲàn, è sapɛ bàu soo. 29 Àwà ye ye ba Kirisà raa, tɔ̀ y'a kpàdèe ci ye Ibraxima tsua dzin. À to yè kòrò làyir'là ka, ye y'à shɛnsenbaa ì.