Ŋaablà dzinbee tàràù'n kur'la
4
1 Àwà mun nìi dèe tɔ̀ rii siin: è shɛnsenbaà to dziin kòòmɛ̀yn, à bàu watsi o watsi, à to kɛ̀nsɛɛn ye ba gèè sapɛ tsifa, dànfaran pɛn na ni à ko jòn fi waa. 2 Tɔ̀ watsi rɔn, à re goò rèè bàa ni à kààwɔbaa ì, ko à re goo rèè jaabobaa ì rìì suun, fɔ è bè suu à fà rè watsi kpadèumaà dzu. 3 Tɔ̀ soo tsuru, è ɲe sa to dziin koomɛynbeè rà, ɲe yè bà na ni dziɲaan goo rèè suun, ɲe na jon ì rìì. 4 Ŋà watsi riì na kpàdeò tɔ̀ dzii tsyɛun min niì, Ŋaablà yeè e Dzin Kpir'la ka na, è nà kere tàan re, Sàriyaa dzuun. 5 Tɔ fau gè riì ni à to, nìì reè ni Sàriyaa dzuun, è dzi twɛy kùngɔ màbo, mìn dzi Ŋaablà dzinbee tàrà.6 Ye Ŋaablà dzin ì nìi fa, tɔ̀ kamà è Dzin Kpir'la rè Dzia ka na mùn dùsùkuan tsɛ, tɔ̀ yeè bà dziàn fààn na ci: «Bàa, mùn fàà» 7 Tɔ̀ tsuru, wo na jòn dɛ waa, ŋà wo dzin nì. Wo to ye ba dzin, wo shɛnsenbaa sa Ŋaablà baraka rɔ̀n. 8 Dan, ye naà Ŋaablà tɔ waa, ye to na ge ì rè jòn, nìì reè naà Ŋaablà takia waa. 9 Ŋà dòònun, Ŋaablà tɔumaà ye re, mìn dzin Ŋaablà yeè ye tɔ̀ sa kɛ̀, ye bàa dzùrù kɔn ye yè sèè twɛy gè faàn bɛy nafà bɛy reè ma, ye yè bà n'a re ye yè bà kɔn yeu twɛy rè jòn, a ci dan ? 10 Ye jisee reè, ko kuu rèè, ko watsi reè, ko jii reè latsuɔ. 11 Mun vyɛ̀ɛ̀ymaà na pɛn ye ka, à mà nà bà ci mun faagoo ɲaùn nìi fau ye kamà, tɔ bàu maana waa. 12 Neema reè, mun y'à gaa ye re, ye bà a ci mun, kàtsu mun sa ni a ci ye. Ye na goo teren bɛy fa mun ka kàjaa pɛn tsɛ waa. 13 Àwa y'a tɔ̀ ci mun Kùnàgoo Dziɔ̀ dè jaa jɔ̀na nìi fau ye ra, mun tɔ̀ fau ɲìn'nì saabu ɲan. 14 Mun ne ɲìn'nà kpɛ̀ynto bàu byɛnbe brisi ye ma, ŋà tɔ̀ na à to ye yè mun ɲanfyɛnbe, tàmafa ye yè ɲii mun ɲan waa. Ye yɛ̀rɛ̀ to mun kùùntsiu ni a ci Ŋaablà re mɛ̀rɛ̀kɛ, arì Yesù Kirisà tsuru. 15 Taamadzibe rìi na ni ye ɲan tɔ̀ watsi rɔn, tɔ dɔ̀un min ? È ɲɛn à tsɛ mun ye shɛɛrɛ, ci è ba na dzia fa, ye na nà goo sapɛ ko e kuru fa mun ne, arì ye yè e jaadzin neè bo sìn mun na. 16 Tà doùn, mun sààbeen dè niì faa ye ra, tɔ mun bàu ye ɲan gbɛ ?
17 Nìì reè yɛ e ɲanshiɔ̀ ye raa goo rà, è na à faa wùù tsɛ waa. È nìi gaa, tɔ̀ rii yɛ yè ye vyɛ̀ bo ɲe ra, ye yè bà ni e shi ye ra. 18 Nìi wù, tɔ̀ rii yɛ, ye yè bà shiɔ̀ wùɔ rà kudɛyn. À mà bà bàsɔun ci mun ni ye fi watsi riì bwèy waa. 19 Mun dzin nèè, mun byɛnkɔɔn siin ye ka a ci tàan donkunkɔɔn, fɔ Kirisà yè bè e tsuùma bo ye ɲan. 20 Mun sàò na ni min bà ni ye ka mɔn nèe watsi ree ɲan min bà ni n goomau'n kuru tɔ ye ka katsu mun na à tɔ̀ mun nà nìi fa ye kàjaa tsɛ dɛ.
Pɔlì nìi dèu jòn taàn dziàn ko xɔrɔn taàn dziàn raa goò tsɛ
21 Ye nìì reè sào ni ye yè bà ni Sàriyaa dzuun, y'a dè n na, Sàrìyaa nìi dèe ye na tɔ myɛ̀na ɔn ? 22 Awà à sɛbɛɔ̀n ci Ibrahima dzin kpiri fii rìì tàrau. Soo jòn taàn raa, soo yè bà xɔrɔn taàn raa. 23 Ŋà jòn taàn raa dzin kpir'la, tɔ kereu è kòrò gɔɔ̀n raa sàɔ ka. Xɔrɔn taàn raà, tɔ̀ ye kere è kòrò Ŋaablà re làyiri seunmaà ka. 24 Tɔ goò tààmàshɛ̀n goòmà nì, è ɲɛn à tsɛ, tàan fii rèe dzyèèsìbe fii rìì gooma dekɔɔn. Soo, tɔ Sinayiri jèèn raà, nìi Agarì è bà ker'là faa jònbee kamà. 25 Agar'lì yɛ, Sinayirì jèn nìi ni Àràbù jamaan ɲàn. Wò rii dòònun naa Yerusalɛmùn, è ɲɛn à tsɛ, à ni jònbee rà ko e dzin nèè ka. 26 Ŋà jìrànxɔɔ̀ raa Yerusalɛmùn, tɔ xɔrɔnbeò, wò rii to ɲe naà. 27 È ɲɛn à tsɛ, à sɛbɛɔ̀n nèe tsuru ci: «Wo tàan nìi na dzin ker'là waa, ɔ̀ɔn, dzin na ni wo tàan nìi rè waa, a taama dzibe ! Ɔ̀ɔn, wo rìi na ker'là ɲìnìnbe tɔ jà waa, taamadzibe vu bo ! È ɲɛn à tsɛ, tàan bàtoumaà raa dzin nèè nà giribe, è geren kpiritsià raà tsɛ.»
28 Tà doùn, n neema ì, ye làyir'là dzin nèè rìì, a ci Ishakà. 29 Ŋà dan, dzin nìi kereu gɔɔ̀n baraka rɔ̀n, tɔ̀ na Ŋaablà re Dzia baraka rɔ̀n dzin kereumaà byɛɛn nìi tsuru, à ni tɔ̀ tsuru arì she. 30 Ŋà Ŋaablà re goomaa fee dèe mun na, à ci: «Jòn taàn ko e dzin kpir'la kaa, è ɲɛn à tsɛ, jòn taàn dzin kpir'la fa dzi shɛn sen xɔrɔn taàn dzin kpir'la ka waa.» 31 Tà doùn n neema ì, ɲe na jòn taàn dzin ì waa, ŋà ɲe xɔrɔn taàn dzin ì nì.