Pɔlì ci Kirisà mùn xɔrɔnbeu
5
1 Kirisà mùn xɔrɔnbeu ni ci mìn bà xɔrɔn taki ì. Tà doùn, e san gbaunma yè to, e maà dɔ̀n jònbee gɔɔ̀ dzuun kɔn kpɛrɛ dɛ.2 Mun Pɔlì, mun nìi dèe ye ra, tɔ̀ rii yɛ ci e ye e yɛrɛ shɛn, Kirisà fa gèsɔn wùbe e ma dɛ. 3 M'a dè ma fyɛ kɔn ci mòò o moò ye e shɛn, fɔ è sàrìyaa goo rèè sapɛ shi jiì à y'à dzii tsyɛn. 4 Àwà ye nìì reè terenbee gaa Sàrìyaa baraka ɲan, ye yè e vyɛ bou Kirisà rà. Ye mɛrɔn Ŋaablà ɲanwùɔ kàjaa tsɛ. 5 Nìi kpɛ̀yn ɲe, Ŋaablà re Dzia rìì baraka ɲan, ɲe si xɔ à tsɛ, ci Ŋaabla nà ɲe bà mòdzin tereonma ì. Ɲɛynaà baraka ɲan, ɲe tɔ̀ màshua. 6 Àwà Kirisà ɲàn, a shɛun o, a na shɛn ò, nàfa na ni tɔ̀ pɛn ɲan waa. Ŋà nàfa ni nìi ɲàn, tɔ̀ rii yɛ ɲɛynaà nìi faagoò faa, kɛ̀nbààbe baraka ɲan.
7 Ye vwɛ̀rɔ̀n'n kur'la na wù, tsì rii ye jɔɔn shuu ci ye mà sààbeen shi jiì ? 8 È ye sùùsuu jiu nìi rà, tɔ̀ na boo ye kiribaà ɲàn waa. 9 Burufua gè kiɲaanin nì burufa guuŋmaà sapɛ fuà. 10 Nìi mun, Tsìfaà ɲàn, mun kpɛ̀yn ɲɛɔ̀n ye ra. M'a tɔ̀ ye fa e kɛsɛ goo kpɛ̀r'là waa. Ŋà mòò riì ye akiri gbiimaan, à bàu mòò o moò, à tsìfa nà à ra byɛnbee jà.
11 Àwà mun, n neema ì, min bà na shimaangoo rìì waajibi faa arì she, fee na byɛnbe ɲɛn kun mun tsɛ kɔn ? Tà doùn, gbaàn gɔɔ̀, tɔ̀ niì sàn nà baan kpàa, tɔ̀ kùn naà ni dɛ. 12 Nìì reè ye akiri gbiimaan, è mà dàn shimaangoo bàsɔùn mà dɛ, y'à sapɛ kunùn bo peu !
13 Àwà neema reè, nìi kpɛ̀yn ye, ye kiriu xɔrɔnbe rii kamà. Ŋà, tɔ̀ xɔrɔnbee m'à bà saabu, è nà gɔɔ̀n kur'la goo ɲaan faa ka e ma waa. Ye nìi fa, tɔ̀ rii yɛ kɛ̀nbààbee doùn, ye e magoo wɔ e si ɲan. 14 È ɲɛn à tsɛ, Sàrìyaa ko e kuru dzii tsyɛɔ̀n nèe gooma ree ɲan: «A modzìnsia kɛ̀n jàci a yɛr'la.» 15 Ŋà ye ye ba e si ciàn nì, ye e si vyɛ̀ vyɛ̀ɛ, ye e yɛrɛ kaawɔ, e ma nà e si bara do.
Pɔlì ci m'a to Ŋaablà re Dzia yè mùn kuru kun
16 Tà doùn, mun nìi dèe e ra, tɔ̀ rii yɛ, y'a to Ŋaablà re Dzia yè e re jaamabee kuru kun. Tà tsuru, ye fa gɔɔ̀n kur'la goo ɲaan neè fa dɛ. 17 È ɲɛn à tsɛ, goo nìì re dzi gɔɔ̀n rà, twɛy xɔ Ŋaablà re Dzia mà. Nìì reè to dzi Ŋaablà re Dzia rà, twɛy xɔ gɔɔ̀n mà. È fiɛ̀ dzun wɔɔ e si ra, è bè bà ye n'a re ye yè nìi fa, ye na dzia tɔ̀ fa waa. 18 Ŋà Ŋaablà re Dzia rìì ye ba ye kuru kuɔ, tɔ̀ y'a kpàdèe ci ye na ni Sàrìyaa dzuun dɛ.
19 Gɔɔ̀n ɲàn goo ɲaan neè gè niì, mùn twɛy tɔ̀. Ye rìì yɛ: kɛ̀kɛ̀ɛ̀ybeè, noo goo, seebɛybeè, 20 ɲɔ̀nkɔɔ, tɔ̀goò, ɲanbee, kaà, jaaɲininbeè, vununtaà, wɔsiunbeè, fi vyɛɛ, byɛ̀nbɛ̀ybeè, 21 kur'la goo ɲaan neè, dɔ̀ɔ̀kɔ̀ɔ̀nbeè, ɲwɛynamoobeè ko twɛy tsuru goo rèè. Min sar'la e ra a ci m'a dèu nìi tsuru nòn, ci nìì reè ni twɛy goo rèè fyɛ̀'un, twɛy dzii na ni Ŋaablà re màsàbee goo rèè ɲàn waa.
22 Ŋà Ŋaablà re Dzia, tɔ̀ dziàn nì siin: kɛ̀nbààbee, taamadzibeè, jaanciàn, mɔ̀ɲɔɔn, wùɔ, duunwubee, ɲɛynaà 23 vununmaciàn, yɛ̀rɛ̀kuan. Sàrìya pɛn na kaa faa twɛy goo rèè ka waa. 24 Nìì reè Kirisà raa, twɛy gɔɔ̀n dzibee goo reè ko e kur'la goo ɲaan neè sapɛ gbaun gɔɔ̀ rà. 25 Mìn ba jaamabee faa Ŋaablà re Dzia rìì baraka ɲan, mùn y'a to sa tɔ̀ yeè mùn kuru kun. 26 N mà e yɛrɛ blabe waa, n mà e si dzu gaa waa, mùn to mà e si jaaɲininbe waa.