Mìn e si re seyn sen
6
1 N neema ì, mòò ye kun fìrìgoò sɔn na, Ŋaablà re Dzia ye nìì reè kuru kuɔn, ye sèè na à tsìfa ka shi tereunmaà tsɛ, vununmacin ka. Ŋà a sa y'a yɛrɛ kun, dzuunboi mà nà a sa tara waa. 2 Ye e si re seyn sen. Tà tsuru ye nà Kirisà rè sàrìyaa dzii tsyɛn. 3 Àwà mòdzian sɔn ye ba à kɛ̀sɛɛ̀ ci wo gèè sɔn, tɔ̀ to y'à tàrà à na gèsɔn pɛn waa, tɔ̀ yeè e yɛrɛ maniɛ̀n. 4 Mòdzian soo soo sapɛ yeè e yɛr'la faadziɛ ɲansiin, à ye yɛ̀rɛ̀blàbè kun jà à ɲan e yɛr'le, à dzia e yɛrɛ blabe, ŋà à mà e ko mòò kpɛrɛ gɔ̀n waa. 5 È ɲɛn à tsɛ, mùn soo sookɔn sapɛ nà e re seyn sen.6 Mòò riì kàr'na Ŋaablà re goomaa nà, à wù tɔ̀ yeè e karànbaà nìn bo e suun ge reè sapɛ ɲan. 7 E maà e yɛrɛ maniin dɛ, mòò na jiraàn Ŋaablà ma waa. E gèdzin niì sì, a tɔ̀ shìmàndzian nì gaa. 8 È ɲɛn à tsɛ, mòò riì ye e gɔɔ̀n kur'la goo ɲaan neè gèdzian sì, tɔ nà gɔɔ̀n shìmàndzian gaa, nìi baragoò. Mòò riì to ye Ŋaablà re Dzia gèdzian sì, tɔ nà Ŋaablà re Dzia shìmàndzian gaa, nìi jaamabe dziù dòbɛɛ. 9 Àwà mùn mà byɛn goowuu faa rà waa. È ɲɛn à tsɛ, mùn ma tɔ̀ dzii bà fyeu, mùn nà nà à shìmaan gaa e watsi wuu ɲan. 10 Tà tsuru, goowùɔ jaa wùù ye ba ni watsi o watsi, mùn y'a fa mòdzian sapɛ re, mùn ɲɛynamoosi reè raà yè geren.
Làtsìì latan neè
11 Ye sɛbɛndzin neè siin, è kùn blàbee nìi boò. À mun yɛ̀r'la sià rè sɛbɛunma nì, è sìn ye ra. 12 Nìì reè sapɛ ci fɔ ye yè shɛn, twɛy tɔ̀ faa rìì y'à ka e yɛrɛ kpadè cɛyn gɔɔ̀n kàjaa tsɛ. À kùàn nì yɛ, è mà ye byɛn Kirisà gbaàn gɔɔ̀ kamà waa. 13 Tɔ̀ y'a tara, è nìì reè yè e shɛɛ̀n, ye yɛ̀r'leè tsu na Sàrìyaa shi jiɛ waa. È sàɔ rìì yɛ, ye yè bà ni e shɛn, ye yè tɔ̀ ka e yɛrɛ blabe ye gɔɔ̀n yè bà saabu. 14 Mun ne, yɛ̀rɛ̀blàbè kun kpɛrɛ na ni mun ne mùn Tsìfà Yesù Kirisà gbaàn gɔɔ̀n tɛ̀y waa. È ɲɛn à tsɛ, dziɲaan saun mun ne tɔ̀ gbaàn gɔɔ̀n yè bà saabu, mun sa yeè san dziɲaan rè. 15 È ɲɛn à tsɛ, a shɛun o, a na shɛn ò, tɔ̀ pɛn na kùn waa. Nàfa ni nìi ɲàn, e bà gè ɲɛunma yeu. 16 Àwà nìì reè sapɛ tɔ̀ goò shi jiɛ, mun ci Ŋaablà re jaanciàn ko à re màtsur'la yè bà ni twɛy sapɛ tsɛ, ko à re Isirayɛlì.
17 Nèe shɔ̀ùn, mòò pɛn mà byɛnbe shi mun na dɛ, è ɲɛn à tsɛ nìi mun, Kirisà fyɛ̀ rèè ni mun gɔɔ̀n rà.
18 Arì she, mùn Tsìfa Yesù Kirisà ɲanwùɔ yè bà ni e tsɛ n neema ì ! Àmiinà !