Pɔlì sɛbɛn niì kau
Efɛsika reè rè
Sɛbɛɛn kaɔ nìì reè rè, ko dzwɛɛ̀
1
1 Mun Pɔli, Yesù Kirisà rè kɛɛradzian Ŋaablà saɔ baraka rɔ̀n, nèe mun ne sɛbɛn è sìn Ŋaablà re mòò rèè rà Efɛsì wɔ̀ rɔ̀n, nìì reè ɲɛɔ̀n Yesù Kirisà rà. 2 Arì she, Ŋaablà ɲanwùɔ ko jaanciàn, mùn Fà Ŋaablà ko Tsìfa Yesù Kirisà yè twɛy sìn e ra.Dzwɛ dziitsyɛunma nìi tàràu Kirisà baraka rɔ̀n
3 Tsoo dzi yeè ɲɛn Ŋaa tsɛ, mùn Tsìfa Yesù Kirisà Fàà, wò riì yè e re Dzia dzwɛɛ̀ sapɛ ladzyèèmaa kuun mùn mà jìrànxɔɔ̀ doùn, Kirisà ɲàn. 4 Sani dziɲaan yè ɲɛn, à na ɲe ɲankɛrɛn boo nòn Kirisà ɲàn e jaara, gè riì ni à to ɲe yè bà fɛnɛ ì ko jààkìbɛy ì à jaa dzuun, à re kɛ̀nbààbee doùn. 5 Fɔ dzunjɔnma nɔ̀n, à y'à latigɛu è ɲe bà e dzin ì Yesù Kirisà baraka rɔ̀n, a ci a dzi à ra nìi tsuru è kòrò à ɲanwùɔ ka. 6 À tɔ̀ fau mìn bà ni tsoo dzi ɲɛn à tsɛ, è ɲɛn à ɲanwùù nɔɔrɔmaa tsɛ, à tɔ̀ niì sìn jiu mùn na à re kɛ̀niumaà baraka rɔ̀n. 7 À ɲan, mùn kùngɔ mabou à tsìɛn baraka rɔ̀n, mùn ne gooɲaan tsii reè yè mɛɛy bo mùn vu ra è kòrò à ɲanwùù brisià ka. 8 À mùn kɔ̀u tɔ̀ ra giri, akiriblabee ko akiritsifabee sapɛ ka. 9 À sàɔ gòndo riì na mɛnɛn tsùuŋnà fɔ dan à tɔ̀ kpàdeu mùn na a ci à dzi à ra nìi tsuru, è kòrò à re làtigɛɛ ka, Kirisà ɲàn. 10 Tɔ̀ làtigɛɛ doùn, à nà nìi fa, tɔ̀ rii yɛ, tɔ̀ watsia dzii ye tsyɛn watsi riì bwèy, è jìrànxɔ̀ dòùn gee sapɛ, ko dzɔ̀nxɔ̀ tsɛ̀ gee sapɛ ladzyèè soo, kùntsii soo yeè bà ni è sapɛ re, nìi Yesù Kirisà.
11 Kirisà rìì ɲàn sa, ɲe ɲankɛrɛun, ɲe to yè bo tsùù Ŋaablà raa fɔ dzunjɔnma nɔ̀n, è kòrò ko à saɔ ka, wò riì goo sapɛ latigɛ̀ɛ a ci à y'à sàò nìi tsuru. 12 Tà doùn, ɲe nìì reè tabeu ɲe yè e si xɔbe Kirisà tsɛ, mìn blàbe ɲɛn à nɔɔrɔɔ̀ tsɛ.
13 Àwà Kirisà rìì ɲàn sa, ye sààbeen goomaa myɛ̀un, nìi ye tsià Kùnàgoo Dziɔ̀ goomaa. Wò rii sa ɲan kɔn ye ɲɛyna fau, Ŋaablà to yè tààmàshɛn tsuù ye tsɛ, à re Dzi Fɛnɛɛ tààmàshɛɛn, à na tɔ̀ niì làyiri seòn. 14 Tɔ̀ Dzia rìì ɲe re shɛɛ̀n gè jɔɔn gèè, è kpàdè ci nìì reè bàu Ŋaablà raa, à nà twɛy kùngɔ màbo, yè bà ni blàbe ɲɛn à nɔɔrɔɔ̀ tsɛ.
Pɔl'lè màfyɛɛ̀n Efɛsì ɲɛynamoo kur'là rè
15 Tɔ̀ kamà, ye ɲɛɔ̀n Tsìfa Yesù Kirisà rà ɲɛun'n kur'liì rà, ye to Ŋaablà re mòò rèè sapɛ kɛniɔ̀n kɛ̀nìun'n kur'liì rà, mun toro jiumaà tɔ̀ goomaà ɲàn, 16 kudɛyn mun baraka sìan Ŋaablà ra ye kamà, mun taa to yè bà ni ye mà n ne màfyɛyn nèè doùn. 17 Mun tɔ̀ faa, gè riì ni à to, mùn Tsìfa Yesù Kirisà rè Ŋaablà, nɔɔrɔɔ̀ Fàà, tɔ̀ yeè akiriblà sìn ye ra, è bà goo rèè kpàdèe, ye yè dzi Ŋaablà tɔ cɛyn. 18 Arì she, è vyevyee bo e dusùkuan jaa rèè rè, ye bà ni à tɔ̀, à ye kiriɔ è ɲɛn siɲɛnma gban gban niì tsɛ. À to nà e nɔɔrɔɔ̀ shɛn blà riì sìn ye ra e re mòò rèè ka, ye yè tɔ̀ sa tɔ. 19 Tà ko, à re dzibaabee blàbee si gereunmaà nìi boò ɲe ɲɛyna moo rèè kàjaa tsɛ, è kòrò à ɲan fàan dzibaabee ŋɔ̀ɔ̀n ka, ye yè tɔ̀ tɔ̀. 20 À tɔ̀ ka faagoò fau Kirisà ɲàn, nìi yɛ à y'à kpunan bo fùn nèè fi, à yè b'a tsùù e sirama si jaa rè jìrànxɔɔ̀ doùn mɔn. 21 À tsùuŋ mɔn, è bà ni kùùntsììbe reè sapɛ kuùn, fààn reè sapɛ, dzia sapɛ, tsìfàbe reè sapɛ ko tsoo kirikɔɔn reè sapɛ, twɛy tsoo nìì reè ni she, ko watsi nakɔɔn raa rèè sa. 22 Ɔ̀ɔn, à gè sapɛ wɔu à sàn dzuun, è bà ni goo sapɛ kuùn, à y'à bà ɲɛynamoo kur'là kùntsii. 23 À gɔɔ̀n, tɔ ɲɛynamoo kur'là rìì, tɔ̀ niì y'à dzii tsyɛunmaà a ci à gè sapɛ tsyɛɔ̀n nìi tsuru.