Pɔlì ci mùn tsià Ŋaablà ɲanwùɔ rìì baraka ɲan
2
1 Àwà, è kòrò ye re fìrìgoo rèè ko ye re gooɲaan neè ka, ye na saɔn. 2 Ye na ni twɛy goo tsu rèè ɲàn dan, ye yè bà na jìɛ è kòrò nèe dziɲan ree ko e kuntsiɛ̀ rè goo fau'n kur'la ka, nìi kwey rèè kùntsiɛ̀. Tɔ̀ dzia to bèe jɔɔn she, è faagoò fa mòdzin mabaunma rèè ɲàn Ŋaablà ma. 3 Ɲe sapɛ, ɲe sa na twɛy mòdzin neè kur'li. Ɲe sa na gɔɔ̀n kur'la goo ɲaan neè shi jiɛ dan, ɲe y'à sàɔ faa, ɲe yè e gban kɛ̀sɛmà ɲaan neè kpɛyn. Àwà, è ɲe to tà tsuru, Ŋaablà re vununtaà na ni ɲe sa tsɛ, a ci dzyee rèè.4 Ŋà Ŋaablà ɲan màtsur'la blà è bà mùn kɛ̀niɔ̀n kɛ̀nbààbe brisi ka. 5 Tɔ̀ kamà, ɲe nìì reè na saɔn e ɲɛn ɲe re fìrìgoo rèè tsɛ, à ɲe bàu jaama ko Kirisà kà. À ɲanwùɔ rìì baraka ɲan, ye tsiɔ. 6 Yesù Kirisà ɲàn à ɲe kpunan bou saàn ɲàn esire, è ɲe tsùù jìrànxɔɔ̀ doùn esire à ka. 7 À tɔ̀ fau, è bà ni e ɲanwùù brisi dàn tɔ̀ bɛɛ kpàdè watsi nakɔɔn doùn è kòrò à re wùɔ ka mùn kàjaa tsɛ, Yesù Kirisà ɲàn. 8 Àwà ye tsiɔ Ŋaablà ɲanwùɔ rìì baraka ɲan, ɲɛynaà saabu rɔ̀n. Tɔ̀ na boo ye yɛ̀r'leè ɲàn waa, à Ŋaablà re kɔ̀ì rii. 9 À na faadzii ì fyɛ̀ waa, gè riì ni à to mòò pɛn mà nà e yɛrɛ blabe. 10 È ɲɛn à tsɛ, ɲe Ŋaablà sifyɛ̀ɛ̀ rìì. À ɲe ɲɛun Yesù Kirisà ɲàn goowuu faa rìì kamà, à na tɔ̀ niì lamɔnɔ̀n tsùuŋnà nòn, mìn bà ni na à shi jiì.
Pɔlì ci Kirisà ɲàn, Dzyèèsìbee mòdzin ko kun kpɛrɛ mòdzin sa bàu soo
11 Àwà ye e taa to ci ye na kun kpɛrɛ dzin ì dan, è ɲɛn gɔɔ̀n tsɛ, Dzyèèsìbee mòdzin neè yè bà na ye kir'la ci shɛn bɛy reè, ye yè bà shɛunma rèè. Tɔ̀ to y'à tàrà, tɔ̀ shimangoo na mòdzin si fyɛ̀ rìì è gɔɔ̀n ɲàn. 12 Ye e taa to ci tɔ̀ watsi rɔn, ye na Ŋaablà jaara modziàn bɛy, ye nìn to naà ni Isirayɛlidzin neè ka waa. Ye na tɔnɔn ì Ŋaablà re dzyèèsìbe reè ko à re làyir'là kàjaa tsɛ. Siɲɛnma naà ni ye re waa, ye to na Ŋaabla bɛy ì dziɲan ree doùn. 13 Ŋà dòònun, è ye to Kirisà ɲàn, ye nìì reè dàn na gbàn Ŋaablà ra dan, Kirisà tsìɛn baraka rɔ̀n, ye tsyɛnbeu.
14 Àwà wò rii mùn ne jaanciàn. Dzyèèsìbee mòdzin sen ɲɛn kun kpɛrɛ mòdzin tsɛ, wò rii twɛy fiɛ̀ sa bau soo. Si kpɛynbee sin niì na ni è ko e si fi, è tɔ̀ ci à gɔɔ̀n sìunmaà baraka rɔ̀n. 15 À Sàrìyaa dzugooma xɔù rèè mɛrɔn, à y'à shi kpadèuma rèè mɛɛy, gè riì ni à to è Dzyèèsìbee mòdzian ko kun kpɛrɛ mòdzian bà mòò sɔ̀n dzin soo yeu, jaancin yè bà ni è ko e si fi. 16 À yè è fiɛ̀ sa ba gɔn soo, è byɛ̀n dɔ̀n è ko Ŋaablà fi. Gbaàn gɔɔ̀ baraka rɔ̀n, è si kpɛynbee bo è ko e si fi peu. 17 Tà tsuru, ye nìì reè dàn na gbàn, à nàu jaanciàn Kunàgoo Dziɔ̀ gooma de ye ra, nìì reè tsyɛn, à y'à dè twɛy ra. 18 È ɲɛn à tsɛ, à baraka ɲan, mùn soo soo sapɛ dzia e kpɛrɛ Fà Ŋaablà ra, à re Dzia soo baraka rɔ̀n.
19 Tà doùn, ye na tɔnɔn ì dɛ, ye to na gànè kpɛ̀rɛ̀ dzin ì dɛ. Ye ko Ŋaablà re mòò rèè sapɛ bàu a ci jàmààn sòò dzin ì, ye bàu Ŋaablà re gbà dòùn dzin ì. 20 Ye bàu gbà jiuma, kɛɛradzin neè ko kɛɛra reè nìi dzunbama, Yesù yɛ̀r'la yè bà à nɔ̀nkɔ̀n kpaa. 21 Wò rìì baraka ɲan gbàà ko e kur'la yeè e si kuàn kpan, è koo, è bà Ŋaa blabe gba fɛnɛ Tsìfaà rè. 22 Wò rii ɲàn sa, ye bàu ni gbà ree jiumaà ɲàn ko dzyee rèè ka, gbà nìi bàu Ŋaablà tsuùma, à re Dzia baraka rɔ̀n.