Kirisà raa goò gòndoo
3
1 È ɲɛn tɔ̀ tsɛ, mun Pɔlì, mun Yesù Kirisà rè kàsòdzin ye kun kpɛrɛ mòdzin neè kamà. 2 Ŋaablà ɲanwùɔ doùn, à faagoo rìi kɛ̀ɛ̀yfaɔ̀ mun mà ci mun y'à fa ye kàjaa tsɛ, ye kpɛ̀yn toro jiɔ̀ tɔ̀ ɲan. 3 Mun yè tɔ̀ gòndoo tɔ̀, tɔ kpàdèu mun na ni, a ci mun y'à dɛyn sɛbɛn dɔun nìi tsuru mun y'à dè ye ra. 4 Tɔ̀ kàrànkɔɔn doùn, akir'lìi ni mun ne min dzi Kirisà rè gòndoo tɔ̀, ye yɛ̀r'la nà à jà. 5 Tɔ̀ gòndoo gooma na de watsi dɔn boumaà mòdzin neè rà waa, a ci à yɛ kpàdèu nìi tsuru dòònun, Ŋaablà re kɛɛradzin reè ko kɛɛra reè rà, à re Dzia baraka rɔ̀n. 6 Tɔ̀ gòndoo rìì yɛ, Yesu Kirisà ɲàn, kun kpɛrɛ mòdzin neè, ko Dzyèèsìbee mòdzin sapɛ bàu e si shɛnsensi. È sa bàu gɔnkungɔ soo, è sa nin yè jà Ŋaablà re làyiri seunmaà ɲàn, Kùnàgoo Dziɔ̀ baraka rɔ̀n.7 È kòrò Ŋaablà ɲanwùɔ kɔ̀ìgeè ka, à tɔ̀ niì sìun mun na e re dzibaabee faagoò baraka rɔ̀n, mun bàu tɔ̀ Kùnàgoo Dziɔ̀ faagoofabaa. 8 Mun nìi Ŋaablà re mòò rèè sapɛ ɲan kiɲaaniàn, à yè e ɲanwùù reè kɛ̀ɛ̀yfau mun nì mà, nìi yɛ min Kùnàgoo Dziɔ̀ dè kun kpɛrɛ mòdzin neè rà, Kirisà ɲàn nàforo dan tɔ̀ bɛɛ. 9 Tɔ̀ gòndo riì na mɛnɛn tsùuŋnà fɔ watsi gbaan gè sapɛ ɲɛnbaa Ŋaablà ɲan, tɔ nà kun nìi tsuru, min tɔ̀ bo vyevyeè rà mòdzian sapɛ re. 10 Tɔ̀ yeè fa, gè riì ni à to, jìranxɔ rɔ̀n kùntsii rèè kò fààntsi rèè y'à tɔ̀ dòònun ɲɛynamoo kur'là baraka rɔ̀n, Ŋaablà ɲan akiriblabee kaatsia giribee nìi boò. 11 À tɔ̀ fau Yesù Kirisà ɲàn, mùn Tsìfaà, è kòrò à re goo dò bɛy sɔn byɛ̀unmaà ka. 12 Kirisà rìì ɲàn, ɲɛynaà baraka ɲan à ra, mùn ko akiri tsuu dzia e kpɛrɛ Ŋaablà ra, mìn gooma à ka, mùn na shiɔ̀ waa. 13 Tà doùn, mun nìi gaa ye re, tɔ̀ rii yɛ, ci mun ni byɛnbe riì rà ye kamà, tɔ mà e gɔn vun waa. È ɲɛn à tsɛ, tɔ nɔɔrɔ rìì ɲɛɛn ye tsɛ.
Pɔl'lè màfyɛɛ̀n Efɛsì ɲɛynamoo kur'là rè
14 Tɔ̀ kamà, min kunun gbaàn Fà Ŋaablà biìn, 15 tɔ̀ niì tsoo ɲɛɔ̀n jìrànxɔ rɔ̀n mòdzìnbe reè ko dzɔ̀nxɔɔ̀ tsɛ raa rèè sapɛ tsɛ. 16 È ɲɛn à re nɔɔrɔ brìsià tsɛ, m'a gaa è fààn wɔ ye ɲan duùn nɔn ko dzibaabe ka, à re Dzia baraka rɔ̀n. 17 Àwà m'a gaa sa, Kirisà yè e tsuùma bo ye dùsùkuan doùn, ɲɛynaà baraka rɔ̀n. Ye jiɛ̀ ye gban kɛ̀nbààbee ɲàn, ye dzu'un bau'n kuru yeè bà wù à tsɛ. 18 Tà tsuru, Kirisà rè kɛ̀nbààbee jaa blabee, ko a jaa gbanbee, ko a koobee, ko a tsunbee nìi boò, ye yè bà ni tɔ̀ fàànmun ko Ŋaablà re mòò rèè sapɛ ka. 19 Ɔ̀ɔn, ye yè Kirisà rè kɛ̀nbààbee tɔ̀, tɔ̀ niì gereon mòdzin tɔmaà sapɛ tsɛ, ye ɲan yeè bà ni tsyɛn Ŋaablà ɲan, tsyɛun'n kur'la sapɛ ra.