Pɔlì ci Kirisà ɲàn, ɲɛynamoo rèè sapɛ gè soo
4
1 Àyìwà, mun nìi kàsòdzin Tsìfaà kamà, m'a gaa e re ci e kiriɔ è ɲɛn kùn nìi tsɛ, ye maxɔbe ye re jaamabee fa, è kòrò tɔ̀ ka. 2 Ye e majàà, ye e vunun mà cin, ye e mɔɲɔn. Ye e si re goo ku kɛ̀nbààbe doùn. 3 Ŋaablà re Dzia ye bà niì faɔ̀ soo, à re jaanciàn yè bà ye shiɔ̀ e si ra, ye maxɔbe ye tɔ̀ màrà. 4 Gɔn soo pe rii ni, Ŋaablà re Dzi soo pe yeè bà ni, a ci Ŋaabla ye sa kiriɔ siɲɛnma soo pe kamà nìi tsuru. 5 Tsìfa soo pe rii ni, ko ɲɛyna soo pe, ko jaara foo soo pe. 6 Ŋaablà soo pe rii ni, tɔ̀ riì mùn sapɛ Fa, à ni mùn sapɛ kuùn, a faagoò faa mùn sapɛ ka, è bà ni mùn sapɛ ɲan.7 À mùn soo soo sapɛ kɔu e ɲanwùɔ rà, è kòrò Kirisà rè kɔ̀ìgeè bɛ̀r'la sìunmaà ka mùn na. 8 Tɔ̀ kamà à deò ci: «À tèyn bèumaà jiran nɔ̀n, à mòdzin kuunma ì kun bèu, è mòdzian kɔ̀ ge ì rà.»
9 È de ci à tèron jiran nɔ̀n, tɔ̀ dzuun fee ? Tɔ̀ rii yɛ, ci à jàaŋ fɔ dzɔ̀nxɔɔ̀ gɔngwɛyn jaa reè tsɛ ŋe. 10 Àwà nìi jàaŋ, tɔ̀ sɔ̀ɔ̀n rìì tèron fɔ jìrànxɔɔ̀ jiraàn doùn mɔn, è bà ni min niì sapɛ tsyɛn. 11 Wò rii swey bou yè bà kɛɛradzin ì, swey yè bà kɛɛra ì, swey yè bà kùnàgòòdzìùdebaa ì, swey yè bà kplatsuuba ì ko kààmoo ì. 12 À tɔ̀ fau, è bà ni Ŋaablà re mòò rèè màbyɛ̀n faagoò kamà, Kirisà gɔɔ̀n yè bà ni fààn tarà. 13 Tɔ̀ yeè fa, fɔ̀ mùn sa yeè bà soo ɲɛynaà ko Ŋaablà Dzin Kpir'la tɔ̀ɔ̀ doùn. Mìn bɔɔ, mìn Kirisà dziitsyɛunmaà bɛ̀r'la kaa kun. 14 Tà tsuru mùn fa bà dziin kòòmɛ̀yn ì dɛ, nìì reè fìfa beè min niì sapɛ, fyɛn kaatsia sapɛ yeè è sen beè, nìì yɛ kàr'nà kaatsià sapɛ, mòdzian twɛy nìì reè ka mòdzian akiri shɔɔ̀n, y'à ka è sàn fìrì sànbe doùn. 15 Ŋà mùn ye sààbeen dè ko kɛ̀nbààbe ka, mùn nà bɔɔ goò sapɛ doùn Kirisà ɲàn, tɔ̀ niì kùngɔɔ̀. 16 Wò rii baraka ɲan, gɔɔ̀n ko e kur'la sapɛ yeè e si kuɔn è bà soo, xɔtsuma rèè y'à tsù e si ra. Tɔ̀ tsuru, à yè è soo soo sa to e raa faagoò rà, gɔɔ̀n ko e kur'la bɔɔbèe è fààn tarà, kɛ̀nbààbee doùn.
Pɔlì nìi dèu jaamabe yee tsɛ Kirisà ɲàn
17 Àyìwà, mun nà nìi dè m'a fyɛ ye ra Tsìfaà ɲàn, tɔ̀ rii yɛ ci e maà e raa jaamabee fa a ci Ŋaabla tɔ bɛy reè dɛ, twɛy nìì reè yè e raa jaamabee faa e kɛsɛmà fuɔ tsɛ. 18 È akir'là ni tsitsiɛ̀ ɲàn, yè bà tɔnɔn ì Ŋaablà re jaamabee kàjaa tsɛ, è ɲɛn è ɲan tɔ̀bɛ̀ybeè tsɛ ko è re dùsùkùnxɔ̀beè. 19 Seey pɛn na ni è ra dɛ, yè e yɛrɛ siun seebɛybeè rà, è jaàn yè bo goo nooŋmaà kaatsià sapɛ re, y'à fa, è na e yɛrɛ kun waa.
20 Ŋà nìi ye, ye na Kirisà raa goò kàràn tɔ̀ tsuru dɛ ! 21 Ɔ̀ɔn, ye kpɛ̀ynto ye ba wò rii lamyɛun taki, ye yè kàràn à ɲan è kòrò ko sààbeen ka, tɔ̀ niì ni Yesù ɲàn. 22 Tɔ̀ dzuɔn nì yɛ ye san bo e re jaamabe bɔrɔɔ goo rèè ɲàn, nìi juu bɔrɔɔ, tɔ̀ niì nàa bar'la ka, è ɲɛn sànfir'la kur'la goo ɲaan neè tsɛ. 23 E akir'là yè e lakere ba yeu, kɛ̀sɛmàà kàjaa tsɛ. 24 Ye juu ye sen è kòrò e ɲɛun'n kur'la ka Ŋaablà re, terenbee ko fɛnɛbee doùn, è bo saabeen ɲàn.
25 Tɔ̀ kamà, ye doò dzii bà, ye sààbeen dè e si ra, è ɲɛn à tsɛ mùn sapɛ yeè e si gɔɔ̀n gàne rèè sɔn ni. 26 E vunun ye ta, e maà gooɲaan fa waa. Bwèè to mà dò, è vunun tauma to waa. 27 E maà gàne pɛn to Sànwɔbaà rè waa. 28 Mòò riì na shɔnbe faa, tɔ̀ yeè shɔnbeè dzii bà. È maxɔbe, è faagoo dàaŋma fa e yɛr'la si rèè ka, gè riì n'a to mòò riì màgoo ni gè ra, è dzi tɔ̀ kɔ̀. 29 Gooma ɲaan pɛn mà bo e dzu, fɔ̀ gooma wuu, nìi dzia fààn wɔ e myɛnbaa rèè ɲàn, è wùù fa è ra, à màgoo ye ba ni. 30 E maà Ŋaablà re Dzi Fɛnɛɛ taama ŋununbe waa, à tɔ̀ riì tsùuŋnà tààmàshɛn ye tsɛ, ye kùnngɔ màbo jisee kamà. 31 Xɔnasonbeè, vununɲanbeè, vununtaà, màànkaan, ɲɛ̀ɛn, ɲanbee kaatsià sapɛ, twɛy sapɛ yeè bo e fi. 32 Yè wùù fa e si ra, ye màtsuru e si ra. Ye yɛrɛ to e si re, a ci Ŋaablà sa yeè e yɛrɛ tou ye re nìi tsuru, Kirisà baraka rɔ̀n.