Pɔlì ci ɲɛynamoo rèè yè e re jaamabee fa vyeevyeè ɲàn
5
1 Tà doùn, Ŋaabla ye nìì reè kɛ̀niɔ̀n e dzin, ye bà à shɔ̀ùnminabaa ì. 2 Ye e re jaamabee fa kɛ̀nbààbee tsɛ, a ci Kirisà sa mùn kɛ̀niun nìi tsuru, è yɛrɛ sin mùn kamà kɔ̀ìge ko saaka, nìi kinìn dzi Ŋaablà ra. 3 Kɛ̀kɛ̀ɛ̀ybeè ko goo nooŋmaà kaatsi gè o ge, ko jaacɛnbɛybeè, twɛy tsoo tsu mà kiri e fi waa, kàtsu tɔ̀ na dàaŋnà Ŋaablà re mòò rèè fi waa. 4 Seey bɛy goòmà rèè, gooma kuntan neè ko gooma kor'nèè, twɛy tsu na dàaŋnà, fɔ gooma niì reè baraka sìan Ŋaablà ra. 5 Ye b'a tɔ̀, ci mòdzin kɛkɛ̀ɛ̀raa, ko mòdzin nooŋmaà, ko mòdzin jaacɛnbɛɛ, tɔ̀ niì ko ɲɔ̀nkɔbaa sa soo, twɛy pɛn dzii na ni Kirisà ko Ŋaablà re màsàbee ɲàn waa.6 E maà à to mòò pɛn yè e san fìrì e re gooma nafà bɛy ì ka waa. Tɔ̀ rii y'à to Ŋaablà re vununtaà wɔɔ̀ à dzugoomaa shi jiì bɛy reè tsɛ. 7 Tà doùn, e maà dzyèè è ka goo sɔn pɛn na waa. 8 Dan, ye na ni tsitsiɛ̀ ɲàn, ŋà dòònun, Tsìfaà ɲàn, ye bàu ni vyevyee ɲàn. Tà doùn, ye e re jaamabee fa a ci vyevyee dzin ì. 9 È ɲɛn à tsɛ, vyevyeè dziàn nì yɛ goowùɔ sapɛ, terenbee sapɛ, sààbeen sapɛ. 10 Goo nìi dzi Tsìfaà rà, ye tɔ̀ gaa tɔ. 11 Tsitsii dzuun goo nafà bɛy reè, e maà e san ji twɛy ɲàn waa, ye è dzuun ni bo. 12 È ɲɛn à tsɛ, twɛ̀y mòdzin neè goo nìì reè faa mɛnɛn doùn, è dèkɔɔn sa seey. 13 Ŋà è dzuun ye dzi bo nòn, è kpàdèu vyevyeè rà. 14 Goo o goo to ye dzi kpadè nòn, tɔ bàu vyevyee. Tɔ̀ kamà è bà deò nèe tsuru ci: «Wo rìi ni ciɛ̀ rà, kpunan e fù bo fùn nèè fi, Kirisà nà e vyevyeè bo wo tsɛ.»
15 Ye e yɛrɛ kaàwɔ taki e re jaamabee fau'n kur'la rà. E maà bà mòdzin akiri bɛy ì waa, ye bà mòdzin akiritsi ì. 16 Ye watsia kùngɔ màbo, kàtsu mùn ni jisee ɲaan i ɲàn. 17 È ɲɛn tɔ̀ tsɛ, e maà bà mòdzin akiri bɛy ì waa, ŋà Tsìfaà sàɔ nìi, ye tɔ̀ rii gaa tɔ̀. 18 E maà mìɛn fa tɔ̀ yeè e cɛn waa, tɔ nàa màgòò san ka. Ye cɛn Ŋaablà re Dzia rìì là. 19 Ye zàbùrù ye ì, ko màkìrì ye ì, ko Ŋaa blabe ye ì cèè, y'a ka gooma e si ra. Ɔ̀ɔn ye ye ì cèè Tsìfaà rè, ye tsoo dzi ɲɛn à tsɛ e duɔ̀n sapɛ ka ! 20 Ye baraka sìan mùn Fà Ŋaablà ra watsi sapɛ, goo sapɛ doùn, mùn Tsìfa Yesù Kirisà tsoo ra.
Tsùɔ̀ fau'n kur'la kpir'leè ko tàan rèè fi
21 Kirisà jɔɔn shiɲaanbe kamà, ye e majàà e si re. 22 Tàan rèè yè e majàà e re kpir'leè rè, a ci yè e majàaŋnà Tsìfaà rè nìi tsuru. 23 È ɲɛn à tsɛ, kpir'la rìì taàn kùntsii a ci Kirisà sa ɲɛynamoo kur'là kùntsii nìi tsuru. Ɲɛynamoo kur'là y'à gɔɔ̀n, è bà ɲɛynamoo kur'là Tsibaa. 24 Tà doùn, a ci ɲɛynamoo kur'là yè e majàaŋnà Kirisà rè nìi tsuru, tàan rèè sa yeè e majàà e re kpir'leè rè, goò sapɛ doùn.
25 Kpir'leè, ye e re tààn rèè kɛ̀n a ci Kirisà sa ɲɛynamoo kur'là kɛ̀niun nìi tsuru, è yɛrɛ sin à kamà. 26 À tɔ̀ fau, è bà ni à fɛnɛbe, à fòoŋmaà shɔ̀ùn è fyɛ, yuà ko Ŋaablà re goomaa baraka rɔ̀n. 27 À y'à fa, gè riì ni à to, ɲɛynamoo kur'là yè kpàdè wò jaaterema ko nɔɔrɔ ka, fyɛ̀ na ni nìi rà waa, ɲɔ̀ɔ̀ɲɔ̀rɔ̀ma na ni à ra waa, ko twɛy tsur'lèè pɛn, ŋà à fɛnɛɔ̀, jaama pɛn to na ni à ra waa. 28 Tɔ̀ fau'n kuru soo rà, kpir'leè sa wù yè e re tààn rèè kɛ̀n a ci e yɛr'la gɔɔ̀n. Kpir'liì yè e re tààn kɛ̀niɔ̀n, tɔ̀ yeè e yɛr'la rìì kɛ̀niɔ̀n. 29 Àwà, mòò pɛn na e yɛr'la gɔɔ̀n kɔn jà ŋe waa. Ŋà à y'à dzii ra gaa, è magoo wɔ à ɲan, a ci Kirisà sa y'a faa ɲɛynamoo kur'là rè nìi tsuru. 30 È ɲɛn à tsɛ, mùn sapɛ y'à gɔɔ̀n gàne rèè sɔn ni. 31 Tɔ̀ kamà è bà deò ci: «Kpir'la nà e faà ko e naà bàto, è shi e re tààn nà, yè bà gɔnkungɔ soo.» 32 Tɔ gòndo bla rii, min bà à dèe m'a ɲɛn Kirisà ko ɲɛynamoo kur'là tsɛ. 33 À kpɛ̀yn nìi boò tɔ̀ rii yɛ ci e soo soo sapɛ yeè e re tààn kɛ̀n a ci e yɛr'la, taàn sa yeè e re kpir'la blàbe.