Pɔlì sɛbɛn fiira riì kau
Korɛntsika reè rè
Sɛbɛɛn kùnàgòò jɔnaa
1
1 Àyìwà mun Pɔlì, Yesù Kirisà rè kɛɛradzian Ŋaablà saɔ baraka rɔ̀n, ko neema kpiri Tsìmotè, nèe sɛbɛn nee sìan ye Ŋaablà re ɲɛynamoo kur'là rà Korɛntsì wɔ̀ rɔ̀n, ko nìì reè sapɛ y'a raa Akayi mar'la min niì sapɛ. 2 Arì she, Ŋaablà ɲanwùɔ ko jaanciàn, mùn Fà Ŋaablà, ko Tsìfa Yesù Kirisà yè twɛy sìn e ra !Pɔlì nìi dèu è re byɛnbee tsɛ
3 Tsoo dzi ye ɲɛn Ŋaa tsɛ, mùn Tsìfa Yesù Kirisà Fàà, màtsur'la sapɛ dzyeèma Faà, ko vununciàn sapɛ dzyeèma Ŋaablà. 4 À ɲe vunun ciàn e re byɛɛnbe reè sapɛ doùn, à y'à to ɲe sa yeè dzi dzyee rèè vunun cin e raa byɛɛnbe reè sapɛ doùn, è bo ɲe raa vununciàn ɲàn, ɲe tɔ̀ niì tàrà boò Ŋaablà re. 5 È ɲɛn à tsɛ, Kirisà rè byɛnbee tsun vùnbe beè vu rìi mà ɲe re, ɲe sa vununcin tàrà beè tɔ̀ tsuru, è bo Kirisà rè. 6 Ɲe yè bà byɛɔ̀n, tɔ faɔ̀ ye vununciàn ko ye tsià rìì kamà. Ɲe vunun to yè cin, tɔ ye sa raa vununcin nì, gè riì ni à to byɛnbe riì ni ye tsɛ a ci à ni ɲe sa tsɛ nìi tsuru, ye yè dzi tɔ̀ ku. 7 Ɲe si xɔ nìi tsɛ ye kàjaa tsɛ, tɔ̀ san gbaɔn. È ɲɛn à tsɛ, ɲe y'à tɔ̀ ci è ye ko ɲe dzyèeŋma to byɛnbee mà, ye ko ɲe nà dzyèè vununciàn sa ma.
8 Àwà neema reè, byɛnbe riì ɲe tàrau Azhi mar'lɔn, à na ɲe sào, ye yè to tɔ̀ tɔ̀ bɛy waa. Ɲe byɛun fɔ è bè geren. À tsun vùnbeu fɔ è bè geren ɲe fàan bɛ̀r'la tsɛ. Ɲe si tsu naà xɔ à tsɛ ci ɲe nà jaamabe fa dɛ. 9 Ɲe na à jàa ci ɲe saàn sii ɲɛɔ̀n nòn, gè riì ni à to ɲe mà e si ɲɛn e yɛrɛ tsɛ waa, fɔ Ŋaablà, tɔ̀ niì fùn nèè sèè kpunaàn. 10 Wò rii ɲe tsiu tɔ̀ san brìsià rà, à to ɲe tsià arì she. Ɔ̀ɔn, wò rii ɲe tsiu, ɲe si to xɔ à tsɛ ci à nà ɲe tsi kɔn. 11 Ye sa re Ŋaablà mafyɛ̀nkɔɔn ɲe re, ye nà wɔ ɲe ra tɔ̀ ka. Tà tsuru, ɲe nà Ŋaablà ɲanwùɔ kɔ̀ì ge rìi tàrà mòò gir'le màfyɛyn baraka ɲan, tɔ nà bà baraka sian goo Ŋaablà ra mòò gir'le, ɲe kamà.
Pɔli làkerliì dɔ̀un e re jìɛ̀ doùn
12 Àwà ɲe raa yɛ̀rɛ̀blàbè kuàn nì yɛ, ɲe akir'là shɛɛrɛbe riì boò ɲe tsɛ, nìi yɛ ci ɲe yè e re jaamabee fau dziɲaan doùn duungoosoobe ko duunfyɛ ka è bo Ŋaablà ɲan, ye kàjaa tsɛ raà yè geren. Tɔ̀ na fa adamadzin mòdzin ne akiritsifabe baraka ɲan waa, ŋà Ŋaablà ɲanwùɔ baraka rɔ̀n. 13 Àwà ɲe na gèsɔn pɛn kpɛrɛ sɛbɛn siàn ye ra, fɔ ye dzia nìi kàràn y'a fàànmun. Mun to y'à kɛ̀sɛɛ̀, ci ye nà ɲe fàànmun fɔ è bè vyɛ̀ e da'ùn. 14 A ci y'a fàànmuɔ̀n nìi tsuru dɛyn nòn, mùn Tsìfa Yesù raa jisee sii sèè, ɲe nà bà ye yɛ̀rɛ̀blàbè saabu, a ci ye sa nà bà ɲe yɛ̀rɛ̀blàbè saabu nìi tsuru.
15 È mun ɲɛunma to tɔ̀ ra, mun sàò na ni mun yè dɔ̀n bo ye kpà ŋe, ye yè bà ni Ŋaablà ɲanwùɔ màfiira tarà. 16 Tà shɔ̀ùn, min bo ye re mɔn, min dɔ̀n be Maseduwani mar'lɔn. Min bo Maseduwani mar'lɔn, min sèè na ye re kɔn, ye yè bà ni mun dzwɛ̀ma, ye yè mun kèèsen n ne Yude mar'la jìɛ̀ doùn. 17 Àwà mun sào ni min tɔ̀ niì fa, mun ŋɔ̀nfyɛ̀nbe kpàdeò tɔ̀ ka gbɛ ? Tàà mun sào ni min goo nìì reè fa, tɔ adamadzin mòdzin ì naa sàòrà goo ì ɔ̀, fɔ è bè wɔ mun ne ɔ̀ɔn ko mun ne ɔ̀ɔɔn sa yeè bà soo ɔ ? 18 Ŋaablà vusootsi, tà gàneè doùn, ɲe re goomaa fa dzi ba ɔ̀ɔn ko ɔ̀ɔɔn ye ra waa. 19 È ɲɛn à tsɛ, Yesù Kirisà, Ŋaablà Dzin kpir'la, ɲe tɔ̀ niì gooma deu ye ra, mun ko Silivɛn ko Tsìmotè, tɔ̀ na ba ɔ̀ɔn ko ɔ̀ɔɔn waa, ŋà ɔ̀ɔn ni bàu ni tɔ̀ ɲan kudɛyn. 20 Àwà wò rii ɲàn, Ŋaablà re làyir'lèè sapɛ bàu ɔ̀ɔn. Wò rii baraka sa ɲan mùn dziàn «Àmìinà» Ŋaablà ra, mìn nɔɔrɔ ɲɛn à tsɛ. 21 Mòò riì ɲe ko ye sa san gbaàn Kirisà ɲàn, è bà mùn bo jiɔ̀ e jaara, tɔ Ŋaablà rii. 22 Wò rii sa yeè e re tàànmàshɛɛn tsùuŋ ɲe tsɛ, è re Dzia rè gè jɔɔn gè rèè ji ɲe ɲan.