2
1 Àwà tɔ̀ kamà, mun y'à ji n duùn, ci mun fa n kpɛyn sèè ye re mɔn taama ŋununbeè ɲàn kɔn kpɛrɛ waa. 2 Min ba ye taama ŋununbe saabu, tsì rii nà taamadzibe sìn mun na ? Mun mòò riì taama ŋununbeò, à na tɔ̀ ɔ̀ ? 3 Tɔ̀ rii na mun ne sɛbɛɛn fa kuàn, nìi yɛ mun mà nà bè wɔ, nìì reè wù yè mun taamadzibe, twɛy yè mun taama ŋununbe waa. Mun ɲɛɔ̀n à ra ye soo sookɔɔn sapɛ kajaa tsɛ, ci mun ne taamadzibeè ye sapɛ raa rìì. 4 Mun ko byɛnbe brisi, ko vununkɔn ko jaayu bùù rìì nèe sɛbɛn nee fau, m'a sìn ye ra. Mun na à fa m'a ka ye taama ŋununbe dɛ, ŋà ye bà ni à tɔ̀ rii, ci mun ye kɛ̀niɔ̀n fɔ è bè geren.Pɔlì ci yè e yɛrɛ to fìrìgòòtsià rè
5 Mòò ye ba bàu taamaŋununbe saabu, à na mun bàsɔùn taama ŋununbe waa, ŋà à ye sapɛ rii, tàmafa ye swey, mùn mà nà à dè m'a si tsi geren waa. 6 Mòò giri nìi dèu ye ɲan, y'à ka tɔ̀ kpir'la jààki, tɔ boi faa. 7 Ye nìi fa, tɔ̀ rii yɛ ye e yɛrɛ to à re, ye vununcin sìn à ra, taamaŋununbeè si mà nà tsi geren à mà waa. 8 Tà doùn mun nà nìi ka ye màxɔ̀n, tɔ̀ rii yɛ y'a kpàdè à ra ci ye y'à kɛ̀niɔ̀n. 9 Àwà mun ne sɛbɛɛn fa kuàn sɔn ni siin kɔn, min ye dzuun bo siin, min bà ni à tɔ̀, ye ye ba mun vu kuɔn goò sapɛ doùn o. 10 Ye ye e yɛrɛ to mòò riì rè, mun sa yeè n yɛrɛ toò tɔ̀ tsìfa re. A to y'a jà min n yɛrɛ tou goò sɔn na sɔn ne, mun tɔ̀ fau ye rii kamà, è ɲɛn à tsɛ Kirisà jaà ni mun na. 11 Tà tsuru, Sùtana fa nà dzi tarà mùn tsɛ waa, kàtsu mùn na fìriɔ̀ à duungoo mà waa.
Pɔlì vyɛ̀ìràgoo Torowasì wɔ̀ rɔ̀n
12 Àyìwà, min bè wɔ Torowasì wɔ̀ rɔ̀n tɔ̀un, ci mun nà Kirisà rè Kùnàgoo Dziɔ̀ dè. Min b'a jà Tsìfaà dziɛ san jiɔ̀ mun ne mɔn. 13 Tà ko e sa ra, mun akiri naà tsùuŋnà waa, è ɲɛn à tsɛ mun na n neema kpiri Tsitè jà waa. Mun to yè shi gaa è re tɔ̀un, min dɔ̀n be Maseduwanin mar'lɔn.
Pɔli ci dzia tàr'la Kirisà rìì baraka ɲan
14 Baraka yè sìn Ŋaablà ra, wò riì mùn bàa dzibaa e ka watsia sapɛ doùn Kirisà baraka rɔ̀n, à y'à to ɲe saabu rɔ̀n Kirisà yè tɔ̀ min niì sapɛ, a ci ɲinin kinin dziù. 15 Ɔ̀ɔn, nìì reè ni bar'la gè doùn, ko nìì reè ni tsià gè doùn, ɲe ni Ŋaablà re a ci Kirisa rè ɲinin kinin dziù twɛy fi. 16 Swey rè à saàn kinin nì saàn kamà. Swey rè è bà jaamabee kinin, jaamabee kamà. Tsì rii soo to dzia tɔ̀ faagoò fa ? 17 Mòò giri ni, twɛy Ŋaablà re Goomaa baɔ̀ durukun. Ɲe na ni a ci twɛy waa. Ɲe goomaa fyɛɔ rìì tsɛ. Ɲe tɔ̀ faa è bo Ŋaablà rii lè, Ŋaablà jaa ra, ko Kirisà ɲàn.