Pɔlì nìi dèu Dzyèèsìbè bɔrɔɔ ko Dzyèèsìbè yee faagoò tsɛ
3
1 Àwà mùn nà sèè rìì kɔn yeu mìn yɛrɛ goo dè gbɛ ? Tàà mùn màgoo ni à ra mìn yɛ̀rɛ̀ gòò dee sɛbɛn ì rìì ka ye re tàmafa mìn sɔn tara bo ye re a ci dzyee rèè y'à faa nìi tsuru ɔ ? 2 Ɲe raa sɛbɛɛn tɔ ye rìì. Tɔ sɛbɛɔ̀n ɲe dùsùkuan tsɛ. Mòdzian sapɛ y'a doùn tɔ̀, yè bà dzia à kàràn. 3 À fyɛɔ ci ye Kirisà raa sɛbɛɛn rìì, nìi kɛ̀ɛ̀yfaɔ̀ ɲe mà e re faagoo doùn. À na sɛbɛɔ̀n daba yu ka waa, ŋà à sɛbɛɔ̀n Ŋaablà jaamaa rè Dzia rìì ka. À to na sɛbɛɔ̀n wàla ì tsɛ nìi kpàà waa, fɔ shutswɛɛ wala ì, dùsùkun neè.4 Kirisà baraka rɔ̀n, ɲe ɲɛɔ̀n tɔ̀ ra Ŋaablà jaaterema. 5 À na ni a ci ɲe yɛ̀r'leè rìì dzia goò sɔn fa e yɛrɛ ma a ci à boo ɲe yɛ̀r'leè rìì ɲàn dɛ ! Àyi, ɲe raa dzia boo Ŋaablà rii lè. 6 Wò rii y'à dzi siun ɲe ra sa, ɲe yè bà dzyèèsìbè yeu faagoofabaa ì, nìi na sɛbɛɛn raa dzyèèsìbee waa, ŋà à Ŋaablà re Dzia raà rìì. È ɲɛn à tsɛ sɛbɛɛn, tɔ vui faa, ŋà Dzia, tɔ jaamabee sìan.
7 Àwà nìi Sàrìyaa faagoò, tɔ̀ niì nàu saàn ka, tɔ̀ na ɲììriɔ̀ kpàa ì tsɛ sɛbɛndzin, nɔɔrɔ yè bà ni à tsɛ. È ɲɛn tɔ̀ nɔɔrɔɔ̀ tsɛ, Isirayɛlidzin neè naà dzia Musa siin e jaakɔɔ doùn tsu. Tɔ̀ to y'à tàrà tɔ goo dɔ̀n boràma. 8 Tɔ̀ ye ba tɔ̀ tsuru, nìi Ŋaablà re Dzia raa faagoò do, tɔ̀ nɔɔrɔɔ̀ fa geren tɔ̀ tsɛ ɔ ? 9 Faagoo rìi kitsi mɛɛ̀ mòò tsɛ, nɔɔrɔ ye ba bàu ni tɔ̀ tsɛ, nìi terenbee faagoò raa nɔɔrɔɔ̀, tɔ̀ fa blàbe è geren o ? 10 Tà doùn, nɔɔrɔ ɲɛun nìi tsɛ, tɔ̀ na ba nɔɔrɔ ɲɛunma tɔ̀ tsɛ waa. È ɲɛn à tsɛ, nɔɔrɔ kpɛrɛ bàu ni, nìi blà kɔn è geren. 11 Àwà nìi goo dɔ̀n boràma, nɔɔrɔ ye ba bàu ni tɔ̀ tsɛ, nìi na doò do, nɔɔrɔ fa bà ni tɔ̀ tsɛ è geren kɔn ɔn ?
12 Ɲe si xɔ tɔ̀ tsɛ nìi fa, tɔ̀ kamà, ɲe yè bà goomaa kùùnxɔ̀be ka. 13 Ɲe na ni a ci Musà waa, tɔ̀ niì na vya kuɔ̀ e jaà tsɛ, gè riì ni à to Isirayɛlidzin neè mà nɔɔrɔ dɔ̀n boràmaà lataan jà waa. 14 Ŋà è akir'là xɔbeu. È ɲɛn à tsɛ arì she, yè ba Dzyèèsìbè bɔrɔɔ kìtaabuà kàr'na, tɔ̀ vya soo ni ŋe. À na boo mɔn waa, kàtsu à boò Kirisà rìì baraka ɲan. 15 À tɔ̀ tsuru, è ɲɛn à tsɛ, è bè suu fɔ she dzu, yè ba Musà rè gooma reè kàr'na watsi o watsi, vyaà bàa kuuŋna è akir'là tsɛ. 16 Goo rìi vyaà boò mɔn, tɔ̀ rii yɛ a y'a jaa kere Tsìfaà kpà. 17 Tsìfaà to nìi mìin, tɔ Dzia rìì. Tsìfaà rè Dzia to ni min niì, ŋòò na ni mɔn waa. 18 Àwà ɲe sapɛ, vyaà boo ɲe nìì reè jaa ra, ɲe Tsìfaà nɔɔrɔɔ̀ siɛ̀n a ci mòo gè siɛ̀n dzwaleyn na nìi tsuru. Ɲe lakereu ɲe yè bà à bosi gè, nɔɔrɔ yè ɲɛn ɲe tsɛ nìi blà kɔn è geren Tsifaà rè, tɔ̀ niì Dzi.