Nìi ni ɲɛynamoò rè jaamabee ɲàn
4
1 Àwà Ŋaabla nèe faagoo rèe kɛ̀ɛ̀yfaɔ̀ ɲe mà, è ɲɛn à ɲan màtsur'la tsɛ nìi faa, ɲe gɔn na vu jaà waa. 2 Goo nìì reè goo shɔn fakɔɔn yè bà seeyragoo, ɲe yè e nɔun twɛy mà. Ɲe na e raa goo faa sànbe ka, ɲe to na Ŋaablà re goomaa laker'la. Ɲe na tɔ̀ faa waa, ŋà ɲe sààbeen rìì kpàdè fyɛɛ̀, gè riì ni à tò mòdzian sapɛ yeè bà ni dzi ɲɛn ɲe ra, Ŋaablà jaa ra. 3 Tà doùn, ɲe re Kùnàgoo Dziɔ̀ ye ba mɛnɛɔn, nìì reè bar'la, à mɛnɛɔn twɛy rìì lè. 4 Twɛy ɲɛyna bɛy reè, nèe dziɲan ree ŋaablàa twɛy akir'là tsyeeŋna, gè riì ni à to è mà Kirisà, tɔ̀ niì Ŋaablà bosià, tɔ̀ nɔɔrɔɔ̀ Kùnàgoo Dziɔ̀ vyevyeè jà waa. 5 Àwà ɲe na e yɛrɛ gooma deè waa, fɔ Yesù Kirisà, Tsìfaà. Ŋà nìi ɲe, ɲe ci ɲe ye re faagoofadzin ì nì, Yesù kamà. 6 È ɲɛn à tsɛ, Ŋaablà riì dziun ci: «Vyevyeè yè den tsitsiɛ̀ fi», wò rii deun ɲe dùsùkun neè tsɛ, gè riì ni à to è bà ni e nɔɔrɔɔ̀ twɛ̀ɛ vyevyeè bo, tɔ̀ niì dendeèn Kirisà jaakɔrɔn.7 Ŋà ɲe nìì reè ni a ci tànge dzùma ì, tɔ̀ nàfor'la ni ɲe ɲan, è bà ni kpadè ci tɔ̀ dzibaabe riì ni, à tsuru na ni waa, tɔ boo Ŋaablà rii ɲàn, à na ɲe waa. 8 Ɲe bìiŋnà kàjaa sapɛ tsɛ, ŋà ɲe na tsyɛɛnma vuɔ̀ waa. Ɲe akiri gbiimaɔ̀n fɔ à si yè bè tsi, ŋà, ɲe si na yuɔ waa. 9 Byɛnbee ɲɛɔ̀n ɲe tsɛ, ŋà Ŋaablà na e si boo ɲe dzuun waa. Ɲe ban jiɔ̀ dzɔn nɔ̀n, ŋà ɲe na saɔ waa. 10 Kudɛyn, ɲe Yesù saàn byɛnbee seòn e gɔn nɔn, gè riì ni à to à re jaamabee sa yeè kpàdè ɲe gɔn nɔ̀n. 11 Àwà, ɲe nìì reè jaama, kudɛyn ɲe ni tsuù saàn dzii dzuun Yesù kamà, gè riì ni à to à raa jaamabee sa yeè e kpadè ɲe raa gɔn sanàmaà ɲàn. 12 Tà tsuru saàn ni faagoò rà ɲe ɲan, jaamabee yè bà ni faagoò rà ye ɲan.
13 À deò Ŋaablà re Goomaa doùn ci: «Mun ɲɛun à ra, tɔ̀ kamà min gooma.» È kòrò tɔ̀ ɲɛyna soo akir'là ka ɲe ɲan, ɲe sa ɲɛɔ̀n à ra, tɔ̀ kamà ɲe yè bà goomaa. 14 Àwà, ɲe y'à tɔ̀ ci, nìi Tsìfa Yesù kpunan bou saàn ɲàn, tɔ̀ rii nà ɲe sa kpunan bo saàn ɲàn ko Yesù ka, è ɲe ko ye sa tsuù à tɛyn. 15 Twɛy goo rèè sapɛ fau ye rìì kamà, gè rii ni à to Ŋaablà ɲanwùɔ yè buu bè mòò giri ɲan, nìi ni dzi ba saabu mòò giri yè baraka sìn Ŋaablà ra, yè nɔɔrɔ ɲɛn à tsɛ.
Nɔɔrɔ dò bɛy nakɔɔn
16 Tɔ̀ kamà ɲe gɔn na vu jaà waa. È ɲɛn à tsɛ, arì ɲe dà kèrè gɔɔn kɛ̀sɛɛn ye ba bara beè, ɲe doùn kèr'là bà beè yeu siì saa see. 17 Àwà ɲe re nèe watsi ree byɛnbee, tɔ̀ ŋɔn fyɛn è bà dɔ̀n boò. À nɔɔrɔ ko nɔɔrɔ rìì mà byɛn tsùɔ ɲe re, dò na ni nìi mà waa. 18 Tà gàneè doùn, gè nìi reè jàa jaa ra, ɲe na siin faa twɛy rà waa, fɔ nìi reè na jaà jaa ra waa. È ɲɛn à tsɛ, nìi jàa jaa ra, tɔ dɔ̀n boò, ŋà nìi na jaà jaa ra, tɔ̀ na do jàa waa.