Pɔlì ci gɔɔ̀n nìi tsuru gbà
5
1 Àwà m'àa tɔ ci dzɔ̀nxɔɔ̀ tsɛ, mùn ni gɔɔ̀n ɲàn a ci gbà, nìi bar'la. Tɔ̀ to kɛ̀sɛɛn ye bara, gba ni mùn ne jìrànxɔɔ̀ doùn, Ŋaabla nìi lamɔnɔɔ̀n è bà gbà, nìi na do jàa waa. Tɔ̀ na mòdzin ne si ka lamɔnɔunma waa. 2 È ɲɛn tɔ̀ tsɛ, mùn ŋmunaan, mìn bà à gaa e si fii ka ci tɔ̀ jìrànxɔ rɔ̀n gbàà yè bà ni mùn mà, vya niu'n kur'la. 3 Tà tsuru, tɔ̀ ye ba ni mùn mà, mùn màxɔ̀ɔ̀ma fa jà waa 4 È ɲɛn à tsɛ, è mùn to dzɔ̀nxɔɔ̀ tsɛ raa gbà rèe doùn, mùn ŋmunaan a ci seyn vuun ni mùn kùùn. À na ni a ci mùn sào ni mìn tɔ̀ bo e ma waa, ŋà m'àa gaa rìì jìrànxɔ rɔ̀n naà yè ji à tsɛ, gè riì ni à to jaamabee yè bà ni sanàmaà nìn. 5 Mòò riì mùn màbyɛ̀n tsùuŋnà tɔ̀ goò kamà, tɔ Ŋaablà rii, wò riì e re Dzia sìun mùn na gè jɔɔn gè.6 Tɔ̀ kamà, mùn akiri tsùuŋnà kudɛyn, mùn to kɛ̀sɛɛn ye ba à tɔ̀ ci è mùn to dzɔ̀nxɔɔ̀ tsɛ raa gɔn nèe ɲan, mùn dan gbàn Tsìfaà rà. 7 È ɲɛn à tsɛ mùn jìɛ̀ faa ɲɛynaà nì baraka ɲan, à na jàkɔɔn waa. 8 Mùn kpɛ̀yn akiri tsùuŋnà, ŋà à dzi mùn na mùn yeè bo nèe gɔ̀n nèe ɲan, mùn yeè bè e tsuù Tsìfaà rè. 9 Mùn nìi sa gaa tɔ̀ rii yɛ, ci mùn tou nèe gɔn nèe ɲan o, mùn to bou à ɲan o, mùn goo rìì yè bà dzi à ra. 10 È ɲɛn à tsɛ, fɔ mùn sapɛ rìì yè e tsiì Kirisà rè kitsikununmaà jaaterema mùn dzuun ye bo, mùn soo sookɔɔn sa yeè sàrà è kòrò mùn faadziɛ ka. E ba wùù faɔ̀ à y'a to gɔn nèe ɲan, e sàrà wùù ka. A to ye ba ɲaan ni faɔ̀ à y'à to gɔn nèe ɲan, e sàrà ɲaan ka.
Pɔlì ci Yesù baraka ɲan, Ŋaabla mòdzian ko e fia lamɔnɔun
11 Mùn sa Tsìfaà jɔɔn shiɲaanbeè tɔ̀ gè niì, ɲe goò sapɛ faa mòdzian yè bà ni à tɔ̀ ci ɲe nìi dèe à sààben. ɲe re goo sɔn pɛn na mɛnɛɔn Ŋaablà ma waa. Mun kɛ̀sɛmà nɔ̀n, ɲe tsu re goo sɔn pɛn na mɛnɛɔn ye mà waa e duùn waa. 12 Ɲe na e yɛrɛ goo dèe kpɛrɛ ye ra waa, ŋà ɲe n'a re ɲe yè shi rii wɔ ye suun nìi nà à to ye yè wàsa kpɛrɛ ɲe kamà, ye yè bà ni kùn tàrà ye yè mòdzin ì jaabi, nìì reè na e yɛrɛ blabee duùn nɔ̀n naà ka waa, fɔ jaara jàkɔɔn. 13 Àwà, e ɲe jà akiri bɛy, à Ŋaablà rii kamà. A to ye ɲe jà akiritsi, à ye rìì kamà. 14 Kirisà rè kɛ̀nbààbee fààn ɲinaɔn ɲe mà, è ɲɛn à tsɛ, mòò sɔn ye ba saun mòdzian sapɛ kamà, tɔ̀ y'a kpadèe ci mòdzian sapɛ sa saun ni. 15 À saun mòdzian sapɛ kamà, gè riì ni à to jaama reè mà jaamabee fa e yɛrɛ kamà dɛ, ŋà mòò riì saun è sèè kpunan è kamà, y'à fa tɔ̀ kamà.
16 Tà doùn, dòònun, ɲe na mòò pɛn tɔ̀ adamadzin mòdzin niu'n kur'la dɛ. Ɲe kɛ̀sɛɛn ye ba Kirisà tɔ̀u a ci adamadzin mòdzin, dòònun, ɲe na à tɔ̀ tɔ̀ tsuru dɛ. 17 Tà tsuru, mòdzian sɔn ye ba ni Kirisà ɲàn, à bàu gè ɲɛunma yeu. Goo bɔrɔɔ sapɛ dɔ̀n bou, goò sapɛ yeè siin è bà yeu. 18 Tɔ̀ sapɛ bou Ŋaablà rii ɲàn. Wò rii mùn ko e fia lamɔnɔun Kirisà baraka rɔ̀n, à to yè làmɔn'na faagoò kɛ̀ɛ̀yfa mùn mà. 19 È ɲɛn à tsɛ, Ŋaabla na ni Kirisà ɲàn, è bà dziɲan ko e fia lamɔn'na. Tà doùn à na mòdzian rè gooɲaantsiɛ daàn è kùùn dɛ, à to yè làmɔn'na goomaa ji ɲe ɲan.
20 È geren tɔ̀ sapɛ tsɛ, ɲe Kirisà re kɛɛradzin ni, à to ni a ci Ŋaablà yɛr'la rìì ye màxɔ̀ɔn, è bo ɲe dzu. Kirisà tsoo ra, ɲe ye màfyɛ̀ɛn nì ye e yɛrɛ to, y'a to e ko Ŋaablà fia la ye mɔ̀nɔ̀n. 21 Kirisà na gooɲaan fa ja waa, ŋà mùn kamà, Ŋaabla gooɲaan ɲɛun à tsɛ, gè riì ni à to mìn bà mòdzin tereonma ì Ŋaablà re.