Pɔlì ci y'a kpàdèe nìi tsuru ci ye Ŋaablà re faagoofabaa ì
6
1 Àwà ɲe ko Ŋaabla yeè e si faagoofasi nìi fa, è ɲɛn tɔ̀ tsɛ, ɲe ye màxɔɔ̀n e maà à to à ɲanwùɔ yè bà goo maana waa. 2 È ɲɛn à tsɛ, à dziun ci:«Mun wo re màfyɛɛ̀n latsiu e watsi wuu ɲan,
Min wɔ wo ra a tsi sii sèè.»
Sààben na, dòònun nì y'à watsi wuu taki.
Ɔ̀ɔn, tsià jisee watsi wuɔ rìì yɛ nèe dòònun.
3 Ɲe na à gaa ɲe yè bà mòò sàn nà baan kpàà fau'n kuru pɛn na, tɔ̀ yeè nà tsoo bara ka ɲe re faagoò mà waa. 4 Goò sapɛ doùn, ɲe yè e yɛrɛ goo dèe nìi ka tɔ̀ rii yɛ ɲe y'à kpàdè kàjaa sapɛ tsɛ ci ɲe Ŋaablà re faagoofabaa ì. Mɔ̀ɲɔn brisi ka, ɲe tɔ̀ kpàdèe byɛnbe reè doùn, fààntsì goo reè, vununkɔn goo reè. 5 Mùn y'a kpàdèe banbwey goo reè doùn, kàsò dòùn jì goo reè, màànkàn fù goo reè, faagoo ɲaùn nèè, cììbɛ̀ybeè, dzuà. 6 Mùn y'a kpàdèe duun fyɛɛ̀ doùn, twɛ̀ɛ, mɔ̀ɲɔɔn, wùɔ, Ŋaablà re Dzi Fɛnɛɛ baraka rɔ̀n, ko kɛ̀nbààbe fyɛumaà. 7 Mùn y'a kpàdèe sààbeen goomaa ka, Ŋaablà re dzibaabee ka, terenbee kaa faa gè rèè ka, nìi yɛ ɲaàn kpɛyn kaa raa rèè, ko yɛ̀rɛ̀ tsɛ̀ shua raa rèè. 8 Bla wɔɔ̀ mùn ɲan, mùn ɲan yeè bà fyɛnbee, mùn tsoo ɲaan kir'là, mùn tsoo dzi yeè bà kir'là, mùn bàa doodebaa ì tɔ̀ to y'à tàrà mùn sààbeen rìì dèe. 9 Mùn ni a ci mùn na tɔɔ̀ waa, mùn to tɔɔ̀ cɔ. Mùn ni a ci mùn saàn, tɔ̀ to y'à tàrà mùn yɛ jaama. Mùn ni a ci mùn baunà, ŋà mùn to na vuɔ̀ waa. 10 Mùn jàa ci mùn taamaŋunun, mùn taama to dzi kudɛyn. Mùn jàa ci mun gbakɔɔn, tɔ̀ to y'à tàrà mùn mòò giri baɔ̀ gètsi. Mùn jàa ci gèsɔn na ni mùn suun, tɔ̀ to y'à tàrà gè sapɛ ni ɲe re.
11 Ɲe neema Korɛntsika reè, ɲe yè e duùn fyɛu, ɲe yè gooma ye ka. Ɲe yè e dusùkuan sapɛ san jiu ye re. 12 À na ni a ci ɲe rìì ye ŋòoŋnà dɛ, ŋà ye rìì yè e yɛrɛ ŋooŋnà. 13 Mun goomaa ye ka a ci mun dzin ì. Ye mùn naà tsuru fa mùn ne. Ɲe yè e dusùkuan san jiu ye re nìi tsuru, e sa yeè e raà san ji mùn ne tɔ̀ tsuru.
Ɲɛynamoò wù è kààwɔ nìi tsuru ɲɛyna bɛɛ ka dzyèè rà
14 E ko ɲɛyna bɛy reè mà dzyèè goo farama rèè swey mà a ci gɔ̀ɔ ɲɛɛn dzwɛkà rèè vukɔɔ rɔn nìì tsuru yè faagoo soo fa waa. Dzyèè kɛ̀nma ni goo tereunmaà ko goo teren bɛɛ fi ? Dzyèè kɛ̀nma yeè bà ni vyevyeè ko tsitsiɛ̀ fi ? 15 Byɛ̀n kɛ̀nma ni ni Kirisà ko Sùtana fi ? Dzyèè kɛ̀nma yeè bà ni ɲɛynamoò ko ɲɛyna bɛɛ fi ? 16 Fèe soo dzia bà ni Ŋaablà re gbà blàa ko ɲɔ̀n rèè fi ? È ɲɛn à tsɛ, ɲe rìì Ŋaablà jaamaa rè gbà blàa, a ci Ŋaablà y'a dèu nìi tsuru ci:
«Mun nà n tsuù è fi, min jìɛ̀ fa è ka.
Mun nà bà è re Ŋaablà,
yè bà mun ne mòò rèè.»
17 È ɲɛn tɔ̀ tsɛ, Tsìfaà ci:
«Ye bo è fi, ye e dàn gbànbe è ra.
E maà e dzyɛn gè nooŋma pɛn na.
Tɔ̀un, mun nà n tsiì ye ra.»
18 Dzitsi Ŋaablà ci kɔn:
«Mun nà bà ye fà, ye yè bà mun dzin kpiri ì,
ko mun dzin taan ì.»