7
1 Àyìwà mun ne kɛ̀niunma rèè, è twɛy làyir'lèè seunma to mùn ne, noo ge o ge ni mùn gɔɔ̀n ko mùn akir'la rà, mìn tɔ̀ sapɛ foo fyɛ, mìn e re fɛnɛbee dzii tsyɛn, è kòrò ko Ŋaablà jɔɔn shiɲaanbeè ka.Pɔlì ci nìi wò taama dzibeò
2 Ye kàjaa to mùn ne e duùn. Ɲe na goo teren bɛy fa mòò pɛn ka, ɲe na mòò pɛn suun kongon, ɲe to na mòò pɛn tɔ̀nɔ̀n ɲɔn. 3 Mun na tɔ̀ dèe m'a ka kitsi mɛɛy ye tsɛ dɛ, è ɲɛn à tsɛ mun dziun ye ra nòn ci saàn ko jaamabee sa doùn, ye goojaa ni ɲe duùn. 4 Mun ɲɛɔ̀n ye ra kɔsɔbɛ, min bà wàsaɔ cɛyn ye kàjaa tsɛ. Mun vunun ciɔn tɛn, mun taama yè bà dzi fɔ è bè geren, ɲe re byɛnbee sapɛ doùn.
5 Àwà fɔ ɲe yè wɔ Maseduwanin mar'lɔn, ɲànwɛɛy na ja à ɲan dɛ. Byɛnbee kaatsià sapɛ bàu ni ɲe tsɛ. Kaà ni mùn tsɛ da rɔ̀n, duùn nɔ̀n, mùn shiunà. 6 Ŋà Ŋaablà riì mòdzin majàaŋma rèè vunun ciàn, tɔ ɲe vunun ciun Tsitè nàà ka. 7 Ŋà à na daɔ̀n à nàà bàsɔùn mà waa, y'a vunun cin nìi sa fau, è ɲɛn tɔ̀ sa tsɛ. Mun kurù taɔ ye ra tau'n kurliì rà, à tɔ̀ lakɛrɔn ɲe ra. Ye jaayu rìi bou mun kamà, ye to yè e ɲanshiɔ̀ shìù'n kur'liì rà mun naa goò rà, à tɔ̀ sa lakɛrɔn, è bè wɔ è bà taamadzibe goo brisi mun ne kɔn kpɛrɛ.
8 Àwà mun sɛbɛn niì kau ye re, tɔ̀ kɛ̀sɛɛn ye ba ye taama ŋununbeu, tɔ̀ na ba nimisaà goo mun ne waa. Ŋà mun kɛ̀sɛɛn ye ba nimisau m'a jà ci à ye taama ŋununbeu, à bàu watsirii bàsɔùn goo rìì. 9 Dòònun kpɛ̀yn, mun taama dzi, à to na ye re taamaŋununbeè kamà waa. Ŋà mun taama dzi, è ɲɛn à tsɛ ye re taamaŋununbeè nàu làkere ka ye re jaamabee doùn. Tɔ̀ taamaŋununbee bàu Ŋaablà sao rii. Tɔ̀ tsuru, ɲe na goo sɔn pɛn fa nìi nà nà ɲaan ka ye mà waa. 10 È ɲɛn à tsɛ, taamaŋununbe rìi Ŋaablà sao, tɔ nàa làkere ka jaamabee doùn, è bà saabu e tsi. Nimisa na ni tɔ̀ taamaŋununbeè ɲàn waa. Ŋà dziɲaan raa taamaŋununbeè, tɔ nàa san nì ka. 11 Àwà taamaŋununbe rìi Ŋaablà sao, tɔ nàu nìi ka ye re jaamabee doùn, tɔ̀ rii siin: y'a siin à sɔ̀bɛ̀nbe riì wɔu ye ɲan ! À nàu yɛ̀rɛ̀ tò gaa riì ka ye mà ! À ye vunun tau tau'n kur'liì rà ! À shiɲaanbe rìi kau ye ra ! À mun kur'lìi tau ye ra ! À ye màxɔ̀un nìi tsuru ! À to nàu koron niì ka ! Y'a kpàdèu kpàdèù'n kur'la sapɛ, ci ye fyɛɔ nèe goo rèe doùn.
12 A y'a jà min ye sɛbɛn, à na goo teren bɛɛ fabaà kamà waa, gooɲaan to fau mòò riì rà, à na tɔ̀ tsu kamà waa. Ŋà mun ye sɛbɛun nì, gè riì ni à to è bà ni kpadè ye ra Ŋaablà jaa ra, ye yè e sɔbɛn wɔɔ ɲe re goò ɲàn nìi tsuru. 13 È ɲɛn tɔ̀ tsɛ, ɲe vunun ciun. À na tɔ̀ vununciàn bàsɔùn waa, ɲe taama dzibeu kɔn fɔ è bè geren è ɲɛn Tsitè raa taamadzibeè tsɛ, tɔ̀ niì akiri tsuu tarau è bo ye sapɛ re.
14 Àwà mun kɛ̀sɛɛn ye ba à kpàdèu à jaa ra ci mun wàsaɔ ye kàjaa tsɛ, tɔ̀ na ba seeyragoo waa. È ɲɛn à tsɛ ɲe gè o ge dèu ye jaa ra, à sapɛ sààben. Tà doùn, ɲe y'à kpàdè rìi fau Tsitè jaa ra ci ɲe wàsaɔ ye kàjaa tsɛ, tɔ̀ bàu sààben. 15 À re kɛ̀nbààbee blàbeu ye kàjaa tsɛ fɔ è bè geren, à taa toumaà ci ye sapɛ dèumaà shi jiɛ, ko ye y'à kùùntsi riì fau, shiɲaanbe ko màsɔɔn ka. 16 Mun taama dzi, è ɲɛn à tsɛ, mun dzia n si ɲɛn ye tsɛ goò sapɛ doùn.