Pɔlì nìi dèu Maseduwanin mar'la ɲɛynamoo rèè rè dzwɛ̀maa tsɛ
8
1 Àyìwà, n neema ì, Ŋaablà yeè e ɲanwùɔ kpàdeò Maseduwanin mar'la ɲɛynamoo kur'lèè kàjaa tsɛ nìi tsuru, ɲe n'a re ye yè tɔ̀ tɔ̀. 2 Twɛy mòdzin neè ko e re gbaa sa, dzuunboi brìsi yè bà ni è tsɛ byɛnbee yè bà saabu, è ko taamadzibe brìsi yè e si forou cɛyn, yè kɔ̀ì fa. 3 Àwà à dzibeu è ra yè kɔ̀ɛ fa e dzia bɛ̀rɛ̀, fɔ è bè geren tɔ̀ sa tsɛ. Mun yè è shɛɛrɛ. 4 Y'à gaaŋ ɲe re gaaŋ'n kur'la sapɛ, ci tɔ̀ dzwɛ̀ma riì bèe fa Ŋaablà re mòò rèè rè Yude mar'lɔn, ɲe y'à to ye sa yeè e nin wɔ tɔ̀ ɲan. 5 Ɲe taa na ni nìi mà, y'à fau è geren tɔ̀ sapɛ tsɛ. Soore, yè yɛr'la sìun Tsìfaà rà. Tà shɔ̀ùn kɔn Ŋaablà saɔ doùn, yè e yɛrɛ sin ɲe sa ra. 6 Tɔ̀ kamà ɲe sa y'a gaa Tsitè rè ci à tɔ̀ kɔ̀ì shià faagoo wùù riì dzii kuɔn ye re, è bè tɔ̀ fa à y'à dzii tsyɛn, a ci à y'à dzii kuun nìi tsuru. 7 Àwà ye gètsi kàjaa sapɛ tsɛ. Ɲɛynaà kàjaa tsɛ, goomaa kàjaa tsɛ, twɛ̀ɛ kàjaa tsɛ, sɔ̀bɛ̀nbee kajaa tsɛ, kɛ̀nbààbee kàjaa tsɛ, ye tɔ̀ riì tàrau ɲe re. Tɔ̀ soo tsuru, ye bà gètsi si for'la sa kajaa tsɛ, nèe goo rèe doùn.8 Mun na à dèe ci m'a ka goo ji ye jɔɔn dɛ, ŋà m'a dèe rìì, min dzyee rèè raa sɔ̀bɛ̀nbee kpàdè ye ra, nìi ni dzi ba saabu ye sa yeè e re kɛ̀nbààbee sààbeen kpàdè. 9 Mùn Tsìfa Yesù Kirisà yè e ɲanwùɔ kpàdèu nìi tsuru ye tɔ̀ tɔ̀. Tɔ̀ niì na gètsi, ye kamà, è bau gbakɔɔn gè rii ni à to ye yè bà gètsi à re gbaa saabu rɔ̀n.
10 Min n naa akir'la rii sìan ye ra à goò tsɛ, à to wù y'a kun tɔ̀ rii tsuru. È ɲɛn à tsɛ fɔ jii dɔunmaà, ye rìì jɔ̀na y'a goò fau, ye rìì to y'à latigɛu. 11 Àwà dòònun, y'a fa y'a dzii tsyɛn, gè riì ni à to à faa ŋɛ̀nɛ̀ɲan wuu riì jàu ye ɲan, a faumaà yè tɔ̀ dzii tsyɛn è kòrò ye bɛ̀r'la ka. 12 È ɲɛn à tsɛ goò faa ŋɛ̀nɛ̀ɲan wuɔ ye ba ni nòn, nìi ni a suun è ka a fa, Ŋaabla tɔ̀ rii siɛ̀n, nìi na ni a suun, à na sɔɔn tɔ̀ kpɛyn waa.
13 À na faa ci dzyee rèè vunun yè cin ye yè bà ŋòoŋnà dɛ, ŋà à fa kuàn nì yɛ ci e sa yeè bà soo. 14 Dòònun kpɛ̀yn, nìi ni ye raà tsɛ, tɔ dzia è raa gbaa tsyee. Tɔ̀ tsuru ye sa ye na gba, nìi ni è raa tsɛ, tɔ dzia ye sa raa gbaa tsyee gè riì ni à to e sa yeè bà soo. 15 È fa, a ci à sɛbɛɔ̀n Ŋaablà re Goomaa doùn nìi tsuru ci: «Nìi y'à tsɛ̀u giri, tɔ̀ raà na giribe è geren waa. Nìi to y'à tsɛ̀u kiɲaanin, tɔ̀ tsu raà na gba waa.»
Tsitè ko nìì reè ka bèu faagoò rà
16 Tswɛ̀y Ŋaablà raa, è ɲɛn à tsɛ, à tɔ̀ goò sɔ̀bɛ̀nbe wɔu Tsitè ɲàn ye kàjaa tsɛ, a ci à ni mun sa duùn nìi tsuru. 17 Àwà ɲe nìi gaaŋ à re, è tsiiŋ tɔ̀ faa rà, à to yè bà na à ŋɛ̀nɛ̀ɲɛɔ̀n sa, à kɔɔtɔuma brìsi, ci wo nà bè bo ye kpà. 18 Àwà ɲɛynamoo kur'lèè sapɛ neema niì goo tɔ̀, yè bà à tsoo dzi kir'là Kùnàgòò Dzìù dee kàjaa tsɛ, ɲe tɔ̀ ka bèe Tsitè ka. 19 À na tɔ̀ bàsɔùn waa, ɲɛynamoo kur'lèè y'à boo sa, y'à bà ɲe jììfàsi dzwɛ̀mà shi rèe faagoò doùn, ɲe tɔ̀ niì faa ɲe y'à ka nɔɔrɔ ɲɛn Tsìfaà yɛ̀r'la tsɛ, tà ko ɲe y'à ka e re ŋɛ̀nɛ̀ɲàn wùùbeè kpàdè.
20 Tɔ̀ ɲɛyn gir'lìi kɛ̀ɛ̀yfaɔ̀ ɲe mà e re faagoò doùn, à ni ba nìi tsuru ɲe mà tsoo bara tarà tɔ̀ kun'n kur'la doùn, ɲe goò sapɛ faa, ɲe yè tɔ̀ jɔɔn bo. 21 È ɲɛn à tsɛ nìi wù, ɲe y'à gaa ɲe yè tɔ̀ rii fa, Tsìfaà jaa ra. À to mà bà Tsìfaà bàsɔùn waa, ɲe y'à fa mòdzian sa jaa ra.
22 Mùn neema kpiri kpɛrɛ ni kɔn, ɲe nà tɔ̀ sa ka bè è ka. Ɲe y'à ɲansiin goo giri doùn, ɲe y'à jà ci à sɔ̀bɛn. Dòònun kɔn à y'à kpàdeò kpɛrɛ ci wo ɲanshiɔ̀, è ɲɛn à tsɛ, à ɲɛɔ̀n ye ra a ci goo kpɛ̀rɛ̀. 23 Tsitè, tɔ mun dzyèèsi è bà mun faagoofasi ye re. Ŋà mùn neema dzyee reè, twɛy ɲɛynamoo kur'lèè raa kɛɛradzin ì nì, yè bà nɔɔrɔ ɲɛɛn Kirisà tsɛ. 24 Tà doùn y'a kpàdè è ra twɛy ɲɛynmoo kur''lèè jaa ra, ye ɲan kɛ̀nbààbee nìi boò, tà ko y'a kpàdè è ra, ci ɲe na bara ɲɔn ye ka è jaa ra maana waa.