Pɔlì làtsii kpɛrɛ nìì reè sìun kɔ̀ì goo tsɛ
9
1 Àwà nìi Ŋaablà re mòdzin neè dzwɛ̀mà goo, kùn na ni à ra min sɛbɛn sin ye ra tɔ̀ goò tsɛ dɛ. 2 È ɲɛn à tsɛ, ŋɛ̀nɛ̀ɲan wuu riì ni ye ɲan tɔ̀ goò doùn, mun tɔ̀ tɔ̀. È bè wɔ fɔ min ye ka bara ɲɔn Maseduwanin mar'la mòdzin neè rè. Mun dziun è ra, ci Akayi mar'la mòdzin neè sɔn byɛɔ̀n fɔ jii dɔunmaà. Ye re sɔ̀nbɛ̀nbee bàu saabu, è twɛy mòdzin neè giri màxɔ̀n. 3 Tà doùn mun neema reè kaà ye re, gè riì ni à to mun bar'la ɲɔn nìi fau ye ka, tɔ mà bà goo maana waa, ŋà è bè jà n dzi, ci ye sɔn byɛɔ̀n a ci m'a dèu nìi tsuru. 4 Mun vyɛ̀ɛ̀ymaà nì yɛ, Maseduwaninka reè swey mà nà bè mun ka, è bè jà ci ye sɔ̀n na byɛɔ̀n waa. Tɔ̀ ye fa, ɲe na e si xɔbe riì faɔ̀ ye tsɛ, tɔ nà bà ɲe re kùngɔ̀ suuru, è bà ye sa re kùngɔ̀ suuru. 5 Tɔ̀ doùn, m'a kɛ̀sɛu ci à wù m'a gaa neema reè rè, yè bè ye re mun jɔɔn, gè riì ni à to, ye kɔ̀ì ge nìì reè làyiri seunà, yè bà ni tɔ̀ lamɔnɔ̀n tsùù. Tà tsuru à fa bà simafɔrɔbe ka goo waa, ŋà à nà bà goo, dzwɛ ni nìi ɲàn.
6 Ye b'a tɔ̀ ci mòò riì shìmàndzin kiɲaanin sìa tɔ kiɲaanin bàsɔùn nì gaa, mòò riì to giri sià, tɔ gir'lì gaa. 7 Mòdzian soo soo sapɛ nìi latigɛɔ̀ e duùn, à wù yè kɔ̀ɛ fa ɲɛn tɔ̀ tsɛ. À mà bà taamaŋununbe ka goo, à to mà bà fààn ka goo. È ɲɛn à tsɛ, mòò riì kɔ̀ɛ faa taamadzibe ka, Ŋaabla tɔ̀ rii kɛ̀niɔ̀n. 8 À dzi ni Ŋaablà ra, è ɲanwùɔ kaatsià sapɛ ka ye suun tsyɛn, è bè wɔ gèsɔn pɛn fa ye fɔn watsi pɛn waa, fɔ nìi ni à tsɛ tɔ̀ yeè dzi goowùù giri kpɛrɛ fa kɔn. 9 À ni a ci à sɛbɛɔ̀n nìi tsuru Ŋaablà re goomaa doùn, nìi yɛ ci:
«È si forou è kɔ̀ɛ fa.
À gbakɔɔn reè kɔ̀u, à re terenbee ni tsuù kudɛyn.»
10 Mòò riì gè tsua sìan gèsibaà rà, è ɲwɛyn ɲɔnàmaà sìn, tɔ nà gè tsua sìn ye sa ra, à y'à buu, à y'à to ye re terenbee yè dzin giri wɔ. 11 Tà tsuru, ye nà bà gètsi kàjaa sapɛ tsɛ, ye yè dzi e si foro, ye yè kɔ̀ɛ fa fau'n kur'la sapɛ, nìi nà bà saabu mòò giri yè baraka sìn Ŋaablà ra è ɲɛn ɲe re faagoò tsɛ. 12 È ɲɛn à tsɛ, dzwɛ̀ma ree kùàn na è dàn Ŋaablà re mòdzìn neè màgòò wubee bàsɔùn mà waa, ŋà è bà saabu mòò giri sa yeè baraka sìn Ŋaablà ra. 13 Àwà tɔ̀ faagoò nàfaà kamà, è nà nɔɔrɔ ɲɛn Ŋaablà tsɛ è ɲɛn Kirisà rè Kùnàgoo Dziɔ̀ kuun'n kur'la tsɛ ye re, è kòrò ye dèvuà ka. Tà ko ye yè e si forou nìi tsuru ye yè e ko è sa ba soo, ko dzyee rèè sapɛ. 14 Tà doùn è nà Ŋaablà mafyɛ̀n ye re, y'à kpàdè ye ra ci ye goojaa ni ye duùn fɔ è bè geren, è ɲɛn Ŋaablà ɲanwùù brisià tsɛ, à tɔ̀ niì fau ye re. 15 Baraka yè sìn Ŋaablà ra è ɲɛn à re kɔ̀ɛ tsɛ, nìi jaa tsu fa dzi de !