Pɔlì nìi dèu e re faagoò tsɛ
10
1 Àwà mun Pɔlì, mun nìi baɔ̀ mɛ̀shɛ̀n moo, min ba ni ye ka, mun vu yè bà xɔ ye ka mun dàn ye ba gbàn ye ra, mun ye màfyɛ̀ɛn nì, Kirisà rè vununmaciàn ko à ɲan wùbee kamà. 2 Mun ye màfyɛ̀ɛn, e maà nà à to min wɔ e re mɔn, tɔ̀ yeè bà saabu min ɲanbe e ma waa. È ɲɛn à tsɛ, nìì reè ci ɲe jìɛ adamadzin mòdzin ì jììŋ'n kur'la, à kùùnxɔ̀be nà jà mun ɲan, min ɲanbe twɛy mà. 3 Ɲe kpɛ̀yn adamàdzin mòdzin ɲe yè bà jìɛ adamadzin mòdzin jiiŋ'n kur'la, ŋà ɲe na e raa kaà faa adamàdzin mòdzin naa fau'n kur'la waa. 4 È ɲɛn à tsɛ, ɲe raa kaa faa gè rèè na gɔɔ̀n kaa faa ge ì waa, ŋà dzi ni è ɲan nìi boo Ŋaablà re, è ka kaà jɔɔn shua sin concòr'nèè ci. Ɲe kɛsɛmà ɲaan neè sà dzià. 5 Dzibaabe ge o ge to nà fù ci Ŋaabla mà tɔ̀ waa, ɲe twɛy sapɛ dzii kuɔ̀. Ɲe jɔ̀rɔ̀kɔ wɔɔ̀ kɛ̀sɛmà rèè sapɛ ra, yè nà koron Kirisà rè, y'à dèvuà shi jiì. 6 Ye ye dèumaà shi jiì watsi riì bwèy y'a dzii tsyɛn, nìì reè na à shi jiɛ waa, ɲe sɔn byɛɔ̀n tà bwèy, ɲe y'à tsìì sàrà twɛy sapɛ ɲan.7 Ye goo rèè siin teren e jaaterema. Àwà sɔn ye ba ɲɛɔ̀n à ra ci wo Kirisà raa, arì she è taa to nèe sa re, ci wo Kirisà raa nìi tsuru, ɲe sa y'a raa tà tsuru. 8 Àwà Ŋaablà fààn niì siɔ̀n ɲe ra, à na tɔ̀ siɔ̀n ɲe ra ye bara kamà waa, ŋà ye yè fààn tarà. Mun to kɛ̀sɛɛn ye n yɛrɛ blabe tɔ̀ fàan kamà dɛ̀ɛnin, tɔ̀ na mun seeyràgoo waa. 9 Ŋà à na mun sàò, è jà ci mun ne sɛbɛn neè doùn goomaa ye ɲanshia goo waa. 10 È ɲɛn à tsɛ swey dziàn ci mun ne sɛbɛn neè doùn goòmà rèè ɲinmaxɔ, fààn yeè bà ni è ɲan, ŋà ci mun yɛ̀r'la ye ba ni, mun ŋɔn fyɛn, mun ne gooma reè to na pɛn waa. 11 Mòò riì tɔ̀ dèe, è b'a tɔ̀ ci ɲe nìi dèe e re sɛbɛn neè doùn ɲe mà bà ni waa, ɲe ye ba ni, ɲe nà à fa tɔ̀ rii tsuru.
12 Àwà nìì reè yè e yɛrɛ goo dèe, à kùùnxɔ̀be na ni ɲe ɲan, ɲe yè e ko twɛy bà soo, tàmafa, ɲe yè e gɔn è ka waa. Yè e baà gè gɔɔn gè riì yè e koro tɔ̀ ka, tɔ akiribɛybe rìì è re. 13 Nìi kpɛ̀yn ɲe, ɲe fa e yɛrɛ blabe è geren dàn jiumaà tsɛ waa, fɔ Ŋaabla nìi jiɔ̀ ɲe re faagoò dàn, nìi yɛ ɲe yè wɔ fɔ ye re. 14 Ɲe ma ba na wɔu ye re mɔn fyeu, ɲe na gereun e daàn tsɛ, ŋà ɲe dziu ye tsɛ fɔ mɔn ko Kirisà rè Kùnàgoo Dziɔ̀ ka. 15 Ɲe na e yɛrɛ blabee fɔ à si yè bè tsi, è ɲɛn mòò kpɛr'le faagoo fauma tsɛ waa. Ŋà, ɲe si xɔ à tsɛ ci sɔn bà beè ye re ɲɛynaà tɛ̀y vu rìi mà, ɲe re faagoò sa nà fààn tarà beè ye fi, è bè suu fɔ e da'ùn. 16 Tà tsuru, ɲe nà dzi Kùnàgoo Dziɔ̀ dè è bè fɔ ye re gàneè kɛ̀yn. Tà doùn dzyee rèè faagoò fau gàne rìi ɲàn, ɲe fa e yɛrɛ blabe è ɲɛn tɔ̀ faagoò tsɛ waa.