Pɔlì ko kɛɛradzin doo de reè raa faagoò dànfar'na
11
1 Arì she mun nà à gaa ye re, ye e mɔɲɔn n kajaa tsɛ, min bà ni akiribɛybe dɛyn kpàdè. Ye yɛ̀rɛ̀ to yè e mɔɲɔɔ̀n nòn cɛyn mun kàjaa tsɛ ! 2 Ye kàjaa tsɛ, tsyɛ̀ɛ̀nɛ̀nbe ni mun ɲan, a ci à ni Ŋaablà sa re nìi tsuru. È ɲɛn à tsɛ, mun ye màkuɔn kpiri soo re, nìi Kirisà, mun to ni à re ye yè sìn à ra a ci canguru kpiri goo tɔ bɛy, nìi fyɛɔ. 3 Àwà myɛɛn Awà sàn fìriu nìi tsuru e re sànbee ka, mun shiɔ̀, ye tsu akir'là mà nà e lakere, è ye dàn gbànbe e re duungoosoobee ko e re fyɛbee rà Kirisà kàjaa tsɛ waa. 4 È ɲɛn à tsɛ, mòò ye na è Yesù kpɛrɛ gooma de ye ra, nìi yè e si ɲe raa dèumaà nà, ye yè e tsiɛ tɔ̀ ra. Ye to Dzi niì tàrau, ye yè e tsiɛ kpɛr'la, nìi ko tɔ̀ na soo waa. Ye yè bà e tsiɛ kùnàgoo dziù kpɛr'la, nìi yè e si ye yè e tsiì dɔ̀un nìi rà.5 Mun to y'à jàa ci ye twɛy nìì reè jàtsi kuàn kɛɛradzin bla ì, è na gereon mun tsɛ kàjaa pɛn tsɛ. 6 Arì mun kɛ̀sɛɛn ma ba gooma jaa tɔ̀, à na twɛ̀ɛ kàjaa tsɛ waa. Ɲe tɔ̀ kpàdeu ye ra kpàdèù'n kuru gir'la, goo giri doùn.
7 Mun nàu Ŋaablà re Kùnagoo Dziù rìi dè ye ra maana, min n majàà, min ye ɲansen, tɔ bàu gooɲaan fauma mun ne gbɛ ? 8 Mun ɲɛynamoo kur'lèè swey rìì suun kongoun, nìi yɛ min tsiì yè mun sàrà, min bà ni dzi faagoò fa ye re. 9 È mun to ye re mɔn, mun màgoo na ni ge ì rà, ŋà mun na à bà mòò pɛn kùùngoo. Neema niì reè daun yè bo Maseduwanin mar'lɔn, twɛy yè e tsiiŋ à ka. Goo sapɛ doùn, min yɛrɛ kuun, n mà nà bà ye re seyn waa, arì she, mun to nà n yɛrɛ kun. 10 È ɲɛn Kirisà rè sààbeen tsɛ tɔ̀ niì ni mun ɲan, è bè Akayi mar'la min niì sapɛ, mòò pɛn fa dzi tɔ̀ goò yɛ̀rɛ̀blàbee sà dzi mun ɲan waa. 11 Feera mun tɔ̀ dèe ? Ci mun na ye kɛ̀niɔ̀n gbɛ ? Ŋaablà y'a tɔ̀ kɛ !
12 Mun nìi faa, arì she, mun nà bè tɔ̀ faa ka jɔɔn. Tɔ̀ tsuru nìì reè kùn gaa yè bà ni e yɛrɛ blabe tɔ̀ ka, y'à kpàdè ci ye ko ɲe sa soo faagoò doùn, mun nà tɔ̀ kùnùn. 13 Twɛy mòdzin neè kɛɛradzin doodebaa ì rìì, faagoofadzin modzìn sànfiribaa ì, nìì reè ye lakereò, yè e ba Kirisà rè kɛɛradzin ì. 14 Tɔ̀ na jia mòò dzii tsɛ waa, è ɲɛn à tsɛ Sùtana sa yeè e lakere baà vyevyeè mɛ̀rɛ̀kɛ. 15 Tà doùn, à re faagoodzin neè sa yeè bà ni e lakere ba terenbee faagoofabaa ì, tɔ̀ na jia mòò dzii tsɛ waa. Ŋà è lataan ko è re faagoò sa nà bà soo.
Pɔl'lè byɛnbe fauma rèè e re kɛɛradzinbee faagoò doùn
16 Àwà, min sèè à tsɛ kɔn, mòò pɛn mà mun bà akiri bɛy. Tàmafa ye e tsiì à ra ci mun akiri bɛy, n sa yeè bà ni n yɛrɛ blabe dɛyn 17 Mun nà nìi dè, mun na tɔ̀ dèe è bo Tsìfaà ɲàn waa, ŋà m'a dèe rìì a ci akiri bɛy, min bà ɲɛɔ̀n à ra ci kun ni mun ne, m'a ka n yɛrɛ blabe. 18 È ɲɛn à tsɛ, mòò giri ye ba e yɛrɛ blabee è kòrò dziɲaan goo rèè ka, mun sa nà n yɛrɛ blabe kɛ. 19 Ye nìì reè akiritsi rèè, ye yè e tsiɛ ye akiri bɛy reè rè goo rèè mɔ̀ɲɔn. 20 Mòdzian yè ye bà jon ì, yè ye ɲɔn, yè ye suɔn kongon, yè e yɛrɛ blabe ye mà, yè ye zhɛ e tààkuùn, ye tɔ̀ sapɛ mɔɲɔɔn. 21 À seey ni mun na min dzin ci ŋɔ̀nfyɛ̀nbe ɲe tàrau. Tà ko e sa ra, kùùnxɔ̀be ye ja mòò ɲàn goo sɔn kajaa tsɛ, à kùùnxɔ̀be ni mun sa ɲan. Mun goomaa a ci akiri bɛy.
22 È Dzyèèsìbee mòdzin, mun sa Dzyèèsìbee mòdzin. È Isirayɛlidzin, mun sa Isirayɛlidzin. È Ibraximà tsua dzin, mun sa Ibraximà tsua dzin. 23 È Kirisà rè faagoofadzin ì nì kɛ̀ ? Mun kpɛ̀yn nà gooma a ci akirifukɔɔn dɛ, ŋà mun Kirisà rè faagoofadzin è geren è tsɛ. Faagoo ɲaɔ̀n kàjaa tsɛ, mun tɔ̀ fau è geren è tsɛ. Kàsò dòùn jia kàjaa tsɛ, mun tɔ̀ fau è geren è tsɛ. Banbwee kàjaa tsɛ, tɔ̀ giri mun tàrau è mà, min saàn ja n jaa ra watsi giri. 24 Dzyèèsìbee mòdzin neè rè sɛyn jaa mòòtsyeùn ko dzin kyèèroòn, mun tɔ̀ tàrà jaa nùn fau. 25 Mun dɔrɔ jaa zhììgi fau bɔbwɛɛ̀ ka, min dzyɛn jaa soo fa kpàà reè ka. Konkor'na bara jaa zhììgi mun ka yuà tsɛ, min bwèy sɔn ko fen soo fa yu tsun nɔn. 26 Mun wɔ̀'ùn jii giri fau n san nà, fààtsì goo giri yè mun tàrà. Bayu reè tsɛ raa fààtsia, gookoron fa reè raa fààtsia, mun kunsi reè raa fààtsia, kun kpɛrɛ mòdzin neè raa fààtsia, wɔ̀ rèè doùn naa fààtsia, jènjàà koron nèè doùn naa fààtsia, kòòyua tsɛ raa fààtsia, ko neema doo de reè raa fààtsia. 27 Faagoo ɲaɔ̀n ko byɛnbee, jiseejaàrà giri, dzuà ko mìnoò, sun wɔ giri, mùnkɛɛ̀ ko vyabɛybeè, 28 gooma na ni goo dzyee reè mà. Mun ne màan ji o ji seron vyɛ̀ɛ̀ymaà yè ɲɛn tɔ̀ sapɛ tsɛ, nìi ɲɛynamoo kur'lèè raa goò kɛ̀sɛɛ̀. 29 Tsì rii fàan dzia dzyɛ̀nbe, mun fàan mà dzyɛ̀nbe ? Tsì rii to dzia mɛɛy gooɲaan yè bà saabu, tɔ mà dɔ̀n mun kpɛyn ?
30 Mìn ba e yɛrɛ blabee rìì, mun nà n yɛrɛ blabe ɲɛn n ne fààn bɛ̀y goo reè rìì tsɛ. 31 Tsoo dzi ye ɲɛn Ŋaa tsɛ kudɛyn, mùn Tsìfa Yesù Kirisà Fàà, tɔ̀ y'a tɔ̀ ci mun na doò dèe waa. 32 Dàmasì wɔ̀ rɔ̀n, màsà kpiri Aretasì na jàmààntsi rìi tsùuŋnà, tɔ̀ na wɔ̀ɔ̀ dɔ̀nmàdzii reè kààwɔɔ̀, gè riì ni à to yè bà ni mun kun. 33 Ŋà è mun jiu sèè rìì doùn, yè mun bo fɔ̀rɔ̀nkɔɔ rà wɔ̀ɔ̀ sian bonè, min dzi n tsiuma tàrà, min bo à suun.